ବଜେଟ ବଢୁଛି, ବଦଳୁନି ସ୍ୱାସ୍ଥ୍ୟସେବାର ଚିତ୍ର: କେବେ ବଦଳିବ ଉପାନ୍ତ ଅଂଚଳର ହସ୍ପିଟାଲ ଚିତ୍ର?
କନକ ବ୍ୟୁରୋ: ରାୟଗଡା କାଶୀପୁରରେ ବ୍ୟାପିଛି କଲେରା ମହାମାରୀ । ଗାଁରୁ ଗାଁ ବ୍ୟାପୁଥିବା ଏହି ମହମାରୀରେ ଅନେକ ଲୋକ ଆକ୍ରାନ୍ତ ହେଉଛନ୍ତି । କିନ୍ତୁ ଚିକିତ୍ସା ପାଇଁ ନାହିଁ ଆବଶ୍ୟକ ଭିତ୍ତିଭୂମି । ଉପାନ୍ତ ଅଂଚଳରେ ସରକାରୀ ଓ ଘରୋଇ ହସ୍ପିଟାଲର ଚିତ୍ର ଦେଖିଲେ ଅନୁମାନ କରିହେବ କିପରି ରହିଛି ସରକାରଙ୍କ ସ୍ୱାସ୍ଥ୍ୟବସ୍ଥା ।
Kanak News is now on WhatsApp
Join and get latest news updates delivered to you via WhatsApp
କାଶୀପୁର ଟିକିରିରେ ଥିବା ସରକାରୀ ହସ୍ପିଟାଲ ଅନ୍ୟଟି ଉକ୍ରଳ ଆଲୁମିନା କମ୍ପାନୀ ଦ୍ୱାରା ତିଆରି ହୋଇଥିବା ମଲଟି ସ୍ପେଶାଲିଟି ହସ୍ପିଟାଲ । ଦୁଇଟି ହସ୍ପିଟାଲକୁ ଦେଖିଲେ ଜାଣିହେବ କେମିତି ଚାଲିଛି ସରକାରୀ ଓ ଘରୋଇ ହସ୍ପିଟାଲର ଚିକିତ୍ସା ସେବା । ପ୍ରଥମେ ନଜର ପକାନ୍ତୁ ଟିକିରି ସ୍ୱାସ୍ଥ୍ୟକେନ୍ଦ୍ରର ବାହାର ଚିତ୍ର । ଯାହାକୁ ଦେଖି ଅନୁମାନ କରିହେଉଥିବା ହସ୍ପିଟାଲ ଭିତରର ଚିତ୍ର । ବେଡରେ ରୋଗୀ ଶୋଇଛନ୍ତି । ଆଉ ଉପରେ ଥିବା ଛାତରେ ଫାଟ ସୃଷ୍ଟି ହୋଇଛି । ଛାତରୁ ସିମେଂଟ ଖସି ଯାଇଛି, ରଡ୍ କଳଙ୍କି ଲାଗି ଦେଖାଯାଉଛି । ବର୍ଷାରେ ହେଲେ ଛାତରୁ ପାଣି ଖସୁଛି । ସ୍ଥିତି ଏମିତି ହୋଇଛି ଯେ ଅପେକ୍ଷା ଅଘଟଣକୁ । ସେହିପରି ହସ୍ପିଟାଲରେ ଗୋଟିଏ ଶୌଚାଳୟ ରହିଥିବା ବେଳେ ରୋଗୀଙ୍କ ସଂଖ୍ୟା ଅଧିକ ରହିଛି । ଅନ୍ୟପଟେ ଆକ୍ରାନ୍ତଙ୍କ ସଂଖ୍ୟା ଅଧିକ ଥିବାରୁ ଏବେ ହଠାତ ଅନେକ ଡାକ୍ତରଙ୍କୁ ଡେପୁଟେସନରେ ଆସିଥିବା ଜଣାପଡିଛି । ତେଣୁ ଅସ୍ୱାସ୍ଥ୍ୟକର ପରିବେଶ ଭିତରେ କିପରି ରୋଗୀ ସେବା ହେଉଥିବା ସ୍ପଷ୍ଟ ଅନୁମେୟ ।
କଲେରା ରୋଗୀଙ୍କ ପାଇଁ ସ୍ୱତନ୍ତ୍ର ହଇଜା ୱାର୍ଡ ରହିଛି । ୫୦ ରୋଗୀଙ୍କ ପାଇଁ ବେଡ୍ ବ୍ୟବସ୍ଥା ହୋଇଛି । ୧୩ ଜଣ ବିଶେଷଜ୍ଞ ଡାକ୍ତର ରହିଛନ୍ତି । ପ୍ରତିଟି ବେଡରେ ଅକ୍ସିଜେନ୍ ଲାଗିଛି । ସିଟି ସ୍କାନ, ଏକ୍ସରେ ଓ ମାଇକ୍ରୋ ବାୟୋଲୋଜି ଲ୍ୟାବ ମଧ୍ୟ ରହିଛି । କମ୍ପାନୀ ପରିଚାଳିତ ଏହି ହସ୍ପିଟାଲରେ ରୋଗୀଙ୍କୁ ଯୋଗାଇ ଦିଆଯାଉଛି ମାଗଣା ସ୍ୱାସ୍ଥ୍ୟସେବା ।
ଉତ୍ତମ ସ୍ୱାସ୍ଥ୍ୟସେବା ଯୋଗାଇ ଦେବା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି ସରକାର । ଚଳିତ ବଜେଟରେ ସ୍ୱାସ୍ଥ୍ୟକ୍ଷେତ୍ର ପାଇଁ ରାଜ୍ୟ ସରକାର ୧୨ହଜାର ୬୨୪ କୋଟି ଟଙ୍କା ବ୍ୟୟବରାଦ କରିଛନ୍ତି । ଯାହା ଗତବର୍ଷ ତୁଳନାରେ ୩୮ ପ୍ରତିଶତ ଅଧିକ । କାରଣ ୨୦୨୧ରେ ସ୍ୱାସ୍ଥ୍ୟ ବିଭାଗ ପାଇଁ ୯ହଜାର ୧୬୪ କୋଟି ଟଙ୍କା ବ୍ୟୟବରାଦ ହୋଇଥିଲା । କେବଳ ବିଜୁ ସ୍ୱାସ୍ଥ୍ୟ ପାଇଁ ଚଳିତ ବର୍ଷ ୨ହଜାର ୬୬୪ କୋଟି ଟଙ୍କା ବ୍ୟୟବରାଦ ହୋଇଛି । ମୁଖ୍ୟମନ୍ତ୍ରୀ ସ୍ୱାସ୍ଥ୍ୟସେବା ମିଶନ ପାଇଁ ୨ହଜାର ୩୨୫ କୋଟି ଟଙ୍କା ବ୍ୟୟବରାଦ କରାଯାଇଛି । ହେଲେ ରାୟଗଡ଼ା ଜିଲ୍ଲା ଟିକିରିରେ ଥିବା ଏହି ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର ଅବସ୍ଥାକୁ ଦେଖିଲେ ଲାଗୁଛି ଟଙ୍କା ବରାଦ ହେଉଛି ସତ, କିନ୍ତୁ ଲୋକଙ୍କ ପାଖରେ ସ୍ୱାସ୍ଥ୍ୟସେବା ପହଂଚୁଛି ତ?