ବ୍ରିଟେନ ନିର୍ବାଚନ, ଆଜି ଆସିବ ଫଳାଫଳ; ଏଗଜିଟ୍ ପୋଲରେ ପଛରେ ପଡ଼ିଲେ ରିଷି ସୁନକ, ବହୁମତ ଠାରୁ ଆଗରେ ଲେବର ପାର୍ଟି ।
କନକ ବ୍ୟୁରୋ: ବ୍ରିଟେନ ନିର୍ବାଚନରେ କିଏ ମାରିବ ବାଜି । ଆଜି ପ୍ରକାଶ ପାଇବ ଫଳାଫଳ । ଏଗଜିଟ୍ ପୋଲ ରିପୋର୍ଟରେ ଏବେର ବିରୋଧୀ ଦଳ ଲେବର ପାର୍ଟି ବହୁ ଆଗରେ ରହିଛି । ଗତକାଲି ହାଉସ ଅଫ୍ କମନସ ପାଇଁ ମତଦାନ ହୋଇଥିଲା । ୬୫୦ ଆସନ ପାଇଁ ୪୦ ହଜାରରୁ ଅଧିକ ବୁଥରେ ମତଦାନ ହୋଇଛି । ଏବେ ଭାରତର ଜ୍ବାଇଁ ତଥା କନଜରଭେଟିଭ୍ ପାର୍ଟିର ନେତା ଋଷି ସୁନକ ପ୍ରଧାନମନ୍ତ୍ରୀ ଅଛନ୍ତି । ଏଗଜିଟ୍ ପୋଲରେ ତାଙ୍କ ଦଳ ବହୁ ପଛରେ ରହିଛି । ଷ୍ଟାରମରଙ୍କ ନେତୃତ୍ବାଧୀନ ଲେବର ପାର୍ଟି ବହୁ ଆଗରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ପାଖାପାଖି ୪୧୦ ଆସନ ଲେବର ପାର୍ଟି ଏବଂ ୧୩୧ ଆସନ କଂଜରଭେଟିଭ୍ ପାର୍ଟି ପାଇବା ନେଇ ଆକଳନ କରାଯାଇଛି । ମୋଟ୍ ଭୋଟରଙ୍କ ମଧ୍ୟରେ ୨୫ ଲକ୍ଷ ପ୍ରବାସୀ ଭାରତୀୟ ରହିଛନ୍ତି । ଅନୁପ୍ରବେଶକାରୀଙ୍କୁ ରୋକିବାରେ ବିଫଳ, କରୋନାକୁ ସଠିକ ଭାବେ ପରିଚାଳନା ନକରିପାରିବା, ବ୍ରେକଜିଟ୍ ପାଇଁ ଘରୋଇ ବ୍ୟବସାୟୀ ପ୍ରଭାବିତ ହେବା ଭଳି କାରଣ ପାଇଁ ଭାରତର ଜ୍ବାଇଁ ସୁନକଙ୍କ ବିରୋଧରେ ଜନାଦେଶ ଯାଇଛି ବୋଲି କୁହାଯାଉଛି । ସୁନକ ପ୍ରଧାନମନ୍ତ୍ରୀ ହେବା ପରେ ଭାରତ ସହ ସମ୍ପର୍କ ମଜବୁତ ହୋଇଥିଲା । ମୁକ୍ତ ବାଣିଜ୍ୟଠୁ ଆରମ୍ଭ କରି ଅନେକ କ୍ଷେତ୍ରରେ ଭାରତ ସହ ସମ୍ପର୍କ ମଜବୁତ ହୋଇଛି । ହେଲେ ଏବେ କ୍ଷମତା ପରିବର୍ତ୍ତନ ହେଲେ ଦୁଇ ଦେଶ ମଧ୍ୟରେ ସମ୍ପର୍କ ପ୍ରଭାବିତ ହେବାର ଆଶଙ୍କା ରହିଛି ।