କନକ ବ୍ୟୁରୋ : ରଥରୁ ଆଡପ ମଣ୍ଡପକୁ ଗଲେ ଚତୁର୍ଦ୍ଧାମୂର୍ତ୍ତି । ସୋମବାର ରଥାରୁଢ଼ ଶ୍ରୀଜିଉଙ୍କୁ ଗୁଣ୍ଡିଚା ମନ୍ଦିର ଆଡପ ମଣ୍ଡପକୁ ବିଜେ କରିଛନ୍ତି । ସୋମବାର ସନ୍ଧ୍ୟା ଧୂପ ସରିବା ପରେ ଘୋଡାଫିଟା, ଚାରମାଳ ବନ୍ଧା, ପୁଷ୍ପାଞ୍ଜଳି ହେବା ପରେ ମହାପ୍ରଭୁ ଗୋଟି ପହଣ୍ଡିରେ ଆଡପମଣ୍ଡପକୁ ବିଜେ କରିଛନ୍ତି । ପ୍ରଥମେ ସଂଧ୍ୟା ୬ଟା ବେଳେ ଶ୍ରୀସୁଦର୍ଶନଙ୍କ ପହଣ୍ଡି ଆରମ୍ଭ କରାଯାଇଛି। ଏହାପରେ ମା’ ସୁଭଦ୍ରା, ବଡ଼ଭାଇ ବଳଭଦ୍ର ଏବଂ ଶେଷରେ ମହାପ୍ରଭୁ ଜଗନ୍ନାଥଙ୍କର ପହଣ୍ଡି ଅନୁଷ୍ଠିତ ହେବ। ରାତି ୯ଟା ସୁଦ୍ଧା ଶ୍ରୀଜିଉମାନଙ୍କର ପହଣ୍ଡି ଶେଷ ହୋଇ ଆଡପ ମଣ୍ଡପ ବିଜେ ସମାପନ ହେବ। ମଙ୍ଗଳବାର ସକାଳେ ଶ୍ରୀଜିଉମାନଙ୍କର ବନକଲାଗି ନୀତି ଅନୁଷ୍ଠିତ ହେବ ତେଣୁ ସକାଳ ୮ଟାରୁ ନୀତି ଶେଷ ପର୍ୟ୍ୟନ୍ତ ଦର୍ଶନ ବନ୍ଦ ରିବ ବୋଲି ଜଣାପଡ଼ିଛି। ଆସନ୍ତାକାଲିଠାରୁ ବାହୁଡା ଯାତ୍ରା ପର୍ୟ୍ୟନ୍ତ ଚତୁର୍ଦ୍ଧା ମୂର୍ତ୍ତି ଗୁଣ୍ଡିଚା ମନ୍ଦିର ଜନ୍ମବେଦିରେ ରହିବେ। ସେଠାରେ ଭକ୍ତଙ୍କୁ ଦର୍ଶନ ଦେବେ। ମଙ୍ଗଳବାରଠାରୁ ଶ୍ରୀଗୁଣ୍ଡିଚା ମନ୍ଦିରରେ ଆଡପ ଅବଢା ବାହାରିବ। ଭକ୍ତମାନେ ଶ୍ରୀଗୁଣ୍ଡିଚା ମନ୍ଦିରରେ ଅବଢା ପାଇପାରିବେ।
Kanak News is now on WhatsApp
Join and get latest news updates delivered to you via WhatsApp
ରଥଯାତ୍ରା ଦିନ ସିଂହଦ୍ଵାରରୁ ଚତୁର୍ଦ୍ଧା ମୂର୍ତ୍ତିଙ୍କୁ ଧରି ବାହାରିଥିବା ତିନି ରଥ ମଧ୍ୟରୁ ବଡ ଠାକୁରଙ୍କ ତାଳଧ୍ୱଜ, ମା ସୁଭଦ୍ରାଙ୍କ ଦର୍ପଦଳନ ରଥ ଶରଧାବାଲିରେ ଲାଗିଥିବା ବେଳେ ନନ୍ଦିଘୋଷ ରଥ ଅଟକି ରହିଥିଲେ। ଶନିବାର ରାତିସାରା ତିନି ରଥରେ ଭକ୍ତଙ୍କ ଗହଳି ଲାଗି ରହିଥିଲା। ରବିବାର ସକାଳେ ମଙ୍ଗଳଆଳତି ସରିବା ପରେ ପୂର୍ବାହ୍ନ ୯ଟା୫ରେ ନନ୍ଦିଘୋଷ ରଥ ଟଣା ଆରମ୍ଭ ହୋଇଥିଲା। ହଜାର ହଜାର ଶ୍ରଦ୍ଧାଳୁ ଓ ପୁଲିସ ନନ୍ଦିଘୋଷ ରଥକୁ ଟାଣି ନେଇଥିଲେ। ମାତ୍ର ୩୫ ମିନିଟ ଭିତରେ ରଥ ଶରଧାବାଲିରେ ଲାଗିଥିଲା। ଶରଧାବାଲିରେ ରବିବାର ମହାପ୍ରଭୁଙ୍କ ସମସ୍ତ ଦୈନନ୍ଦିନ ନୀତି ସଂପନ୍ନ ହୋଇଥିଲା। ପ୍ରବଳ ବର୍ଷା ଯୋଗୁ ବଡଦାଣ୍ଡରେ ପାଣି ଜମି ରହିଥିବାରୁ ନଳା-ବର୍ଷା ପାଣି ଏକାକାର ହୋଇ ଯାଇଥିଲା। ଆବର୍ଜନା ପାଣିରେ ପଶି ଭକ୍ତମାନେ ମହାପ୍ରଭୁଙ୍କୁ ଦର୍ଶନ କରିବାକୁ ଯାଉଥିବା ଦେଖିବାକୁ ମିଳିଥିଲା।