ମୋ ମାଟି କାନ୍ଥରେ ମହାମାରୀ ମୁକାବିଲାର ମହାବୀର । ମୁଁ ଦେଖିବି, କରୋନା ତୁ କେମିତି ଆସିବୁ…? ଘର କାନ୍ଥରେ ସୋନୁଙ୍କ ସହ କରୋନା ଯୋଦ୍ଧାଙ୍କ ଚିତ୍ର ଆଙ୍କି ସଲାମ କଲେ ଚିତ୍ରକର । ଟ୍ୱିଟ୍ କରି ସୋନୁ କହିଲେ ଭାଇ ଗଜବ ଘର, ମୁଁ ନିଶ୍ଚୟ ବୁଲିଯିବି ତୁମ ଘରକୁ…
ଦୁଆର ମୁହଁରେ କବାଟ ଯେତେ ଠକ ଠକ କଲେ ବି ତୁ ଘରକୁ ପଶି ପାରିବୁନି କାରଣ ତତେ ଜଗିଛନ୍ତି କରୋନା ଯୋଦ୍ଧା ।
କନକ ବ୍ୟୁରୋ: କରୋନା ତୁ କିଛି କରିପାରିବୁନି । ଦୁଆର ମୁହଁରେ କବାଟ ଯେତେ ଠକ ଠକ କଲେ ବି ତୁ ଘରକୁ ପଶି ପାରିବୁନି… କାରଣ ତତେ ଜଗିଛନ୍ତି କରୋନା ଯୋଦ୍ଧା । ଘରକୁ ଆସିବା ଆଗରୁ ତତେ ପ୍ରଥମେ ଶ୍ରମିକଙ୍କ ଭଗବାନଙ୍କୁ ସାମ୍ନା କରିବାକୁ ପଡିବ, କାନ୍ଥରେ ଥିବା କରୋନା ଯୋଦ୍ଧାଙ୍କ ସହ ଯୁଦ୍ଧ କରିବାକୁ ପଡିବ । ତୋ ଭୟଙ୍କର ଜିଭକୁ ଛେଦନ କରିବା ପାଇଁ ମୋ ଘର ବାହାରେ ମହାମାରୀର ମହାବୀରମାନେ ଛିଡା ହୋଇଛନ୍ତି, ତତେ ହରାଇବାକୁ ରିଅଲ ହିରୋ ତୀକ୍ଷ୍ଣ ନଜର ରଖିଛନ୍ତି । ତୁ କିଛି କରିପାରିବୁନି କରୋନା… କିଛି କରି ପାରିବୁନି…
Kanak News is now on WhatsApp
Join and get latest news updates delivered to you via WhatsApp
ଡର କାହାକୁ ଭୟ କାହାକୁ, କରୋନା ଯୋଦ୍ଧା ଅଛନ୍ତି ସାହା ହେବାକୁ । ମହାମାରୀ ହାରିବ, ମଣିଷ ଜିତିବ । କରୋନାକୁ ତଡିତଡି ବିଶ୍ୱରୁ ବିତାଡିତ କରିବେ କରୋନା ଯୋଦ୍ଧା । ଆଉ ଏହି ସଂକ୍ରମଣ ବେଳେ ଆଗ ଧାଡିର ସିପାହୀ ସାଜିଥିବା କୋଭିଡ୍ ଯୋଦ୍ଧାଙ୍କୁ ଦିଆଯାଇଛି ଏମିତି ସମ୍ମାନ । ନିଜେ ଚାଳ, ଖପର ଘରେ ରହି ବି ଯୋଦ୍ଧାଙ୍କୁ ଦେଇଛନ୍ତି ହୃଦୟଖୋଲା ସମ୍ମାନ । ଯାହା ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି ।
