ଅକଟୋବର ୧୫ ପରେ କଣ ବଦଳିବାକୁ ଯାଉଛି ନିୟମ? ଜାଣି ରଖନ୍ତୁ, ଆପଣଙ୍କ ଉପରେ କଣ ରହିବ ପ୍ରଭାବ?

ଆସନ୍ତା ଅକଟୋବର ୧୫ରୁ ଦେଶରେ ଅନେକ ନିୟମ ବଦଳିବାକୁ ଯାଉଛି । କରୋନା କଟକଣା ଭିତରେ ଅନଲକର ଯେଉଁ ଗାଇଡଲାଇନ ଜାରି ହୋଇଛି, ସେଥିରେ ଅକଟୋବର ୧୫ର ଗୁରୁତ୍ୱ ଯଥେଷ୍ଟ ଅଧିକ ରହିଛି । ସାରା ଦେଶରେ ଅନଲକର ଏହା ପଂଚମ ଗାଇଡଲାଇନ । ଯେଉଁଥିରେ ନିଆଯାଇଥିବା ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଅକଟୋବର ୧୫ରୁ କାର୍ଯ୍ୟକାରୀ ହେବାକୁ ଯାଉଛି ।
ସ୍କୁଲ ଖୋଲିବା ନେଇ ନେଇପାରିବେ ନିଷ୍ପତ୍ତି
ଅକ୍ଟୋବର ୧୫ ପରେ ସ୍କୁଲ ଓ କୋଚିଂ ସେଂଟର ଖୋଲିବା ପାଇଁ ରାଜ୍ୟ ସରକାର ନିଷ୍ପତି ନେଇପାରିବେ ବୋଲି କହିଛନ୍ତି କେନ୍ଦ୍ର ସରକାର । ପରିସ୍ଥିତିକୁ ଦୃଷ୍ଟିରେ ରଖି ସ୍କୁଲ ଓ ଶିକ୍ଷାନୁଷ୍ଠାନର ପରିଚାଳନା କମିଟି ସହ ଆଲୋଚନା କରି ରାଜ୍ୟ ସରକାର ଏ ନେଇ ନିଷ୍ପତି ନେବେ । ତେବେ ଅନଲାଇନ ପାଠପଢ଼ା ଜାରି ରଖିବାକୁ ପ୍ରୋତ୍ସାହିତ କରାଯିବ । ସ୍କୁଲ ନଆସି ଯେଉଁ ଛାତ୍ରଛାତ୍ରୀ ଅନଲାଇନରେ ପାଠ ପଢ଼ିବାକୁ ଚାହିଁବେ, ସେମାନଙ୍କୁ ଅନୁମତି ଦିଆଯିବ । ତେବେ ଛାତ୍ରଛାତ୍ରୀମାନେ ସ୍କୁଲ ଆସିବା ପାଇଁ ବାପାମାଆଙ୍କ ଲିଖିତ ସମ୍ମତି ଆବଶ୍ୟକ ବୋଲି କୁହାଯାଇଛି । ଆଟେଂନାନ୍ସକୁ ବାଧ୍ୟମୂଳକ କରାଯିବ ନାହିଁ । ସ୍କୁଲ ଖୋଲିବା ପାଇଁ ରାଜ୍ୟ ସରକାର ଏସଓପି ବା ନିୟମାବଳୀ ଜାରି କରିପାରିବେ ।

କେନ୍ଦ୍ର ଗୃହମନ୍ତ୍ରାଳୟ ସହ ଆଲୋଚନା କରି ଉଚ୍ଚଶିକ୍ଷା ବିଭାଗ, ଶିକ୍ଷା ମନ୍ତ୍ରାଳୟ, କଲେଜ ଓ ଉଚ୍ଚଶିକ୍ଷା ଅନୁଷ୍ଠାନ ଖୋଲିବା ପାଇଁ ନିଷ୍ପତି ନେଇପାରିବେ । ତେବେ ପିଏଚଡି ଓ ସ୍ନାତକୋତର ଶିକ୍ଷା ଯେଉଁଥିରେ ଲାବୋରେଟୋରୀ କାର୍ଯ୍ୟ ଥିବ, ସେଗୁଡିକ ଅକ୍ଟୋବର ୧୫ରୁ ଖୋଲିବା ପାଇଁ ଅନୁମତି ଦେଇଛନ୍ତି ସରକାର । ସେହିପରି ରିସର୍ଚ ରାଜ୍ୟରେ ଥିବା ବିଶ୍ୱବିଦ୍ୟାଳୟ, ଘରୋଇ ବିଶ୍ୱବିଦ୍ୟାଳୟରେ ରିସର୍ଚ କରୁଥିବା ସ୍କଲାରଙ୍କ ପାଇଁ ପାଠପଢ଼ା ନେଇ ନିଷ୍ପତି ନେବେ ରାଜ୍ୟ ସରକାର ।

