ସ୍ୱାସ୍ଥ୍ୟ ବିଭାଗର ନିଆରା ଉଦ୍ୟମ । ସରକାରୀ ଡାକ୍ତରଖାନା ପରିସରରେ ମଡେଲ ପାର୍କ । 

କନକ ବ୍ୟୁରୋ : ସରକାରୀ ଡାକ୍ତରଖାନା ପରିସରରେ ମଡେଲ ପାର୍କ । ଉପାନ୍ତ ଅଞ୍ଚଳ ମାଲକାନଗିରି ଜିଲ୍ଲା ମାଥିଲି ବ୍ଲକ ସଦର ଉପଖଣ୍ଡ ଡାକ୍ତରଖାନାରୁ ଆସିଛି ଏପରି ନିଆରା ଚିତ୍ର । କିଏ ମୋବାଇଲରେ ସେଲ୍ଫି ନେଉଛି ତ ଆଉ କିଏ ଏହି ପରିବେଶକୁ ମନଭରି ଉପଭୋଗ କରୁଛି । ଶିଶୁ ଠାରୁ ବୟସ୍କ ପର୍ଯ୍ୟନ୍ତ ସମସ୍ତେ ଏହାର ପ୍ରାକୃତିକ ପରିବେଶରେ ହଜିଯାଉଛନ୍ତି । ରୋଗୀ ସେବାରେ ବି ପଛରେ ଏହି ପଡିନି ଡାକ୍ତରଖାନା । ଅତ୍ୟାଧୁନିକ ଚିକିତ୍ସା ବ୍ୟବସ୍ଥା ସହ ରୋଗୀଙ୍କ ମାନସିକତାରେ ପରିବର୍ତନ ଆଣିବାକୁ ଏଭଳି ଉଦ୍ୟମ କରିଛି ସ୍ୱାସ୍ଥ୍ୟ ବିଭାଗ ।

ଏକ ସୁସ୍ଥ ମନ ଓ ସୁନ୍ଦର ସ୍ୱାସ୍ଥ୍ୟ ପାଇଁ ଉତ୍ତମ ପରିବେଶର ନିହାତି ଆବଶ୍ୟକତା ରହିଛି । ଆଉ ଏଭଳି ଆବଶ୍ୟକତାକୁ ପୂରଣ କରିବାରେ ସଫଳ ହୋଇଛି ଉପାନ୍ତ ଅଞ୍ଚଳରେ ଥିବା ମାଥିଲି ଉପଖଣ୍ଡ ଚିକିତ୍ସାଳୟ । ସରକାରୀ ଡାକ୍ତରଖାନା ପରିସରରେ ତିଆରି ହୋଇଛି ମଡେଲ ପାର୍କ । ମାଲକାନଗିରି ଜିଲା ମାଥିଲି ବ୍ଲକ ସଦର ଉପଖଣ୍ଡ ଚିକିତ୍ସାଳୟରେ ରୋଗୀ ଓ ପର୍ଯ୍ୟଟକଙ୍କ ମନ କିଣୁଛି ଏହି ପାର୍କ । ରଙ୍ଗୀନ ଆଲୋକୀକରଣ ସହ ଫାଉଣ୍ଟେନର ମଜା ନେଉଛନ୍ତି ଲୋକେ । ସନ୍ଧ୍ୟା ହେଲେ ସ୍ୱାସ୍ଥ୍ୟକେନ୍ଦ୍ର ପରିସରରେ ଜମୁଛି ଲୋକଙ୍କ ଭିଡ । କିଏ ସେଲ୍ଫି ନେଇ ମୋବାଇଲରେ ସାଇତି ରଖୁଛି ତ ଆଉ କିଏ ମେଡ଼ିକାଲ ପରିସରରେ ଥିବା ଏହି ସୁନ୍ଦର ପରିବେଶକୁ ମନଭରି ଉପଭୋଗ କରୁଛି । ମାଥିଲି ସମେତ ଖଇରପୁଟ, କୁଡୁମୁଲୁଗୁମ୍ମା ଆଦି ଅଞ୍ଚଳରୁ ଲୋକେ ଆସି ମେଡିକାଲ ଓ ପାର୍କ ଦେଖିବାକୁ ଦୈନିକ ଭିଡ ଜମାଉଛନ୍ତି ।

କେନ୍ଦ୍ର ଓ ରାଜ୍ୟ ସରକାରଙ୍କ କାୟାକଳ୍ପ ଯୋଜନା ମାଧ୍ୟମରେ ମାଥିଲି ସ୍ୱାସ୍ଥ୍ୟକେନ୍ଦ୍ର ପରିସରରେ ପାର୍କ, ମ୍ୟୁଜିକ ଥେରାପି, ହରବାଲ ଗାର୍ଡନ, ଫାଉଣ୍ଟେନ ସହ ଆଲୋକୀକରଣର ବ୍ୟବସ୍ଥା କରାଯାଇଛି । ମାଲକାନଗିରି ଜିଲାରେ ପ୍ରଥମ ଥର ସରକାରୀ ଡାକ୍ତରଖାନାକୁ ମଡେଲ ପାର୍କର ରୂପ ଦିଆଯାଇଛି । ପୂର୍ବରୁ ମାଥିଲି ସ୍ୱାସ୍ଥ୍ୟକେନ୍ଦ୍ର ଅବ୍ୟବସ୍ଥା ଭିତରେ ରହୁଥିଲା । ଏବେ କିନ୍ତୁ ପରିବେଶ ସାଙ୍ଗକୁ ସ୍ୱାସ୍ଥକେନ୍ଦ୍ରର ଚିତ୍ର ମଧ୍ୟ ବଦଳିଯାଇଛି । ମେଡିକାଲ ପରିବେଶରେ ମଡେଲ ପାର୍କ ବ୍ୟବସ୍ଥା ରୋଗୀର ମାନସିକତା ଓ ରୋଗ ଭଲ ହେବାରେ ସହାୟକ ହେବ ବୋଲି କହିଛନ୍ତି ମାଥିଲି ଉପଖଣ୍ଡ ସ୍ୱାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଅଧିକାରୀ ।