କନକ ବ୍ୟୁରୋ: ଏ ଦୃଶ୍ୟକୁ ଦେଖୁଛନ୍ତି ତ ? ସବୁଜ ପାହାଡ, ନୀଳ ଆକାଶ ଆଉ ପାହାଡର ପାଦଦେଶରେ ପାଠଶାଳା । ଆଗରେ ଡେଙ୍ଗା ଡେଙ୍ଗା ଗଛ, ଘାସର ମଖମଲ ଗାଲିଚା । ଲାଗୁଛି ଯେମିତି ଏହା ସ୍କୁଲ ନୁହେଁ ବରଂ କେଉଁ ସହରର ସବୁଜ ପାର୍କ । ହଁ, ଆଜ୍ଞା ପାର୍କ ଭଳି ଦିଶୁଛି ସତ କିନ୍ତୁ ଏହା ହେଉଛି ଦୁର୍ଗମ ଅଞ୍ଚଳର ସବୁଠୁ ଆକର୍ଷଣୀୟ ସ୍କୁଲ । ଯାହାକୁ ନିଜ ହାତରେ ତିଆରି କରିଛନ୍ତି ସ୍କୁଲର ପ୍ରଧାନ ଶିକ୍ଷକ । ଏଠି ଘାସଠୁ ଗଛ, ମାଟିଠୁ ପାଣି ସବୁଥିରେ ଲାଗିଛି ଶିକ୍ଷକମାନଙ୍କର ପରିଶ୍ରମ ।
Kanak News is now on WhatsApp
Join and get latest news updates delivered to you via WhatsApp
କୋରାପୁଟ ଜିଲ୍ଲା ବନ୍ଧୁଗାଁ ବ୍ଲକ ଆଲମଣ୍ଡା ସରକାରୀ ସ୍କୁଲର ପରିବେଶ ଏବେ ସମସ୍ତଙ୍କୁ ମନମୁଗ୍ଧ କରୁଥିବା ବେଳେ ସ୍କୁଲର ପ୍ରଧାନଶିକ୍ଷକ ଘରଦ୍ୱାର ଭୁଲି ଉକ୍ତ ଅଞ୍ଚଳକୁ ସୌନ୍ଦର୍ଯ୍ୟକରଣ କରିବାରେ ନିଜକୁ ବ୍ୟସ୍ତ ରଖିଛନ୍ତି । ଦିନେ କି ଦୁଇ ଦିନ ନୁହେଁ ଦୀର୍ଘ ୨୦ ବର୍ଷ ହେବ ପ୍ରକୃତି, ପରିବେଶ ପ୍ରତି ନିଜକୁ ସମର୍ପି ଦେଇଛନ୍ତି । ଏମିତି କି ପରିବେଶ ପ୍ରେମରେ ପଡି ନିଜ ଘର ଗଞ୍ଜାମକୁ ବି ସେ ଛୁଟି ଦିନ ମାନଙ୍କରେ ନଆସି । ସେହି ସ୍କୁଲର ରକ୍ଷଣାବେକ୍ଷଣ କାମରେ ଲାଗିଥାନ୍ତି ।
ଖାଲି ସ୍କୁଲକୁ ସୁନ୍ଦର କରିବା ନୁହେଁ ବରଂ ଜଙ୍ଗଲ ସୃଷ୍ଟି କରିବାରେ ବି ସେ ସିଦ୍ଧହସ୍ତ । ପେଶା ଶିକ୍ଷକ ହେଲେ ନିଶା ତାଙ୍କର ଜଙ୍ଗଲ ସୃଷ୍ଟି କରିବା । ପ୍ରତିବର୍ଷ ଭିନ୍ନ ଭିନ୍ନ କିସମର ୨ ହଜାରରୁ ୪ ହଜାର ଚାରା ନିଜେ ପ୍ରସ୍ତୁତ କରନ୍ତି । ଆଉ ସେସବୁକୁ ବିଭିନ୍ନ ସ୍ଥାନରେ ଲଗାନ୍ତି । ଖାଲି ସ୍ଥାନ ହେଉ କି ଖାଲି ପଡିଆ ବୃକ୍ଷରୋପଣରେ ନିଜକୁ ବ୍ରତି ରଖିଥିବା ରାଜେନ୍ଦ୍ର ସାର ଜଙ୍ଗଲ ସୁରକ୍ଷାର ସଙ୍କଳ୍ପ ନେଇଛନ୍ତି ।
ବର୍ଷା ଦିନ ଆସିଲେ ରାଜେନ୍ଦ୍ର ସାର ଆରମ୍ଭ କରନ୍ତି ବୃକ୍ଷରୋପଣ ଅଭିଯାନ । ଯେଉଁଥିରେ ତାଙ୍କୁ ସହଯୋଗ କରନ୍ତି ଛାତ୍ରଛାତ୍ରୀ ଓ ସ୍ଥାନୀୟ ଲୋକ । ସ୍ଥାନୀୟ ଲୋକଙ୍କୁ ମାଗଣାରେ ବୃକ୍ଷଦାନ କରି ପରିବେଶ ପ୍ରତି ସଚେତନ କରାନ୍ତି । ତେବେ ରାଜେନ୍ଦ୍ର ସାରଙ୍କ ଏହି ନିଆରା ଉଦ୍ୟମ ଓ ପ୍ରକୃତି ପ୍ରେମ ପାଇଁ ତାଙ୍କୁ ୨୦୦୯ରେ ଜଙ୍ଗଲ ବିଭାଗ ପକ୍ଷରୁ ପ୍ରକୃତି ମିତ୍ର ପୁରସ୍କାର ମିଳିଥିବା ବେଳେ ୨୦୧୧ରେ ମୁଖ୍ୟମନ୍ତ୍ରୀଙ୍କ ପାଖରୁ ମିଳିଛି ପ୍ରକୃତି ବନ୍ଧୁ ପୁରସ୍କାର । ତେବେ ରାଜେନ୍ଦ୍ର ସାରଙ୍କ ଏ ପ୍ରୟାସ ସମ୍ବାଦ ଡିଜିଟାଲର ପୁନଶ୍ଚ ପୃଥିବୀ ଅଭିଯାନକୁ ସଫଳ କରିବାରେ ସହାୟ ହେବ ନିଶ୍ଚୟ । ତେଣୁ ଆସନ୍ତୁ ଜୀବନ ପାଇଁ ଲଗାଇବା ଗଛ, ପରିବେଶର ନେବା ଯତ୍ନ ।