ଖୋଲିବ ସିନେମା ହଲ
ଅକଟୋବର ୧୫ରୁ ଦେଶରେ ସିନେମା ହଲ ଖୋଲିବାକୁ ନିଷ୍ପତ୍ତି ହୋଇଛି । ସିନେମା ହଲ କେବେ ଖୋଲିବ ସେନେଇ ଚର୍ଚ୍ଚା ଭିତରେ କେନ୍ଦ୍ର ଗୃହମନ୍ତ୍ରାଳୟ ଏନେଇ ନିଷ୍ପତ୍ତି ନେଇଛି । ବଡ କଥା ହେଉଛି ୫୦ ପ୍ରତିଶତ କ୍ଷମତାରେ ସିନେମା ହଲ ଚଲାଇବାକୁ ଅନୁମତି ମିଳିଛି । ଅର୍ଥାତ୍ ସିନେମା ହଲର ଯଦି ବସିବା କ୍ଷମତା ୩୦୦, ତେବେ ମାତ୍ର ୧୫୦ ଦର୍ଶକଙ୍କୁ ନେଇ ସିନେମା ହଲ ଖୋଲିବ । କରୋନା କାଳରେ କିଭଳି ସିନେମା ହଲ ଗୁଡିକୁ ଅପରେଟ କରିପାରିବେ ସେନେଇ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରଣାଳୟ ଏସଓପି ଜାରି କରିବ ।

ଖୋଲିବ ସ୍ୱିମିଂ ପୁଲ
ସେହିଭଳି ଅକଟୋବର ୧୫ରୁ ସ୍ୱିମିଂ ପୁଲ ଖୋଲିବାକୁ ମଧ୍ୟ ଅନୁମତି ମିଳିଛି । ହେଲେ ଏଥିରେ କେବଳ କ୍ରିଡାବିତଙ୍କୁ ଟ୍ରେନିଂ ପାଇଁ ଅନୁମତି ମିଳିଥିବା କେନ୍ଦ୍ର ସରକାରଙ୍କ ଗାଇଡଲାଇନରେ ଦର୍ଶାଯାଇଛି । ଏଥିପାଇଁ କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରାଳୟ ପକ୍ଷରୁ ଏସଓପି ଜାରି କରାଯିବ । ବ୍ୟବସାୟ ସଂକ୍ରାନ୍ତୀୟ ପ୍ରଦର୍ଶନୀ ମଧ୍ୟ ଅକଟୋବର ୧୫ରୁ ଚାଲିପାରିବ, ଯାହାର ଏସଓପି କେନ୍ଦ୍ର ବାଣିଜ୍ୟ ମନ୍ତ୍ରାଳୟ ଜାରି କରିବ ।

ଖୋଲିବ ପାର୍କ
ଅକଟୋବର ୧୫ରୁ ଏଂଟରଟେନମେଂଟ ପାର୍କ ଖୋଲିବାକୁ ମଧ୍ୟ ଅନୁମତି ମିଳିଛି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଏଥିପାଇଁ ଏସଓପି ଜାରି କରିବ ବୋଲି ଅନଲକ ୫ର ଗାଇଡଲାଇନରେ ଉଲ୍ଲେଖ ରହିଛି ।

ସମାବେଶରେ ୧୦୦ରୁ ଅଧିକ ଲୋକ
ଅକଟୋବର ୧୫ ପରେ ୧୦୦ରୁ ଅଧିକ ଲୋକଙ୍କୁ ନେଇ ସମାବେଶ ହୋଇପାରିବ । ଅବରୋଧ ଅଂଚଳ ବାହାରେ ସାମାଜିକ, ଧାର୍ମିକ, ରାଜନୈତିକ, ଶିକ୍ଷା, କ୍ରୀଡ଼ା, ମନୋରଂଜନ ସମାବେଶ ପାଇଁ ପୂର୍ବରୁ ଅନୁମତି ମିଳିଥିଲା । ତେବେ ୧୦୦ରୁ ଅଧିକ ଲୋକ ଏକାଠି ହେବା ଉପରେ ପ୍ରତିବନ୍ଧ ଳଗାଯାଇଥିଲା । ଅନଲକ୍-୫ରେ ଏଥିରେ କୋହଳ କରଯାଇଛି । ଅକଟୋବର ୧୫ ପରେ ଏହା କାର୍ଯ୍ୟକାରୀ ହୋଇପାରିବ ।

ଅବରୋଧ ଅଂଚଳ ବାହାରେ ୧୦୦ରୁ ଅଧିକ ଲୋକ ଏକାଠି ହେବା ଲାଗି ରାଜ୍ୟ ସରକାର ଅନୁମତି ଦେଇପାରିବେ । ତେବେ ଏଥିରେ କିଛି ସର୍ତ ରଖିଛନ୍ତି କେନ୍ଦ୍ର ସରକାର । ଆବଦ୍ଧ ଅଂଚଳରେ ବା ହଲ ଭିତରେ ସମାବେଶ ହେଉଥିଲେ ହଲ କ୍ଷମତାର ଅଧା ଲୋକ ସାମିଲ ହୋଇପାରିବେ । ସର୍ବାଧିକ ୨୦୦ ଲୋକ ସମାଗମ ହୋଇପାରିବେ । ମାସ୍କ ପିନ୍ଧିବା, ସାମାଜିକ ଦୂରତା, ହାତ ଧୋଇବା ଏବଂ ଥର୍ମାଲ ସ୍କାନିଂ ବାଧ୍ୟତାମୂଳକ ହେବ । ଖୋଲା ପଡ଼ିଆରେ ସମାଗମ ହେଉଥିଲେ ପଡ଼ିଆର ଆକାର ଅନୁସାରେ ନିଷ୍ପତି ନିଆଯିବ । ସମାଗମକୁ ନିୟନ୍ତ୍ରଣ ରାଜ୍ୟ ସରକାର ଏ ନେଇ ନିୟମାବଳୀ ଜାରି କରିବେ ।