ପ୍ରକାଶ ପାଇଲା ୟୁପିଏସସି ପରୀକ୍ଷା ଫଳ । ଆଦିତ୍ୟ ଶ୍ରୀବାସ୍ତବ ଟପ୍ପର । ଦ୍ୱିତୀୟରେ ଓଡ଼ିଶାର ଅନିମେଶ ପ୍ରଧାନ ଓ ତୃତୀୟରେ ଡି. ଅନନ୍ୟା ରେଡ୍ଡି
କନକ ବ୍ୟୁରୋ: ପ୍ରକାଶ ପାଇଛି ୟୁପିଏସସି ରେଜଲ୍ଟ । ୟୁପିର ଆଦିତ୍ୟ ଶ୍ରୀବାସ୍ତବ ଏଥିରେ ଟପ୍ପର ହୋଇଛନ୍ତି । ଅନ୍ୟପଟେ ଓଡିଶାରୁ ଅନିମେଶ ପ୍ରଧାନ ସାରା ଦେଶରେ ଦ୍ୱିତୀୟ ହୋଇଛନ୍ତି । ତେବେ ଅନିମେଶଙ୍କ ଏହି ସଫଳତା ପଛରେ ଲୁଚି ରହିଛି ଏକ ଯନ୍ତ୍ରଣାଦାୟକ କାହାଣୀ । ଅନିମେଶଙ୍କ ଛଡା ରାଜ୍ୟର ପ୍ରଜ୍ଞାନନ୍ଦନ ଗିରି ଏବଂ ଆୟୁଷି ପ୍ରଧାନ ଯଥାକ୍ରମେ ୨୪ ଏବଂ ୩୬ ରାଙ୍କ୍ ସହ କୃତକାର୍ଯ୍ୟ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କୁହାଯାଏ ପ୍ରତି ସଫଳତା ପଛରେ ସଂଘର୍ଷ ଥାଏ ଆଉ ପ୍ରତି ସଂଘର୍ଷ ପଛରେ ଗୋଟିଏ ଲେଖାଏଁ କାହାଣୀ ଥାଏ । ଆଜି ସମସ୍ତେ ଅନିମେଶଙ୍କ ସଫଳତା ଦେଖୁଛନ୍ତି ସତ । କିନ୍ତୁ ଏହା ପଛରେ ଲୁଚି ରହିଛି ଏକ ଯନ୍ତ୍ରଣାଦାୟକ କାହାଣୀ । ଆଇଏଏସ୍ ହେବା ପାଇଁ ଯେତେବେଳେ ଅହରହ ପରିଶ୍ରମ କରୁଥିଲେ ଅନିମେଶ, କ୍ୟାନ୍ସର ରୋଗରେ ପୀଡ଼ିତ ମା’ ଶଯ୍ୟାରେ ଛଟପଟ ହେଉଥିଲେ । ପୁଅକୁ ଆଇଏଏସ୍ ଭାବେ ଦେଖିବା ପାଇଁ ମା’ କେତେ ପ୍ରାର୍ଥନା କରିଥିଲେ । ଆଜି ଫଳାଫଳ ଆସିଛି, ହେଲେ ପୁଅର ଖୁସି ଦେଖିବା ପାଇଁ ମା’ ନାହାଁନ୍ତି । କିଛି ବର୍ଷ ଆଗରୁ ବାପା ଚାଲି ଯାଇଥିଲେ । ଆଉ ଦୁଃଯୋଗ ଦେଖନ୍ତୁ ଗତମାସରେ ମା ଚାଲିିଯାଇଥିଲେ ।
ଅନିମେଶଙ୍କ ବ୍ୟତୀତ ଓଡ଼ିଶାର ପ୍ରଜ୍ଞାନନ୍ଦନ ଗିରି ଏବଂ ଆୟୁଷି ପ୍ରଧାନ ଯଥାକ୍ରମେ ୨୪ ଏବଂ ୩୬ ରାଙ୍କ୍ ସହ କୃତକାର୍ଯ୍ୟ ହୋଇଛନ୍ତି । ସେହିପରି ଅଭିମନ୍ୟୁ ମଲ୍ଲିକ ୬୦ ରାଙ୍କ୍, ଜୟଶ୍ରୀ ପ୍ରଧାନ ୫୨ ତମ ରାଙ୍କ୍, ଅମୃତାଂଶୁ ନାୟକ ୧୧୦ ରାଙ୍କରେ ସିଭିଲ୍ ସର୍ଭିସ୍ ପରୀକ୍ଷାରେ କୃତକାର୍ଯ୍ୟ ହୋଇଛନ୍ତି । ସେହିପରି ଓଡ଼ିଶାର ଶୁଭ୍ରା ପଣ୍ଡା, ରଶ୍ମୀ ପ୍ରଧାନ, ବିଶ୍ୱଜିତ ପଣ୍ଡା ଏବଂ ସୌଭାଗ୍ୟ ଦାସ ଯଥାକ୍ରମେ ୨୦୪, ୩୧୯, ୩୪୩ ଏବଂ ୪୬୬ ରାଙ୍କ୍ ସହ ଉତ୍ତୀର୍ଣ୍ଣ ହୋଇଛନ୍ତି । ତେବେ ପ୍ରଥମ ସ୍ଥାନ ଅଧିକାର କରିବା ସହ ସାରା ଦେଶରେ ଟପ୍ପର ହୋଇଛନ୍ତି ଆଦିତ୍ୟ ଶ୍ରୀବାସ୍ତବ ।
ସୂଚନା ଅନୁସାରେ ପରୀକ୍ଷାରେ ମୋଟ ୧୦୧୬ ଜଣ ପରୀକ୍ଷାର୍ଥୀ କୃତକାର୍ଯ୍ୟ ହୋଇଛନ୍ତି । ଏଥିମଧ୍ୟରୁ ଆଇଏଏସ ୧୮୦ ଜଣ, ଆଇଏଫଏସ ୩୭ ଜଣ ଓ ଆଇପିଏସ ୨୦୦ ଜଣ କୃତକାର୍ଯ୍ୟ ହୋଇଛନ୍ତି ।