ବେଣୁ ମଉସାଙ୍କ ପାଇଁ ରଣାଙ୍ଗନରେ ଦୁଇ ରାନୀ । ମଉସାଙ୍କୁ ସାଇକେଲ ପଛରେ ବସାଇ ପ୍ରଚାର କଲେ ରାନୀ ପଣ୍ଡା । ସେପଟେ ମଉସାଙ୍କୁ ଟେକି ଟେକି ଭୋଟ୍ ମାଗିଲେ ଅଭିନେତ୍ରୀ ରାନୀ ସାହୁ ।
କନକ ବ୍ୟୁରୋ : ବେଣୁ ମଉସାଙ୍କ ନାଁରେ କମ୍ପୁଛି ବାଲେଶ୍ୱର ବ୍ୟାଟେଲଗ୍ରାଉଣ୍ଡ । ପ୍ରଚାର ମୈଦାନରେ ଦୁଇ ରାନୀ । ବେଣୁ ମଉସାଙ୍କ ପାଇଁ ବାହାରିଲେ ଦୁଇ ଅଭିନେତ୍ରୀ । ପ୍ରଥମେ ରାନୀ ପଣ୍ଡା ପ୍ରଚାର ପାଇଁ ଆସିଥିଲେ ଆଉ ଏବେ ମଉସାଙ୍କ ପାଇଁ ବାଲେଶ୍ୱର ମାଟିରେ ପାଦ ଥାପିଛନ୍ତି ଆଉ ଜଣେ ଅଭିନେତ୍ରୀ ରାନୀ ପ୍ରିୟଦର୍ଶିନୀ ସାହୁ । ଆଉ ଦୁଇ ରାନୀଙ୍କ ମାରାଥନ ପ୍ରଚାରରେ କମ୍ପୁଛି ବାଲେଶ୍ୱର ବ୍ୟାଟେଲଗ୍ରାଉଣ୍ଡ ।
Kanak News is now on WhatsApp
Join and get latest news updates delivered to you via WhatsApp
ମଉସାଙ୍କ ଚିହ୍ନ କେଟିଲି ଚିହ୍ନ, ବେଣୁ ମଉସା ଜିନ୍ଦାବାଦ, କେଟିଲି ଚିହ୍ନ ଜିନ୍ଦାବାଦ… କିଛି ଏଭଳି ନାରା ସହ ପ୍ରକମ୍ପିତ ହେଉଛି ବାଲେଶ୍ୱରର ପ୍ରଚାର ମୈଦାନ । ଯେତେବେଳେ ଅଭିନେତ୍ରୀ ରାନୀ ପଣ୍ଡା ଏବଂ ରାନୀ ପ୍ରିୟଦର୍ଶିନୀ ସାହୁ ସ୍ୱାଧୀନ ପ୍ରାର୍ଥୀ ବେଣୁଧର ବାରିକଙ୍କ ପାଇଁ ପ୍ରଚାର ମୈଦାନକୁ ଓହ୍ଲାଇଛନ୍ତି ।
ଗୋଟିଏ ପଟେ ବେଣୁ ମଉସାଙ୍କୁ ସାଇକେଲ ପଛରେ ବସାଇ ନିଆରା ଢଙ୍ଗରେ ପ୍ରଚାର କରିଛନ୍ତି ରାନୀ ପଣ୍ଡା । ତା ସହ ଘରକୁ ଘର ବୁଲି କେଟିଲି ଚିହ୍ନରେ ଭୋଟ ଦେବା ପାଇଁ ଭୋଟରଙ୍କୁ ସେ ଅନୁରୋଧ କରିଛନ୍ତି । ଆଉ ଅନ୍ୟପଟେ ଅଭିନେତ୍ରୀ ରାନୀ ପ୍ରିୟଦର୍ଶିନୀ ବେଣୁ ମଉସାଙ୍କୁ ଟେକି ଟେକି ତାଙ୍କ ସପକ୍ଷରେ ଭୋଟ୍ ପାଇଁ ପ୍ରଚାର କରୁଛନ୍ତି ।
ବାଲେଶ୍ୱର ବାଜି ଜିତିବାକୁ ବିଭିନ୍ନ ଦଳ ପକ୍ଷରୁ ପ୍ରଚାର ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି । କେହି ହେଭିୱେଟ ନେତା ପ୍ରଚାରକୁ ଆସିଲେ ଦାମିକିଆ ଗାଡି ସାଙ୍ଗକୁ ପୁଳା ପୁଳା ଫ୍ଲେକ୍ସରେ ଝଲସୁଛି ପ୍ରଚାର ମୈଦାନ । ଭୋଟରଙ୍କୁ ଆକୃଷ୍ଟ କରିବାକୁ ବିଭିନ୍ନ ପ୍ରକାରର ପ୍ରତିଶ୍ରୁତି ମଧ୍ୟ ଦିଆଯାଉଛି । ଲକ୍ଷାଧିକ ଟଙ୍କାର ପ୍ରଚାର ଭିତରେ ଏବେ କିନ୍ତୁ ବେଣୁ ମଉସାଙ୍କ ପ୍ରଚାର ଷ୍ଟ୍ରାଟେଜି ଉପରେ ରହିଛି ଭୋଟରଙ୍କର ନଜର ।
ସାଇକେଲଟିଏ ଧରି ପ୍ରଚାର କରୁଥିବା ବେଣୁ ମଉସା ଏବେ ଉପନିର୍ବାଚନ ମୈଦାନର ସେନସେସନ ପାଲଟିଯାଇଛନ୍ତି । ଆଣ୍ଠୁ ଉପରକୁ ପଡୁଥିବା ଧୋତି, ଭଙ୍ଗା ସାଇକେଲରେ ନିଜ କେଟିଲି ଚିହ୍ନର ପୋଷ୍ଟରଟିଏ ମାରି ପ୍ରଚାର ମୈଦାନକୁ ଓହ୍ଲାଇଉଛନ୍ତି ବେଣୁଧର । ଆଉ ଏବେ ବେଣୁଧରଙ୍କ ପାଇଁ ଷ୍ଟାର ପ୍ରଚାରକ ଭାବେ ପ୍ରଚାର କରିଛନ୍ତି ଅଭିନେତ୍ରୀ ରାନୀ ପଣ୍ଡା ଏବଂ ରାନୀ ପ୍ରିୟଦର୍ଶିନୀ । ତେବେ ବେଣୁଧର ବାଲେଶ୍ୱର ସଦରର ବାଜିଗର ହୁଅନ୍ତୁ କି ନାହିଁ, ଜଣେ ଗରିବୀର ଗର୍ବକୁ ଭାଙ୍ଗି କିଭଳି ଜୀବନ ଯୁଦ୍ଧରେ ଜିତିବେ, ତାର ଉଦାହରଣ ହେଉଛନ୍ତି ଏହି ୯୦ ବର୍ଷୀୟ ବୃଦ୍ଧ ବେଣୁ ମଉସା ।