ଭାବବିହ୍ୱଳ ହେଲେ ୟୁକ୍ରେନ୍ ରାଷ୍ଟ୍ରପତି । କହିଲେ ଋଷକୁ ସମସ୍ତେ ଡରୁଛନ୍ତି, ଆମକୁ ଏକଲା ଲଢିବାକୁ ଛାଡି ଦିଆଗଲା ।

କନକ ବ୍ୟୁରୋ : ଋଷ-ୟୁକ୍ରେନ୍ ମଧ୍ୟରେ ଯୁଦ୍ଧ ଦ୍ୱିତୀୟ ଦିନରେ ପହଞ୍ଚିଛି । ଋଷର ଲଗାତାର ଆକ୍ରମଣରେ ୟୁକ୍ରେନର ଅଧିକାଂଶ ସହରରେ ଏବେ ନିଆଁ ଜଳୁଛି । ଆଉ ଆଜି ୟୁକ୍ରେନର ରାଜଧାନୀ କିବ ଦଖଲ କରିବା ଲକ୍ଷ୍ୟରେ ରହିଛି ଋଷ । ଏଥିପାଇଁ ଋଷ ସେନା କିବ ମୁହାଁ ହୋଇଛନ୍ତି । ଏପରିକି କିବର ପାଖରେ ଥିବା ବିମାନବନ୍ଦର ଗୁଡିକରେ ମିସାଇଲ ମାଡ କରୁଛି ଋଷ । ଆଉ ଏଭଳି ସଙ୍କଟଜନକ ସ୍ଥିତିରେ ୟୁକ୍ରେନ ରାଷ୍ଟ୍ରପତି ଜେଲେନସ୍କି ଭାବବିହ୍ୱଳ ହୋଇଛନ୍ତି । ଗଣମାଧ୍ୟମକୁ ସମ୍ବୋଧିତ କରି ଜେଲେନସ୍କି କହିଛନ୍ତି,. ଋଷର ଆକ୍ରମଣରେ ପ୍ରାୟ ୧୩୭ ଜଣ ସୈନ୍ୟ ଓ ସାଧାରଣ ଲୋକ ପ୍ରାଣ ହରାଇଛନ୍ତି । ଏପରିକି ୩୧୬ ଜଣ ଲୋକ ଆହତ ହୋଇଛନ୍ତି । ଆଉ ଏଭଳି ସ୍ଥିତିରେ ଋଷ ସହ ଲଢିବାକୁ ଆମକୁ ଏକଲା ଛାଡି ଦିଆଯାଇଛି । ୟୁକ୍ରେନର ସହାୟତା ପାଇଁ କୌଣସି ଦେଶ ଆଗକୁ ଆସିଲେ ନାହିଁ । କାରଣ ସବୁ ଦେଶ ଋଷକୁ ଡରୁଛନ୍ତି ।

ୟୁକ୍ରେନ୍ ରାଷ୍ଟ୍ରପତି ଜେଲେନସ୍କି କହିଛନ୍ତି, ଋଷର ଆକ୍ରମଣରେ ଆମ ଦେଶର ଯେତେଜଣ ବି ପ୍ରାଣ ହରାଇଛନ୍ତି ସମସ୍ତେ କୌଣସି ଯୋଦ୍ଧା ଠାରୁ ମଧ୍ୟ କମ ନୁହଁନ୍ତି । ଏହାଛଡା ଋଷର ଏଭଳି ଆଭିମୁଖ୍ୟ ସମ୍ପୂର୍ଣ୍ଣ ଭୁଲ । ଋଷ ପୂର୍ବରୁ କହିଥିଲା ଯେ, କେବଳ ସୈନ୍ୟ ଆଡ୍ଡା ଓ ସାମରିକ ଘାଟି ଉପରେ ଆକ୍ରମଣ କରିବ କିନ୍ତୁ ଜନଗହଳି ପୂର୍ଣ୍ଣ ସ୍ଥାନରେ ଋଷ ଏବେ ଆକ୍ରମଣ କରୁଛି । ଯାହା ଫଳରେ ୟୁକ୍ରେନ ଲୋକଙ୍କ ଜୀବନ ଯାଉଛି । ଓଡେସା ଦ୍ୱୀପକୁ ଋଷ କବଜା କରିଛି । ତେଣୁ ଋଷର ଆକ୍ରମଣରୁ ବର୍ତ୍ତିବାକୁ ୟୁକ୍ରେନ ଲୋକଙ୍କୁ ସତର୍କ କରିଛନ୍ତି ରାଷ୍ଟ୍ରପତି ଜେଲେନସ୍କି ।

ଏସବୁ ଭିତରେ ୟୁକ୍ରେନ ଅନ୍ୟ ଦେଶ ଠାରୁ ସହାୟତା ଲୋଡୁଥିବା ବେଳେ ଆମେରିକା ହାତ ଟେକି ଦେଇଛି । ଆମେରିକା ରାଷ୍ଟ୍ରପତି ଜୋ ବାଇଡେନ ସ୍ପଷ୍ଟ କରିଛନ୍ତି ଯେ, ୟୁକ୍ରେନକୁ ନିଜର ସେନା ପଠାଇବ ନାହିଁ ଆମେରିକା । ତେବେ ନାଟୋ ଦେଶର ପ୍ରତିଟି ଇଞ୍ଚ ଜାଗା ପାଇଁ ଆମେ ଲଢିବୁ । ଏହାସହ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ କୌଣସି ଆଲୋଚନା କରିବା ନେଇ ଯୋଜନା ନଥିବା ସ୍ପଷ୍ଟ କରିଛନ୍ତି ଜୋ ବାଇଡେନ । ଋଷ ଉପରେ ସମସ୍ତ ପ୍ରକାର କଟକଣା ଲଗାଇବାକୁ ଜି-୭ ରାଷ୍ଟ୍ର ନିଷ୍ପତ୍ତି ନେବୁ ।