ଉନ୍ନାଓ ଗଣଦୁଷ୍କର୍ମ ମାମଲାରେ ଦୋଷୀ ବିଧାୟକ କୁଲଦୀପ୍ ସେଙ୍ଗର୍ ଙ୍କୁ ଆଜି ଦଣ୍ଡ ଶୁଣାଇବେ ଦିଲ୍ଲୀର ତିସ୍ ହଜାରୀ କୋର୍ଟ : ଅପରାହ୍ନରେ ଆସିବ ରାୟ

ଉନ୍ନାଓ ଅପହରଣ ଓ ଗଣଦୁଷ୍କର୍ମ ମାମଲାରେ ଆଜି ରାୟ ଶୁଣାଇବେ ଦିଲ୍ଲୀର ତିସହଜାରୀ କୋର୍ଟ । ଦଣ୍ଡ ଶୁଣାଣି ଉପରେ ସମସ୍ତଙ୍କ ରହିଛି ନଜର। ଏହି ମାମଲାରେ ଉନ୍ନାଓର ପୂର୍ବତନ ବିଜେପି ବିଧାୟକ କୁଲଦୀପ ସେଙ୍ଗର ଦୋଷୀ ସାବ୍ୟସ୍ତ ହୋଇଛନ୍ତି । ଅପହରଣ, ଦୁଷ୍କର୍ମ, ଶାରୀରିକ ନିର୍ଯାତନା ଆଦି ମାମଲା ସହ ପୋକ୍‌ସୋ ଆଇନରେ ସେଙ୍ଗରଙ୍କୁ ଦୋଷୀ ସାବ୍ୟସ୍ତ କରାଯାଇଛି । ମଙ୍ଗଳବାର ଏହି ମାମଲାରେ ଶୁଣାଣି କରି ରାୟ ସଂରକ୍ଷିତ ରଖିଥିଲେ କୋର୍ଟ।

ଜୁନ ୨୦୧୭ ରେ ୧୬ ବର୍ଷିୟା ବାଳିକାଙ୍କୁ ଅପହରଣ ଓ ଦୁଷ୍କର୍ମ କରିଥିଲେ ବିଧାୟକ କୁଲଦୀପ ସେଙ୍ଗର । ୨୦୧୯ ରେ ସେଙ୍ଗରଙ୍କୁ ଦଳରୁ ବହିଷ୍କୃତ କରିଥିଲା ବିଜେପି । ଏଥିସହ ବିଳମ୍ବରେ ଚାର୍ଜସିଟ ନେଇ ମଧ୍ୟ ସିବିଆଇକୁ ଭର୍ତ୍ସନା କରିଥିଲେ କୋର୍ଟ । ତେବେ ପୀଡ଼ିତାଙ୍କ ବାପାଙ୍କୁ ବେଆଇନ ଅସ୍ତ୍ରଶସ୍ତ୍ର ରଖିବା ଅଭିଯୋଗରେ ୨୦୧୮ ଏପ୍ରିଲ ୩ ତାରିଖରେ ଗିରଫ କରାଯାଇଥିଲା । ହାଜତରେ ତାଙ୍କର ମୃତ୍ୟୁ ପରେ ସେଙ୍ଗର, ତାଙ୍କ ଭାଇ ଓ ଅନ୍ୟ ୯ ଜଣଙ୍କ ବିରୋଧରେ ହତ୍ୟା ମାମଲା ରୁଜୁ କରାଯାଇଥିଲା ।

ସେଙ୍ଗର ଜେଲରେ ଥିବା ବେଳେ ଚଳିତବର୍ଷ ଜୁଲାଇ ୨୮ ତାରିଖରେ ପୀଡିତା କୋର୍ଟକୁ ଯାଉଥିବା ବେଳେ ତାଙ୍କ ଗାଡ଼ିକୁ ଧକ୍କା ଦେଇଥିଲା ଟ୍ରକ୍ । ଏଥିରେ ତାଙ୍କର ମାଉସୀ ଓ ଖୁଡ଼ିଙ୍କ ମୃତ୍ୟୁ ହୋଇଥିଲା । ଏଥି ସହିତ ପୀଡ଼ିତା ଓ ତାଙ୍କ ଓକିଲ ଗୁରୁତର ଆହତ ହୋଇଥିଲେ । ଏଥିରେ ସେଙ୍ଗରଙ୍କ ସଂପୃକ୍ତି ନେଇ ପୀଡ଼ିତାଙ୍କ ଅଭିଯୋଗ ପରେ ମାମଲା ଦିଲ୍ଲୀକୁ ସ୍ଥାନାନ୍ତର କରାଯାଇଥିଲା ।