୬ ମାସର କଂଟ ପରେ ଆକ୍ସନ ମୋଡରେ ଟ୍ରାଫିକ ପୋଲିସ । ଆଇନ ଖିଲାପକାରୀଙ୍କୁ ଗୋଡ଼ାଇ ଗୋଡ଼ାଇ କାଟିଲେ ଚାଲାଣ, ନିୟମ ଉଲ୍ଲଂଘନକାରୀ ଦେଖାଇଲେ ନାଲି ଆଖି ।
କନକ ବ୍ୟୁରୋ : ପୁଣି ରାଜରାସ୍ତା ଉପରେ ଆକ୍ସନ ମୋଡରେ ପୋଲିସ ଓ ପରିବହନ ଅଧିକାରୀ । ଯିଏ ଟ୍ରାଫିକ ନିୟମ ଭାଂଗିଲା, ଗୋଡାଇ ଗୋଡାଇ ମୋଟା ଅଙ୍କର ଚାଲାଣ କଟାଯାଉଛି । ବିଚରା ଜନତା ଆଗରେ ଆଉ କିଛି ଉପାୟ ବି ନାହିଁ । କିଏ ୫ ହଜାର ତ ଆଉ କିଏ ୧୦ ହଜାର ଫାଇନ୍ ଦେଇ, କାନମୁଣ୍ଡା ଆଉଁସି ଘରକୁ ଫେରିଛି । ଆଉ ତାଭିତରେ କେହି କେହି ପୋଲିସକୁ ନାଲିଆଖି ଦେଖାଇବାକୁ ପଛାଇନାହାନ୍ତି ।
Kanak News is now on WhatsApp
Join and get latest news updates delivered to you via WhatsApp
କ୍ୟାମେରାରେ ରେକର୍ଡ ହୋଇଥିବା ଏକ ଦୃଶ୍ୟରେ, ରାଉରକେଲାରେ ଜଣେ ମହିଳା, ପୋଲିସକୁ କହୁଛନ୍ତି ଆଗ ରାସ୍ତାର ଖାଲଖମା ମରାମତି କରନ୍ତୁ, ପରେ ଫାଇନ୍ କାଟିବେ । ଭୁବନେଶ୍ୱରରେ ଜଣେ ମହିଳା ପୋଲିସକୁ କହିଛନ୍ତି, ରାସ୍ତା ଉପରେ ସାଇନବୋର୍ଡ ଲଗାଯାଉ, କେଉଁଟା ରଙ୍ଗରୁଟ୍ ଏବଂ କେଉଁଟା ଠିକ୍ ରୁଟ୍ । ତେବେ ପୋଲିସ ଓ ପରିବହନ ଅଧିକାରୀ ବିଶେଷ ଗଣ୍ଡଗୋଳ ନକରି ଏବଂ ଗାଡି ନଅଟକାଇ ଚାଲାଣ କାଟି ଛାଡିଦେଇଛନ୍ତି ।
ଗାଡି ଚେକିଂ ଆରମ୍ଭ ହେଲା ଆଉ ତାସହ ଆରମ୍ଭ ହୋଇଗଲା ପ୍ରତିବାଦ । ନୂଆ ମୋଟର ଯାନ ଆଇନରେ ମୋଟା ଅଙ୍କର ଫାଇନକୁ ନେଇ ବିଚ୍ ରାସ୍ତାରେ ତୁମ୍ବିତୋଫାନ । ଯୁକ୍ତିତର୍କ, ପାଟିତୁଣ୍ଡ ଆଉ ତାପରେ ଉତେଜନା । ରଙ୍ଗରୁଟରେ ଗାଡି ଚଲାଉଥିବା ମହିଳାଙ୍କୁ ଧରିଥିଲା ପୋଲିସ । ଆଉ ମହିଳାଙ୍କ ଯୁକ୍ତି ଥିଲା, ରାସ୍ତାରେ ନୋ ଡ୍ରାଇଭ ସାଇନ୍ ବୋର୍ଡ ନମାରି କାହିଁକି ଫାଇନ୍ କାଟୁଛି ପୋଲିସ ।
