ଶିଳ୍ପପତିଙ୍କ ଇସାରାରୁ ବୁଝିବା ସହଜ, ୨୦୧୯ରେ ଓଡ଼ିଶାରେ କିଏ ସରକାର ଗଢ଼ିବ ।
‘ତୃଣମୂଳସ୍ତରରେ ବିରୋଧୀ କରି ପାରୁନାହାନ୍ତି ରଣନୀତି । ନବୀନଙ୍କ ଲୋପ୍ରିୟତା ଏବେ ବି ରାଜ୍ୟରେ ଅତୁଟ ରହିଛି । ଏବଂ ପୁଞ୍ଜିପତିଙ୍କ ଠାରୁ ଆରମ୍ଭ କରି ଜାତୀୟସ୍ତରରେ ନବୀନଙ୍କ ନେତୃତ୍ୱକୁ ଅନେକ ପସନ୍ଦ କରୁଛନ୍ତି’ ।
କନକ ବ୍ୟୁରୋ: ୨୦୧୯ ନିର୍ବାଚନରେ କିଏ ଗଢ଼ିବ ସରକାର ଆଉ କାହା ସପକ୍ଷରେ ଯିବ ଜନାଦେଶ ତାକୁ ନେଇ ଏବେଠୁ ରାଜ୍ୟରେ ଚାଲିଛି ଚର୍ଚ୍ଚା । କାରଣ ଅନେକ ସମୟରେ ବିଭିନ୍ନ ସର୍ଭେ ରିପୋର୍ଟ କେତେବେଳେ ବିରୋଧୀ ତ କେତେବେଳେ ଶାସକ ଦଳର ବଢ଼ାଉଛି ଚିନ୍ତା । କିନ୍ତୁ କିଛି ରାଜ୍ୟରେ ଦୀର୍ଘ ୧୮ ବର୍ଷ ଧରି ସରକାର ଗଢ଼ିଥିବା ବିଜେଡ଼ି ପୁନର୍ବାର କ୍ଷମତାକୁ ଆସିବ ବୋଲି କହିଛନ୍ତି ରାଜ୍ୟର କିଛି ବରିଷ୍ଠ ସାମ୍ବାଦିକ । ଆଉ ବିଜେଡିର ଶାସନକୁ ବଜାୟ ରଖିବାରେ ଭୂମିକା ଗ୍ରହଣ କରିପାରେ ଅନେକ ଯୋଜନା ଏବଂ ନିଷ୍ପତି ।
Kanak News is now on WhatsApp
Join and get latest news updates delivered to you via WhatsApp
ବରିଷ୍ଠ ସାମ୍ବାଦିକ ରବି ଦାସଙ୍କ କହିବା ମୁତାବକ, ‘ବିଜେଡ଼ିକୁ ମାତ୍ ଦେବା ପାଇଁ ଏପର୍ଯ୍ୟନ୍ତ କୌଣସି ବିରୋଧୀ ଦଳ ନିଜର ସ୍ଥିତି ବଜାୟ ରଖିପାରି ନାହିଁ । ଏବଂ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ନବୀନ ବର୍ତ୍ତମାନ ଜଣେ ଜାତୀୟସ୍ତରରେ ବ୍ରାଣ୍ଡ୍ ପାଲଟି ଗଲେଣି । ସେଥିପାଇଁ ମେକ୍ ଇନ୍ ଓଡ଼ିଶା ଭଳି କନକ୍ଲେଭରେ ଦେଶର ପୁଞ୍ଜିପତିମାନେ ସାଢ଼େ ୪ ଲକ୍ଷ କୋଟି ଟଙ୍କାର ପୁଞ୍ଜି ନିବେଶ କରିବା ପାଇଁ ପ୍ରତିଶ୍ରୁତି ଦେବା ଦର୍ଶାଉଛି ଯେ, ବିଭିନ୍ନ କର୍ପୋରେଟ୍ ହାଉସମାନେ ମଧ୍ୟ ନବୀନଙ୍କ ନେତୃତ୍ୱକୁ ପସନ୍ଦ କରୁଛନ୍ତି ।
