କନକ ବ୍ୟୁରୋ : କାଳବୈଶାଖୀ ପ୍ରଭାବରେ ରାଜ୍ୟରେ ତାତିରୁ ମିଳିଛି ତ୍ରାହି । ଫଳରେ ଅଧିକାଂଶ ସ୍ଥାନରେ ତାପମାତ୍ରା ୩୦ ଡିଗ୍ରୀ ତଳେ ରହୁଥିବା ରେକର୍ଡ କରାଯାଇଛି । ଆଜି ପଶ୍ଚିମ ଓଡ଼ିଶାରେ ହାଲୁକା ବର୍ଷା ଦେଖିବାକୁ ମିଳିଛି । ନୂଆପଡ଼ା, ବଲାଙ୍ଗିର, ବରଗଡ଼ ଜିଲ୍ଲାର କିଛି ଅଞ୍ଚଳରେ ଘଡ଼ଘଡ଼ି ସହ ହାଲୁକା ବର୍ଷା ଲାଗି ରହିଛି । ଆହୁରି ଦସ୍ୱବ ଦିନ ଟ୍ୱିନ୍ ସିଟି ସହ ଉପକୂଳ ଓଡ଼ିଶାରେ ଏହିଭଳି ପାଗ ରହିବା ନେଇ ପାଣିପାଗ ବିଭାଗ ଆକଳନ କରିଛି । ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାର କିଛି ସ୍ଥାନରେ ବିଜୁଳି, ଘଡ଼ଘଡ଼ି ସହ ବର୍ଷା ସମ୍ଭାବନା ରହିଛି । ତେବେ ୧୧ ତାରିଖ ପରେ ପାଗରେ ଆସିବ ପରିବର୍ତନ । ତାପମାତ୍ରା ବଢ଼ିବା ସହ ପୁଣି ଅସହ୍ୟ ଗରମ ଅନୁଭୁତ ହେବା ନେଇ ଆକଳନ କରିଛି ପାଣିପାଗ ବିଜ୍ଞାନ କେନ୍ଦ୍ର ।

Advertisment

ବଜ୍ରପାତରେ ଗଲା ଦୁଇ ଜଣଙ୍କ ଜୀବନ । ମାଲକାନଗିରି ପେପରମେଟାଲ ଗାଁର ସୀତାରାମ ଓ ଆନ୍ଧ୍ର ପ୍ରଦେଶର ମୁଚିମପୁଟ ଥାନା ଅସରଗଡ଼ା ଗାଁର ପାଙ୍ଗି ସୁକଦେବଙ୍କ ମୃତ୍ୟୁ ହୋଇଛି । ରାସ୍ତାରେ ଛିଡା ହୋଇଥିବା ବେଳେ ହଠାତ୍ ବିଜୁଳି ଘଡ଼ଘଡ଼ି ମାରିଥିଲା । ସେମାନେ ଏକ ଗଛ ମୂଳରେ ଆଶ୍ରୟ ନେଇଥିବା ବେଳେ ବଜ୍ରପାତ ହେବାରୁ ଦୁଇ ଜଣଙ୍କ ମୃତ୍ୟୁ ହୋଇଛି । ସୀତାରାମ ଅସରଗଡ଼ା ଗାଁକୁ ବୁଲିବାକୁ ଯାଇଥିବା ବେଳେ ଏହି ଅଘଟଣ ଘଟିଛି ।

ଅସହ୍ୟ ତାତି ଓ ଗ୍ରୀଷ୍ମ ପ୍ରବାହରୁ ମାଲକାନଗିରି ବାସୀଙ୍କୁ ମିଳିଲା ଆଶ୍ୱସ୍ତି । ଗତ କିଛି ଦିନ ହେବ ମାଲକାନଗିରିରେ ରାଜ୍ୟର ସର୍ବୋଚ୍ଚ ତାପମାତ୍ରା ରେକର୍ଡ କରାଯାଉଥିଲା । ଗତକାଲ ରାତିରେ କାଳବୈଶାଖୀ ସାଙ୍ଗକୁ ପ୍ରବଳ ବର୍ଷା ହୋଇଥିଲା । ଫଳରେ ତାପମାତ୍ରା ହ୍ରାସ ପାଇଛି । ଯାହା ଦ୍ୱାରା ପ୍ରଚଣ୍ଡ ଖରା ଓ ତାତିରୁ ଆଶ୍ୱସ୍ତି ମିଳିଛି ।