ପ୍ରହସନ ପାଲଟିଲା କଇଁଛ ସୁରକ୍ଷା । ଭୁବନେଶ୍ୱରରେ ମୁଖ୍ୟ ଶାସନ ସଚିବଙ୍କ ବୈଠକ ବେଳେ ମଝି ସମୁଦ୍ରରେ ଚାଲିଥିଲା ଡିଲ୍ ।

କନକ ବ୍ୟୁରୋ: ଅଲିଭ୍ ରିଡ୍ଲେ କଇଁଛଙ୍କ ସୁରକ୍ଷା ଓ ସଂରକ୍ଷଣ ପାଇଁ ଭୁବନେଶ୍ୱରରେ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିଥିଲା ବୈଠକ । ଆଉ ସେହିଦିନ ମଝି ସମୁଦ୍ରରେ ହୋଇଥିଲା ଡିଲ୍ । ଭିତରକନିକାରେ ଦୁଇଟି ଟ୍ରଲର ଜବତ ହୋଇଥିବା ବେଳେ ବନ ବିଭାଗ ପେଟ୍ରୋଲିଂ ଟିମ୍ ଗୋଟିଏକୁ ଧରି କୂଳକୁ ଆସିଥିଲେ । ଏହା ସହ ୧୦ ଜଣ ମତ୍ସ୍ୟଜୀବୀଙ୍କୁ ଗିରଫ କରାଯାଇଛି । ହେଲେ ଅନ୍ୟ ଏକ ଟ୍ରଲରକୁ ଫୋନ୍ କଲ ପାଇ ମଝି ସମୁଦ୍ରରେ ଛାଡି ଦେଇଥିବା ଅଭିଯୋଗ ହୋଇଛି । କାହା ଫୋନ୍ ପାଇ ପେଟ୍ରୋଲିଂ ଟିମ୍ ମଝି ସମୁଦ୍ରରେ ଜବତ ଟ୍ରଲରକୁ ଛାଡି ଦେଲେ ତାକୁ ନେଇ ଚର୍ଚ୍ଚା ଚାଲିଛି ।

କଇଁଛଙ୍କ ସୁରକ୍ଷା ପାଇଁ ସମୁଦ୍ର ଭିତରେ କଟକଣା ଜାରି କରାଯାଇଛି । ଏହି ସମୟରେ ଗହୀରମଥା ସାମୁଦ୍ରିକ ଅଭୟାରଣ୍ୟର ନିଷିଦ୍ଧାଞ୍ଚଳରେ ଏହି ଟ୍ରଲର ଜବତ ହୋଇଥିଲା । ଦୁଇଟି ଟ୍ରଲରକୁ ଜବତ ପରେ ଶାସନପଟା ଅଣାଯାଉଥିଲା । ଟ୍ରଲର ଜବତ ହେବାର ୩ ନଟିକାଲ ମାଇଲ ଅଣାଯିବା ପରେ ପାଟ୍ରୋଲିଂ ଟିମ୍କୁ ଫୋନ୍ ଆସିଥିଲା । ଫରେଷ୍ଟର ଏହି ଫୋନ୍ କଲ ପାଇବା ପରେ ମଝି ସମୁଦ୍ରରେ ପାରାଦୀପ ଅଂଚଳର ଜବତ ଟ୍ରଲରକୁ ଝାଡି ଦେଇଥିଲେ । ସାରଙ୍କ ଫୋନ୍ କଲ ପରେ ଗୋଟିଏ ଟ୍ରଲରକୁ ଛାଡି ଦେଇଥିବା ଫରେଷ୍ଟର ସ୍ୱୀକାର କରିଛନ୍ତି । ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଏଫଓ କହିଛନ୍ତି ।