ବାତ୍ୟା ମୁକାବିଲା ନେଇ ପ୍ରଂଶସା ସାଉଁଟିଲା ଓଡିଶା । ମିଳିତ ଜାତିସଂଘର ବିପର୍ଯ୍ୟୟ ପ୍ରଶମନର ମୁଖ୍ୟ କହିଲେ, ଓଡିଶାଠାରୁ ଶିଖିବା ଦରକାର ବାତ୍ୟା ମୁକାବିଲାର ପ୍ରସ୍ତୁତି ।
କନକ ବ୍ୟୁରୋ: ବାତ୍ୟା ମୁକାବିଲା ନେଇ ପୁଣିଥରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଶଂସା କରିଛି ଜାତିସଂଘ । ବିପର୍ଯ୍ୟୟ ମୁକାବିଲା ପାଇଁ କେମିତି ସଠିକ ପରିଚାଳନା, ସୁଚିନ୍ତିତ ଯୋଜନା ଏବଂ ପୂର୍ବ ପ୍ରସ୍ତୁତି କରାଯାଏ, ତାହା ନବୀନ ପଟ୍ଟନାୟକଙ୍କ ସରକାର ଠାରୁ ଶିଖିବା କଥା ବୋଲି କହିଛନ୍ତି ମିଳିତ ଜାତିସଂଘର ବିପର୍ଯ୍ୟୟ ପ୍ରଶମନ ମୁଖ୍ୟ ଅଧିକାରୀ ମାମି ମିଜୁଟୋରି । ସମ୍ବଳର ସୁବିନିଯୋଗ ଏବଂ ସଠିକ୍ ପରିଚାଳନା ଯୋଗୁଁ ନବୀନ ସରକାର ବାତ୍ୟା ଭଳି ବିପର୍ଯ୍ୟୟକୁ ସଠିକ ଢ଼ଙ୍ଗରେ ମୁକାବିଲା କରିପାରିଛନ୍ତି ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବାତ୍ୟା ସତେ ଯେମିତି ଓଡିଶାର ଚିର ସାଥି ପାଲଟିଯାଇଛି ଏବଂ ପ୍ରାୟ ପ୍ରତ୍ୟେକବର୍ଷ ଏଭଳି ବିପର୍ଯ୍ୟୟ, ଏହାର ମୁକାବିଲା ପାଇଁ ଓଡିଶାକୁ ସେହି ପରିମାଣରେ ପ୍ରସ୍ତୁତ ବି କରିଦେଇଛି । ମିଳିତ ଜାତିସଂଘର ବିପର୍ଯ୍ୟୟ ପ୍ରଶମନ କାର୍ଯ୍ୟାଳୟର ମୁଖ୍ୟ ମାମି ମିଜୁଟୋରି ଗଣମାଧ୍ୟମକୁ ଏକ ସାକ୍ଷାତକାର ଦେଇ କହିଛନ୍ତି, ବିପର୍ଯ୍ୟୟ ସମୟରେ ଶାସନ ବ୍ୟବସ୍ଥାକୁ କେମିତି ପ୍ରସ୍ତୁତ କରିହେବ, ସେ କ୍ଷେତ୍ରରେ ଓଡିଶା ଏକ ଉଦାହରଣ ପାଲଟିଛି । ପ୍ରସ୍ତୁତିରେ ନିବେଶ ଏବଂ ପରିସ୍ଥିତିକୁ ଦେଖି ଯୋଜନା କରିପାରୁଛି ଓଡିଶା ।
ନବୀନ ପଟ୍ଟନାୟକ ପ୍ରଥମ ଥର ଲାଗି ମୁଖ୍ୟମନ୍ତ୍ରୀ ହେବା ପରେ ବିପର୍ଯ୍ୟୟ ପରିଚାଳନା ପାଇଁ ବ୍ୟବସ୍ଥା ପ୍ରସ୍ତୁତ କରିଛନ୍ତି ଏବଂ ଡିଜାଷ୍ଟର ମ୍ୟାନେଜମେଂଟ ଅଥରିଟି ମଧ୍ୟ ଗଠନ କରିଛନ୍ତି । ଖାଲି ସେତିକି ନୁହେଁ, ସେପଟେ ମନ କୀ ବାତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାତ୍ୟା ମୁକାବିଲା ନେଇ ପ୍ରଶଂସା କରିଛନ୍ତି ।