ଆମେରିକାକୁ କେବେ ବି ଟପି ପାରିବନି ଚୀନ୍ । ମୁଁ କ୍ଷମତାରେ ଥିବାଯାଏଁ ବିଶ୍ୱର ଶକ୍ତିଶାଳୀ ରାଷ୍ଟ୍ର ରହିବ ଆମେରିକା: ବାଇଡେନ୍

244

କନକ ବ୍ୟୁରୋ: ଆମେରିକା ରାଷ୍ଟ୍ରପତିଙ୍କ ବଡ଼ ବୟାନ । କହିଲେ, ମୁଁ କ୍ଷମତାରେ ଥିବାଯାଏଁ ଆମେରିକାକୁ ଟପି କେବେ ବି ଚୀନ୍ କୁ ବିଶ୍ୱର ଶକ୍ତିଶାଳୀ ରାଷ୍ଟ୍ର ହେବାକୁ ଦେବିନି । ଉଦ୍ଭାବନ ଏବଂ ଭିତ୍ତିଭୂମି କ୍ଷେତ୍ରରେ ଯୁକ୍ତରାଷ୍ଟ୍ର ଆମେରିକାକୁ ଟପି ଚୀନ୍‌ ବିଶ୍ୱର ସବୁଠୁ ଶକ୍ତିଶାଳୀ ରାଷ୍ଟ୍ର ହୋଇ ପାରିବ ନାହିଁ ବୋଲି ଗୁରୁବାର ଦିନ ରାଷ୍ଟ୍ରପତି ଜୋ ବାଇଡେନ୍‌ ପ୍ରତିଶ୍ରୁତି ଦେଇଛନ୍ତି ।

ହ୍ଵାଇଟ୍‌ ହାଉସରେ ବାଇଡେନ୍‌ କହିଛନ୍ତି, ଚୀନ୍‌ ସହ ତୀବ୍ର ପ୍ରତିଦ୍ୱନ୍ଦ୍ୱିତା ଚାଲିଥିବା ମୁଁ ଦେଖୁଛି । ବିଶ୍ୱର ଅଗ୍ରଣୀ, ବିତ୍ତଶାଳୀ ଏବଂ ସର୍ବଶକ୍ତିମାନ ରାଷ୍ଟ୍ରରେ ପରିଣତ ହେବା ହେଉଛି ସେମାନଙ୍କର ସାମଗ୍ରିକ ଲକ୍ଷ୍ୟ । କିନ୍ତୁ, ମୁଁ କ୍ଷମତାରେ ଥିବାଯାଏଁ ତାହା ହୋଇପାରିବ ନାହିଁ । କାରଣ ଯୁକ୍ତରାଷ୍ଟ୍ର ଆମେରିକା ସମୃଦ୍ଧ ଓ ପ୍ରସାରିତ ହେବା ଆରମ୍ଭ କରିଛି ।

ପୂର୍ବତନ ରାଷ୍ଟ୍ରପତି ଡୋନାଲ୍‌ଡ୍‌ ଟ୍ରମ୍ପ୍‌ ଚୀନ୍‌ ବିପକ୍ଷରେ କଟକଣା ଜାରି କରିବା ସହ କରୋନାଭାଇରସ୍‌ ସଂକ୍ରମଣ ପାଇଁ ଚୀନ୍‌କୁ ଦାୟୀ କରିଥିଲେ। ଏବେ ମଧ୍ୟ ବାଇଡେନ୍‌ଙ୍କ ଟିମ୍‌ ବେଜିଙ୍ଗ୍‌ର ଅର୍ଥନୀତି ଏବଂ ମାନବିକ ଅଧିକାର କାର୍ଯ୍ୟକଳାପ ଉପରେ ଟ୍ରମ୍ପ୍‌ ଜାରି କରିଥିବା କଠୋର କଟକଣା ବଜାୟ ରଖିଛି । କିନ୍ତୁ, ଚୀନ୍‌ ରୁ ଆମଦାନି ହେଉଥିବା ପ୍ରମୁଖ ସାମଗ୍ରୀ କିଂବା ବାଧ୍ୟବାଧ୍ୟକତାରେ ସେଠାକାର ଶ୍ରମିକମାନେ ଉତ୍ପାଦନ କରୁଥିବା ସାମଗ୍ରୀ ଉପରେ ନିଷେଧାଦେଶ କାଏମ ରଖିବା ପ୍ରସଙ୍ଗରେ ମନ୍ତବ୍ୟ ଦେବାକୁ ବାଇଡେନ୍‌ ଅଗ୍ରାହ୍ୟ କରିଦେଇଛନ୍ତି ।

Comments are closed.