ଉତ୍ତର ପ୍ରଦେଶ ବିଧାନସଭାରେ ଦେଖିବାକୁ ମିଳିଲା ଅଜବ ଚିତ୍ର । ରାମନାମୀ ଗାମୁଛା ପକାଇ ବିଧାନସଭାକୁ ଆସିଲେ ବିଜେପି ବିଧାୟକ
କନକ ବ୍ୟୁରୋ : ଅଯୋଧ୍ୟାକୁ ନେଇ ସାରା ଦେଶ ଉତ୍ସବମୁଖର ଥିବା ବେଳେ ଏବେ ଏହାର ଏକ ଝଲକ ଦେଖିବାକୁ ମିଳିଛି ଉତ୍ତର ପ୍ରଦେଶ ବିଧାନସଭାରେ । ଆଜି ବିଧାନସଭା ଅଧିବେଶନ ଆରମ୍ଭ ହୋଇଥିବା ବେଳେ ବିଧାନସଭା ବାହାରେ ଓ ଭିତରେ ଜୋରଦାର ହଙ୍ଗାମା ଦେଖିବାକୁ ମିଳିଛି । ଗୋଟିଏ ପଟେ ସମାଜବାଦୀ ପାର୍ଟିର ବିଧାୟକମାନେ ସରକାରଙ୍କ ବିରୋଧରେ ନାରାବାଜି କରୁଥିବା ବେଳେ ବିଜେପି ବିଧାୟକମାନେ ଜୟ ଶ୍ରୀରାମ ନାରା ଲଗାଇଥିଲେ । କେବଳ ସେତିକି ନୁହେଁ ଏକ ସର୍ବଧର୍ମ ସମ୍ପର୍ଣ୍ଣ ଗଣତନ୍ତ୍ର ରାଷ୍ଟ୍ରର ଗଣତନ୍ତ୍ର ମନ୍ଦିରକୁ ବିଜେପି ବିଧାୟକମାନେ ରାମନାମୀ ଗାମୁଛା କାନ୍ଧରେ ପକାଇ ଆସିବା ସହ ବିଧାନସଭା ଭିତରେ ଜୟ ଶ୍ରୀରାମ ନାରା ପକାଇଥିଲେ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ବିଧାନସଭା ଅଧିବେଶନ ଆରମ୍ଭ ହେବା ମାତ୍ରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ପ୍ରଭୁ ଶ୍ରୀରାମଙ୍କ ପ୍ରାଣ ପ୍ରତିଷ୍ଠା ହୋଇଥିବାରୁ ସମସ୍ତଙ୍କୁ ଧନ୍ୟବାଦ ଜଣାଇଥିଲେ । ଅଧିବେଶନ ଆରମ୍ଭ ହେବା ମାତ୍ରେ ବିଜେପି ବିଧାୟକଙ୍କ ଜୟ ଶ୍ରୀରାମ ନାରାରେ ପୁରା ସଦନ ପ୍ରକମ୍ପିତ ହୋଇଥିଲା । କେବଳ ସେତିକି ନୁହେଁ ଶାସକ ଓ ବିରୋଧୀ ଉଭୟଙ୍କ ମୁରବୀ କୁହାଯାଉଥିବା ରାଜ୍ୟପାଳ ମଧ୍ୟ ତାଙ୍କ ଅଭିଭାଷଣ ଆରମ୍ଭରେ ଜୟ ଶ୍ରୀରାମ ନାରା ଲଗାଇଥିଲେ ।
ବିଜେପି ବିଧାୟକଙ୍କ କହିବା କଥା ରାମ ମନ୍ଦିର ଜନ ଭାବନା ସହ ଜଡିତ, ଆମେ ଜନତାଙ୍କ ପ୍ରତିନିଧିତ୍ୱ କରୁଛୁ । ଏହି କାରଣରୁ ଆମେ ଏହି ରଙ୍ଗରେ ରଙ୍ଗେଇ ହୋଇଛୁ ବୋଲି ସେମାନେ ସଫେଇ ଦେଇଥିଲେ ।