ସମାନ ଦୃଶ୍ୟ ଦେଖିବାକୁ ମିଳିଥିଲା ରାଉରକେଲାରେ । ଗାଡି ଚଳାଇବା ବେଳେ ମହିଳା ସିଟ୍ ବେଲ୍ଟ ବାନ୍ଧିନଥିଲେ । ଆଉ ପୋଲିସ ଯେତେବେଳେ ଚାଲାଣ କାଟିବାକୁ କହିଥିଲା, ମହିଳା ଯୁକ୍ତି କରିଥିଲେ ଯେ, ପ୍ରଥମେ ରାସ୍ତାର ଖାଲଖମା ମରାମତି କରାଯାଉ, ତାପରେ ସେ ଫାଇନ ଦେବେ ।
ସେପଟେ ରାୟଗଡାରେ ଟ୍ରକକୁ ଲକ୍ଷେ ୧୦ ହଜାରର ଫାଇନ୍ । ରାଜଧାନୀରେ ବାଇକ ଚାଳକଙ୍କୁ ୧୦ ହଜାର ଜୋରିମାନା । ନୂଆ ମୋଟର ଯାନ ଆଇନ୍ ଲାଗୁ ହେବାର ପ୍ରଥମ ଦିନରେ କଡାକଡି ହୋଇଛି ଯାଂଚ୍ । ରାୟଗଡାରେ ନିୟମ ଉଲ୍ଲଂଘନ ପାଇଁ ଟ୍ରକ୍ ଉପରେ ଲାଗିଛି ମୋଟା ଅଙ୍କର ଫାଇନ୍ । ରୋଡ୍ ଟାକ୍ସ ଓ ପରମିଟ୍ ନଥିବାରୁ ୧ ଲକ୍ଷ ୧୦ ହଜାର ୮ ଶହ ଟଙ୍କାର ଚାଲାଣ କାଟିଛନ୍ତି, ପରିବହନ ଅଧିକାରୀ ।
ସେହିପରି ଟ୍ରାଫିକ ଚେକିଂ ବେଳେ ଧରାପଡିଥିଲେ ଅନେକ ବେପରୁଆ ବାଇକ୍ ଚାଳକ । କିଏ ହେଲମେଟ୍ ପିନ୍ଧିନଥିଲେ ତ ଆଉ କିଏ ରଙ୍ଗରୁଟରେ ଗାଡି ଚଲାଉଥିଲେ । ଲାଇସେନ୍ସ ଓ ମୋବାଇଲରେ କଥା ହୋଇ ଗାଡି ଚଳାଇବା ପାଇଁ ବାଇକ ଚାଳକଙ୍କୁ ଲାଗିଛି ୧୦ ହଜାର ଟଙ୍କା ଫାଇନ୍ ।
ରାସ୍ତାରେ ଓଭରଲୋଡିଂ କରି ବୁହା ଚାଲିଥିବା ଗାଡିକୁ ବି ଜବତ କରିଛନ୍ତି ପରିବହନ ବିଭାଗ ଅଧିକାରୀ । ଏଥିସହ ରାସ୍ତା ଉପରେ ବେଆଇନ୍ ପାର୍କିଂ କରିଥିବା ଗାଡିକୁ ଉଠାଇନେଇଛି ପୋଲିସ । ପ୍ରଥମ ଦିନର ପ୍ରଥମ ପର୍ଯ୍ୟାୟରେ କେବଳ ଆରଟିଓ -ଟୁ ଅଂଚଳରେ ଅଢ଼େଇ ଲକ୍ଷ ଟଙ୍କାର ଫାଇନ ଆଦାୟ ହୋଇଛି । ତେବେ ଅନେକ ଚାଳକ ସଚେତନ ହୋଇଥିବା ଦେଖିବାକୁ ମିଳୁଛି ।