ଅନ୍ୟପଟେ ୨୦୦୦ ମସିହା ପରଠାରୁ ନବୀନ ସରକାରରେ ଅଧିକାଂଶ ଅଣ ଓଡ଼ିଆ ଆଇଏଏସ ଏବଂ ଆଇପିଏସ ରହିଥିଲେ ମଧ୍ୟ ରାଜ୍ୟରେ ଏକ ପ୍ରକାର ସ୍ଥିର ଶାସନ ଚାଲିଛି । ଯାହାକି ନବୀନଙ୍କ ନେତୃତ୍ୱକୁ ଅଧିକ ଲୋକପ୍ରିୟ କରାଇଛି କହିଲେ ଅତ୍ୟୁକ୍ତି ହେବ ନାହିଁ ବୋଲି କହିଛନ୍ତି ରବି ଦାସ । କେବଳ ଏତିକି ନୁହେଁ ତୃଣମୂଳସ୍ତରରେ ଥିବା ଓଏଏସ ଅଫିସରମାନେ ନବୀନଙ୍କ ନେତୃତ୍ୱକୁ ନେଇ ସନ୍ତୁଷ୍ଟ ଥିବା ଅନେକ ସମୟରେ ପରିଲିକ୍ଷିତ ହୋଇଛି । ଏହି ସବୁ କାରଣ ହୁଏତ ୨୦୧୯ ନିର୍ବାଚନରେ ନବୀନଙ୍କୁ ପୁଣିଥରେ କ୍ଷମତାକୁ ଆଣିବାରେ ସହାୟକ ହେବ ବୋଲି ରବି ଦାସ ମତ ପ୍ରକାଶ କରିଛନ୍ତି’ ।
ସେହିଭଳି ବରିଷ୍ଠ ସାମ୍ବାଦିକ ଦିଲ୍ଲୀପ ସତପଥୀ ମଧ୍ୟ ୨୦୧୯ ନିର୍ବାଚନରେ କାହିଁକି ସରକାର ବଦଳିବ ନାହିଁ ବୋଲି ପ୍ରମୂଖ କାରଣ ଉପରେ ଗୁରୁତ୍ୱାରୋପ କରିଛନ୍ତି । ତାଙ୍କ କହିବା ମୁତାବକ, ‘ବିଜେଡ଼ି ଭଳି ଅନି କୌଣସି ବିରୋଧୀ ଦଳମାନେ ତୃଣମୂଳ ସ୍ତରରେ ସୁଦୃଢ଼ ନାହାନ୍ତି । ଯାହାକି ନିର୍ବାଚନ ସମୟରେ ବିଜେଡ଼ି ଭଳି ଅନ୍ୟ କୌଣସି ଦଳ ଭୋଟ୍ ବ୍ୟାଙ୍କକୁ ଗତିଶୀଳ ଦେଇପାରିବ ନାହିଁ । ଅନ୍ୟପଟେ ରାଜ୍ୟ ସରକାରଙ୍କ ବିଭିନ୍ନ ଯୋଜନା, ଯଥା ବସ୍ତିବାସିନ୍ଦାଙ୍କୁ ଜମିପଟ୍ଟା ସହ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ୨୦୧୯ ନିର୍ବାଚନରେ ପ୍ରମୂଖ ଭୂମିକା ବହନ କରିବ । ବିଭିନ୍ନ ସମୟରେ ଅନେକ ବରିଷ୍ଠ ନେତା ଦଳରୁ ବହିଷ୍କାର ହୋଇଥିଲେ ମଧ୍ୟ ନବୀନଙ୍କ ଭାବମୂର୍ତ୍ତି ମଳିନ ପଡ଼ି ନାହିଁ । ଏବଂ ବର୍ତ୍ତମାନ ସମୟରେ ନବୀନଙ୍କ ଲୋକପ୍ରିୟତା ରାଜ୍ୟରେ ଅତୁଟ ରହିଛି । ଦଳରେ ଏବେ ବି କିଛି ଦାଗି ନେତା ଏବଂ ଲୋକପ୍ରିୟ ନଥିବା ନେତାଙ୍କୁ ବଦଳାଇ ନୂଆ ଚେହେରାଙ୍କୁ ସୁଯୋଗ ଦେଲେ ଦଳ ନିଶ୍ଚିତ ୨୦୧୯ରେ କ୍ଷମତାରେ ରହିବ ବୋଲି ଶ୍ରୀ ସତପଥୀ କହିଛନ୍ତି’ ।