ଗଛ ମୂଳେ ଏକ ମାଟିର ଘର, ଉପରେ ଚାଳ ଛପର । ଆଉ କାନ୍ଥର ଅଙ୍କା ହୋଇଛି କରୋନା ଯୋଦ୍ଧାଙ୍କ ଚିତ୍ର । ଡାକ୍ତରଙ୍କଠୁ ନର୍ସ, ପୋଲିସଠୁ ପୋଷ୍ଟମ୍ୟାନ୍, ଆଉ ସାମ୍ବାଦିକଙ୍କ ଠାରୁ ସଫେଇ କର୍ମୀଯାଏ । ସମସ୍ତଙ୍କ ଚିତ୍ର ଆଙ୍କି ସିପାହୀଙ୍କୁ ସଲାମ ଜଣାଇଛନ୍ତି ଉତ୍ତର ପ୍ରଦେଶ ଜାନସୀ ଅଞ୍ଚଳର ଜଣେ ଚିତ୍ରକର ପୁଷ୍ପେନ୍ଦ୍ର କୁମାର । ମାଟିଆ ରଙ୍ଗ, ଚୁନ ଏବଂ କୋଇଲାରେ କରୋନାର କରାଳ ରୂପ ସହ କରୋନା ଯୋଦ୍ଧାଙ୍କୁ ନିଜ ଘର କାନ୍ଥରେ ସ୍ଥାନ ଦେଇଛନ୍ତି ପୁଷ୍ପେନ୍ଦ୍ର । ଖାଲି ସେତିକି ନୁହେଁ କରୋନା ନିୟମ ମାନିବାକୁ ବି ବାର୍ତ୍ତା ଦେଇଛନ୍ତି ।
ତେବେ ଲୋକଙ୍କୁ ସଚେତନ ଓ ସତର୍କ କରିବା ସହ କରୋନା ଯୋଦ୍ଧାଙ୍କ ପାଇଁ ଏ ନିଆରା ସମ୍ମାନ ଦେଖି ଖୁସିରେ ଗଦଗଦ ହୋଇଛନ୍ତି ସୋନୁ ସୁଦ୍ । ଘର ଆଗରେ ସୋନୁଙ୍କ ଚିତ୍ର ଆଙ୍କି ରିଅଲ ହିରୋ ଲେଖି ସମ୍ମାନ ଜଣାଇଥିବାରୁ ସୋନୁ ଏଭଳି ଏକ ଘର ଦେଖି ଆଶ୍ଚର୍ଯ୍ୟ ହୋଇଛନ୍ତି । ଆଉ ନିଜ ଟୁଇଟରରେ ଲେଖିଛନ୍ତି, ଭାଇ କି ଗଜବ୍ ଘର । ଆପଣଙ୍କ ପ୍ରେମ ପାଇଁ ଅନେକ ଅନେକ ଧନ୍ୟବାଦ । ଏ ଘର ଦେଖିବାକୁ ମୁଁ ନିଶ୍ଚୟ ଆପଣଙ୍କ ଗାଁକୁ ଯିବି… ତେବେ ସୋନୁଙ୍କ ଟ୍ୱିଟ୍ ପରେ ଏବେ ଏହି ଘରର ଚିତ୍ର ସୋସିଆଲ ମିଡିଆରେ ଭାଇରାଲ ହେଉଛି ।
ସବୁ ସମସ୍ୟାର ସମାଧାନ କରି, ସଙ୍କଟ ସମୟରେ ସାମ୍ନାକୁ ଆସି ଲୋକଙ୍କୁ ସବୁବେଳେ, ସବୁ ମୁହୂର୍ତ୍ତରେ ସାହାଯ୍ୟ କରି ଶ୍ରମିକଙ୍କ ଭଗବାନ ସାଜିଥିବା ସୋନୁ ସୁଦଙ୍କୁ ସବୁଠାରୁ ପ୍ରଶଂସା ମିଳୁଛି । ଏମିତି ତାଙ୍କ କାମ ପାଇଁ କିଏ ତାଙ୍କୁ ଆଦର୍ଶ ମାନୁଛି ତ କିଏ ତାଙ୍କ ଚିତ୍ର ଆଙ୍କି ନିଜ ସବୁ କାମକୁ ଉତ୍ସର୍ଗ କରୁଛି ।