ଗୌହାଟୀ ପହଞ୍ଚିଲେ ଆଉ ୩ ବିଦ୍ରୋହୀ ବିଧାୟକ: ଶରତ ପାୱାରଙ୍କୁ କେନ୍ଦ୍ରମନ୍ତ୍ରୀଙ୍କ ଧମକ ଅଭିଯୋଗ

କନକ ବ୍ୟୁରୋ: ଦେଶରେ ରାଷ୍ଟପ୍ରତି ନିର୍ବାଚନକୁ ନେଇ ଯେତିକି ଚର୍ଚ୍ଚା ନ ହେଉଛି ତା ଠୁ ଅଧିକ ମହାରାଷ୍ଟ୍ର ରାଜନୀତିକୁ ନେଇ ଅଧିକ ଚର୍ଚ୍ଚା । ସରକାର ବଂଚାଇବାକୁ ଏମଭିଏ ମେଂଟ ଚେଷ୍ଟା ଚଳାଇଥିବା ବେଳେ ଏକନାଥ ସିନ୍ଦେଙ୍କ କ୍ୟାମ୍ପରେ ଯୋଗଦେଇଛନ୍ତି ଆଉ ୩ ବିଦ୍ରୋହୀ ବିଧାୟକ । ଏକ ଶକ୍ତିଶାଳୀ ଜାତୀୟ ଦଳ ତାଙ୍କୁ ସହଯୋଗ କରୁଥିବା ଗତକାଲି ସିନ୍ଦେ କହିଥିବା ଆଜି ସେମାନଙ୍କ ସହ କୌଣସି ଜାତୀୟ ଦଳ ନଥିବା କହିଛନ୍ତି । ଏପଟେ ସରକାର ଭାଙ୍ଗିବାକୁ ଏନସିପି ନେତା ଶରତ ପାୱାରଙ୍କୁ ଜଣେ କେନ୍ଦ୍ରମନ୍ତ୍ରୀ ଧମକ ଦେଇଥିବା ଅଭିଯୋଗ ଆଣିଛନ୍ତି ସଞ୍ଜୟ ରାଉତ ।
ମହାରାଷ୍ଟ୍ରରେ ଚାଲିଥିବା ରାଜନୈତିକ ସଙ୍କଟ ମଧ୍ୟରେ ଆଉ ତିନି ବିଦ୍ରୋହୀ ବିଧାୟକ ଏକନାଥ ସିନ୍ଦେଙ୍କ କ୍ୟାମ୍ପରେ ଯୋଗଦେଇଛନ୍ତି । ଗତକାଲି ରାତିରେ ୩ ଜଣ ବିଧାୟକ ଗୌହାଟୀ ଅନ୍ୟ ବିଧାୟକମାନେ ଥିବା ହୋଟେଲରେ ପହଂଚିଛନ୍ତି । ଏମଭିଏ ମେଂଟ ସରକାରରେ ରହିବ ନା ବିଦ୍ରୋହୀ ବିଧାୟକଙ୍କ ସମର୍ଥନରେ ବିଜେପି ସରକାର ଗଢିବ ତାକୁ ନେଇ ଆଲୋଚନା ଚାଲିଥିବା ବେଳେ ଶିବସେନା ନେତା ସଞ୍ଜୟ ରାଉତଙ୍କ ବୟାନକୁ ନେଇ ଚର୍ଚ୍ଚା ବଢିଛି । ଜଣେ କେନ୍ଦ୍ର ମନ୍ତ୍ରୀ ଏନସିପି ମୁଖ୍ୟ ଶରତ ପାୱାରଙ୍କୁ ଧମକ ଦେଇଥିବା ନେଇ ଅଭିଯୋଗ ଆଣିଛନ୍ତି ସଞ୍ଜୟ ରାଉତ । କାଗଜକଲମରେ ସେମାନେ ଅଧିକ ଥାଇପାରନ୍ତି ହେଲେ ଫୋର ଟେଷ୍ଟ ହେଉ ଅବା ରାସ୍ତାରେ ଯୁଦ୍ଧ ସୁବୁଠି ଆମେ ବିଜୟୀ ହେବୁ ବୋଲି ଦୃଢୋକ୍ତି ପ୍ରକାଶ କରିଛନ୍ତି ସଞ୍ଜୟ ।

ଏକନାଥ ସିନ୍ଦେଙ୍କୁ ଦଳର ନେତା କରିବା ପାଇଁ ୩୪ ବିଧାୟକଙ୍କ ସ୍ୱାକ୍ଷର ଥିବା ପତ୍ର ମହାରାଷ୍ଟ ରାଜ୍ୟପାଳଙ୍କୁ ପଠାଯିବା ପରେ ଆଉ ୭ ଜଣ ବିଧାୟକ ସିନ୍ଦେଙ୍କ କ୍ୟାମ୍ପରେ ଯୋଗଦେଇଛନ୍ତି । ଏହା ପଛରେ ବିଜେପିର ହାତ ଥିବା ଏମଭିଏ ମେଂଟ ଅଭିଯୋଗ କରିଛି । ଉଦ୍ଧବ ଠାକରେ ସରକାର ଗଠନ କରିବା ଦିନଠୁ ବିଜେପି ତାର ସବୁ ଶକ୍ତି ଏବଂ ବାହୁ ବଳ ଲଗାଇ ସରକାର ଭାଙ୍ଗିବାକୁ ଚେଷ୍ଟା କରୁଥିବା କଂଗ୍ରେସ ନେତା ଅଭିଯୋଗ ଆଣିଛନ୍ତି । ହେଲେ ଅଭିଯୋଗକୁ ଖଣ୍ଡନ କରିଛନ୍ତି ବିଜେପି ନେତା ତଥା ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା । ମହାରାଷ୍ଟ ରାଜନୀତି ଦେଖାଦେଇଥିବା ସଙ୍କଟରେ ଆମର କିଛି ଭୂମିକା ନାହିଁ । କିନ୍ତୁ ମହାରାଷ୍ଟ୍ର ଭଳି ବଡ ରାଜ୍ୟର ଲୋକେ ଆସାମକୁ ପସନ୍ଦ କରିଥିବାରୁ ଖୁସୀ ଥିବା କହିଛନ୍ତି ହିମନ୍ତ ।

ଏଭଳି ରାଜନୈତିକ ସଙ୍କଟ ମଧ୍ୟରେ ବିଦ୍ରୋହୀ ବିଧାୟକଙ୍କୁ ମୁମ୍ବାଇ ଆସିବାକୁ ଚ୍ୟାଲେଞ୍ଜ କରିଛନ୍ତି ଶିବସେନା ସାଂସଦ ସଞ୍ଜୟ ରାଉତ । ଏପଟେ ବିଦ୍ରୋହୀ ବିଧାୟକଙ୍କ ନେତା ଏକନାଥ ସିନ୍ଦେ ଆଜି ମୁମ୍ବାଇ ଆସିବେ ବୋଲି ସୂଚନା ମିଳିଛି ।