ୟୁପି ବିଧାନସଭା ନିର୍ବାଚନ : ସମାଜବାଦୀ ପାର୍ଟି ସହ ମେଣ୍ଟରେ ନିର୍ବାଚନ ଲଢିବ ଏନସିପି । ମେଣ୍ଟରେ ସାମିଲ ହେବାକୁ ଅନ୍ୟ ବିରୋଧୀଙ୍କୁ ଆହ୍ୱାନ
କନକ ବ୍ୟୁରୋ : ୟୁପିରେ ଆଗାମୀ ବର୍ଷ ହେବାକୁ ଥିବା ବିଧାନସଭା ନିର୍ବାଚନରେ ରାଷ୍ଟ୍ରବାଦୀ କଂଗ୍ରେସ ପାର୍ଟି(ଏନସିପି) ଓ ସମାଜବାଦୀ ପାର୍ଟି (ଏସପି) ମେଣ୍ଟରେ ନିର୍ବାଚନ ଲଢିବେ । ଏନେଇ ମଙ୍ଗଳବାର ଦିନ ଏନସିପି ମହାସଚିବ କେ.କେ ଶର୍ମା ଓ ପ୍ରଦେଶ ଅଧ୍ୟକ୍ଷ ଉମାଶଂକର ଯାଦବ ଗଣମାଧ୍ୟମକୁ ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମଙ୍ଗଳବାର ଦିନ କେ.କେ ଶର୍ମା ଲକ୍ଷ୍ନୌ ଠାରେ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ,ଆଗାମୀ ବର୍ଷ ଉତ୍ତରପ୍ରଦେଶ ବିଧାନସଭା ନିର୍ବାଚନରେ ଏନସିପି ଓ ସମାଜବାଦୀ ପାର୍ଟି ମେଣ୍ଟରେ ନିର୍ବାଚନ ଲଢିବାକୁ ଯାଉଛନ୍ତି । ଏହାସହ ବିଜେପିକୁ କ୍ଷମତାରୁ ହଟାଇବାକୁ ସମସ୍ତ ବିରୋଧୀଦଳମାନେ ସମାଜବାଦୀ ପାର୍ଟି ସହ ମେଣ୍ଟ କରିବାକୁ ସେ ଆହ୍ୱାନ ଦେଇଛନ୍ତି । ମହାରାଷ୍ଟ୍ର ଓ ପଶ୍ଚିମବଙ୍ଗ ଭଳି ବିଜେପିକୁ କ୍ଷମତାରୁ ଦୂରେଇ ରଖିବାକୁ ସେ ବିରୋଧୀଦଳ ମାନଙ୍କୁ ପରାମର୍ଶ ଦେଇଛନ୍ତି ।
କେ.କେ ଶର୍ମା ବିଜେପିକୁ ଟାର୍ଗେଟ୍ କରି କହିଛନ୍ତି କି ସଂଘ ସର୍ବଦା ଲୋକତନ୍ତ୍ର ପାଇଁ ବିପଦ ହୋଇଛି । ଯୋଗୀ ସରକାର ସମୟରେ ରାଜ୍ୟରେ ନ୍ୟାୟ ବ୍ୟବସ୍ଥା ଭୂଷୁଡି ପଡିଛି । ସାଧାରଣ ଲୋକେ ନ୍ୟାୟ ପାଇଁ ଥାନା, କୋର୍ଟକୁ ଯିବାକୁ ଡରୁଛନ୍ତି । ମଠ ମନ୍ଦିର ନାମରେ ରାଜନୀତି କରି ଲୋକଙ୍କୁ ମୌଳିକ ଅଧିକାରରୁ ବଞ୍ଚିତ କରାଯାଉଛି ।
ଅନ୍ୟପଟେ ୟୁପି ଏନସିପି ଅଧ୍ୟକ୍ଷ ଉମାଶଂକର ଯାଦବ କହିଛନ୍ତି କି, ୟୁପିର ସ୍ଥିତି ଖରାପ ହୋଇଛି । କୃଷକମାନେ ସେମାନଙ୍କ ହକ୍ ପାଇଁ ଆନ୍ଦୋଳନ କରୁଛନ୍ତି । ହେଲେ ସରକାର ସେମାନଙ୍କ ଦାବିକୁ ଶୁଣିବା ପରିବର୍ତ୍ତେ ସେମାନଙ୍କ ଉପରେ ବିଭିନ୍ନ ଅଭିଯୋଗ ଆଣି ଗିରଫ୍ କରିବାରେ ଲାଗିଛନ୍ତି । ଏବେ ଏନସିପି ସେମାନଙ୍କ ସହିତ ଆନ୍ଦୋଳନରେ ଅଛି ଓ ଆଗାମୀ ଦିନରେ କୃଷକମାନଙ୍କର ସମସ୍ୟାକୁ ନେଇ ପ୍ରତି ଗାଁରେ ଅଭିଯାନ ଚଳାଇବ ବୋଲି ଉମାଶଂକର କହିଛନ୍ତି ।