କେନ୍ଦ୍ର ସରକାରଙ୍କ ନୂଆ ଗାଇଡ ଲାଇନ, ଚୀନ, ଆମେରିକା ସମେତ ୧୦ ଟି ଦେଶରୁ ଭାରତ ଆସୁଥିବା ଯାତ୍ରୀଙ୍କ ପାଇଁ ଆରଟି-ପିସିଆର ନେଗେଟିଭ ରିପୋର୍ଟ ବାଧ୍ୟତା ମୂଳକ
କନକ ବ୍ୟୁରୋ : ଭାରତ ଆସୁଥିବା ୧୦ ଟି ଦେଶର ଯାତ୍ରୀମାନଙ୍କ ପାଇଁ ଆରଟି-ପିସିଆର ନେଗେଟିଭ ରିପୋର୍ଟ ବାଧ୍ୟତାମୂଳକ କରିଛନ୍ତି କେନ୍ଦ୍ର ସରକାର । ଏହି ଦେଶମାନଙ୍କ ତାଲିକାରେ ରହିଛି ଚୀନ, ବ୍ରିଟେନ ଓ ଦକ୍ଷିଣ ଆଫ୍ରିକା । ଦେଶରେ ଜାରି ରହିଥିବା କରୋନା ମହାମାରୀକୁ ନେଇ ଅର୍ନ୍ତରାଷ୍ଟ୍ରୀୟ ଗାଇଡ ଲାଇନର ପରିବର୍ତ୍ତନ କରାଯାଇଛି । ଏହି କ୍ରମରେ ୧୦ ଟି ଦେଶର ନାଗରିକ ଭାରତ ଆସୁଥିଲେ ସେମାନଙ୍କୁ ଆରଟି-ପିସିଆର ନେଗେଟିଭ ରିପୋର୍ଟ ଦେଖାଇବାକୁ ପଡିବ । ଏହି ରିପୋର୍ଟ ୭୨ ଘଂଟା ପୂର୍ବର ହୋଇଥିବା ଆବଶ୍ୟକ । ଆରଟିପିସିଆର ରିପୋର୍ଟ ନେଗେଟିଭ ଥିଲେ ବି ସେମାନେ ଭାରତର କୌଣସି ବିମାନବନ୍ଦରରେ ପହଂଚିବା ପରେ ସେମାନଙ୍କର କୋଭିଡ ଟେଷ୍ଟ କରାଯିବ । ଏହି ନିୟମ ପ୍ରଥମେ ୟୁକେ, ୟୁରୋପ ଓ ମଧ୍ୟପୂର୍ବ ଦେଶମାନଙ୍କ ପାଇଁ ଲାଗୁ ହୋଇଥିବା ବେଳେ ଏବେ ଏହି ତାଲିକାରେ ଆଉ ୭ ଟି ଦେଶକୁ ଯୋଡା ଯାଇଛି । ସେମାନଙ୍କ ମଧ୍ୟରେ ଦକ୍ଷିଣ ଆଫ୍ରିକା, ବାଂଲାଦେଶ, ବୋସବେନା, ଚୀନ, ମରିଶସ, ନ୍ୟୁଜିଲାଣ୍ଡ, ଓ ଜିମ୍ବାୱେ ରହିଛି । ଏହି ନିୟମ ଲାଗୁ କରିବାକୁ କେନ୍ଦ୍ର ସ୍ୱାସ୍ଥ୍ୟ ସଚିବ ସବୁ ରାଜ୍ୟକୁ ଚିଠି ଲେଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଏବେ ଭାରତ ସମେତ ଅନେକ ଦେଶରେ କରୋନା ସଂକ୍ରମଣର ହାର ସମ୍ପୂର୍ଣ୍ଣ କମ୍ ହୋଇ ନାହିଁ । ଦୈନିକ ସଂକ୍ରମଣ କେତେବେଳେ କମୁଛି ତ କେତେବେଳେ ବଢୁଛି । ସବୁଠାରୁ ବଡକଥା କି ପ୍ରଥମ ଲହର ତୁଳନାରେ ଦ୍ୱିତୀୟ ଲହରରେ ଶିଶୁମାନେ ଅଧିକ ସଂକ୍ରମିତ ହେଉଛନ୍ତି । କିଛି ସପ୍ତାହ ମଧ୍ୟରେ ବ୍ରିଟେନରେ ଶିଶୁମାନଙ୍କୁ କରୋନା ସଂକ୍ରମଣ ଅଧିକ ହେଉଥିବା କୁହାଯାଇଛି । ଏହାକୁ ନଜରରେ ରଖି କେନ୍ଦ୍ର ସରକାର ଏଭଳି ନିଷ୍ପତ୍ତି ନେଇଥିବା ଜଣାପଡିଛି ।