କନକ ବ୍ୟୁରୋ: ସୁନ୍ଦରଗଡ଼ରେ ଗର୍ଜିଲେ ଆଦିବାସୀ । କହିଲେ ଜୀବନ ଦେବୁ ପଛେ ଜମି ଦେବୁ ନାହିଁ । ରାଜଗାଙ୍ଗପୁର ସ୍ଥିତ ଡ଼ାଲମିଆ ଭାରତ ସିମେଂଟ ଓ ଓସିଏଲ କମ୍ପାନୀର ଲାଂଜିବେର୍ଣ୍ଣା ଚୁନ ପଥର ଖଣି ସମ୍ପ୍ରସାରଣ ପାଇଁ ଜମି ଅଧିଗ୍ରହଣ ପ୍ରକ୍ରିୟାକୁ ବିରୋଧ କରି ହଜାର ହଜାର ସ୍ଥାନୀୟ ଆଦିବାସୀ ଏକାଠି ହୋଇଛନ୍ତି । ହଜାର ହଜାର ଆଦିବାସୀ ଏକାଠି ହୋଇ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାଜଗାଙ୍ଗପୁର ବିଧାୟକ ସିଏସ ରାଜେନ ଏକ୍କା ଏବଂ ପୂର୍ବତନ ବିଧାୟକ ତଥା ଆଦିବାସୀ ନେତା ଜର୍ଜ ତିର୍କୀଙ୍କ ନେତୃତ୍ୱରେ ଆଦିବାସୀ ମାନେ ବିରୋଧ ପ୍ରଦର୍ଶନ କରିଛନ୍ତି । ଓସିଏଲ ଚୁନ ପଥର ଖଣି ପାଇଁ ରାଜଗାଙ୍ଗପୁର ବ୍ଲକର କୁକୁଡ଼ା, ଅଲଣ୍ଡା, କେଶ୍ରାମାଲ ଏବଂ ଝଗରପୁର ପଂଚାୟତର ଜମି ଅଧିଗ୍ରହଣ ପାଇଁ ପ୍ରକ୍ରିୟା ଆରମ୍ଭ ହୋଇଛି । ତେବେ ଆରମ୍ଭରୁ ଏହାକୁ ବିରୋଧ କରୁଛନ୍ତି ସ୍ଥାନୀୟ ଲୋକେ ।
ଗତ ଅଗଷ୍ଟ ୨୩ ଏବଂ ୨୫ ତାରିଖ ଜନ ଶୁଣାଣିକୁ ପ୍ରବଳ ବିରୋଧ କରିଥିଲେ ସ୍ଥାନୀୟ ଲୋକେ । ତଥାପି ଜିଲ୍ଲା ପ୍ରଶାସନ ଜମି ଅଧିଗ୍ରହଣ ପ୍ରକ୍ରିୟାକୁ ଜେନ ତେନ ପ୍ରକାରେଣ କରିବା ଉଦ୍ଦେଶ୍ୟରେ ଗୋଟିଏ ଗୋଟିଏ ପଦକ୍ଷେପ ଗ୍ରହଣ କରିଚାଲିଛନ୍ତି । ଏହାକୁ ବିରୋଧ କରି ଆଜି ଏଭଳି ବିରୋଧ ପ୍ରଦର୍ଶନ କରିଛନ୍ତି ସ୍ଥାନୀୟ ଆଦିବାସୀ । ପ୍ରଶାସନ ବେଆଇନ ଭାବେ ଜମି ଅଧିଗ୍ରହଣ କରିବା ପାଇଁ ଚେଷ୍ଟା କରୁଥିବା ବେଳେ କୌଣସି ଅବସ୍ଥାରେ ଜମି ଦେବୁ ନାହିଁ ବୋଲି କହିଛନ୍ତି ଆନ୍ଦୋଳନକାରୀ ।