ଆମେରିକୀୟ ନିୟମର ଦ୍ୱାହି ଦେଇ କେନ୍ଦ୍ରମନ୍ତ୍ରୀ ରବିଶଂକର ପ୍ରସାଦଙ୍କ ଆକାଉଣ୍ଟକୁ ୧ ଘଂଟା ବନ୍ଦ ରଖିଲା ଟ୍ୱିଟର ।

385

କନକ ବ୍ୟୁରୋ : କେନ୍ଦ୍ର ସରକାର ଓ ଟ୍ୱିଟର ମଧ୍ୟରେ ଚାଲିଥିବା ବିବାଦ ଆଉପାଦେ ଆଗକୁ ବଢିଛି । ଆଜି କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ରବିଶଂକର ପ୍ରସାଦଙ୍କ ଆକାଉଣ୍ଟକୁ ୧ ଘଂଟା ପାଇଁ ବନ୍ଦ କରିଦେଇଥିଲା ଟ୍ୱିଟର । ଏନେଇ ରବିଶଂକର ପ୍ରସାଦ କହିଛନ୍ତି କି ଟ୍ୱିଟର ପକ୍ଷରୁ ତାଙ୍କ ଆକାଉଣ୍ଟ ଏକ୍ସସେସ୍ କୁ ୧ ଘଂଟା ପାଇଁ ବନ୍ଦ ରଖାଯାଇଥିଲା । ଏ ନେଇ ଯାଂଚ କରିବା ପରେ ଟ୍ୱିଟର ପକ୍ଷରୁ କୁହାଯାଇଥିଲା କି ଆମେରିକୀୟ ଡିଜିଟାଲ ମିଲେନିୟମ କପିରାଇଟ୍ ଆକ୍ଟ (ଡିଏମସିଏ) ର ଉଲଙ୍ଘନ ଯୋଗୁଁ ତାଙ୍କ ଆକାଉଣ୍ଟ ବନ୍ଦ କରାଯାଇଥିଲା ।

ଆକାଉଣ୍ଟ ବନ୍ଦର କାରଣ ଦର୍ଶାଇବାକୁ ଯାଇ ଟ୍ୱିଟର ପକ୍ଷରୁ କୁହାଯାଇଥିଲା କି ରବିଶଂକରଙ୍କ ଆକାଉଣ୍ଟରେ ଏକ କଣ୍ଟେଣ୍ଟ ପୋଷ୍ଟିଂ କରାଯାଇଥିଲା । ଯାହାକି ଡିଜିଟାଲ ମିଲେନିୟମ କପିରାଇଟ୍ ନିୟମର ଉଲଙ୍ଘନ କରିଥିଲା । ଏହି କାରଣରୁ ତାଙ୍କ ଆକାଉଣ୍ଟ ବନ୍ଦ କରାଯାଇଥିଲା ।

ଟ୍ୱିଟର ପକ୍ଷରୁ କୁହାଯାଇଛି କି ‘ଆମେ କପିରାଇଟ୍ ନିୟମକୁ ମାନିବାକୁ ପ୍ରତିବଦ୍ଦ, ତେଣୁ ଯେଉଁ ଆକାଉଣ୍ଟ ବାରମ୍ବାର ଏହି ନିୟମର ଉଲଙ୍ଘନ କରିବ ସେହି ଆକାଉଣ୍ଟକୁ ସସ୍ପେଣ୍ଡ କରିଦିଆଯିବ’

୧ ଘଂଟା ପରେ ରବିଶଂକରଙ୍କ ଆକାଉଣ୍ଟ ଖୋଲିଥିଲା । ଏହାପରେ ଟ୍ୱିଟର ପକ୍ଷରୁ ତାଙ୍କୁ ସତର୍କ କରାଇ କୁହାଯାଇଛି କି ‘ଏବେ ଆପଣଙ୍କ ଆକାଉଣ୍ଟ ବ୍ୟବହାର ଯୋଗ୍ୟ, ମନେ ରଖନ୍ତୁ ଆଗକୁ ଯଦି ଆପଣଙ୍କ ପୋଷ୍ଟିଂ ଉପରେ ଡିଏମସିଏ ନୋଟିସ ଆସିବ ତେବେ ଆକାଉଣ୍ଟକୁ ସସ୍ପେଣ୍ଡ କରାଯାଇ ପାରେ !’

Comments are closed.