ରାଜଧାନୀରେ ଆମ୍ବୁଲାନ୍ସ ପାଇଁ ବାଟ ନାହିଁ । ହୁଗୁଳା ଟ୍ରାଫିକ୍ ବ୍ୟବସ୍ଥା ଯୋଗୁଁ ଜନଗହଳି ପୂର୍ଣ୍ଣ ରାସ୍ତାରେ ଛନ୍ଦି ହେଉଛି ଜରୁରୀକାଳୀନ ଗାଡ଼ି, ୫ବର୍ଷିୟ କୁନି ପିଲାର ମୃତ୍ୟୁ ପରେ ଭୁବନେଶ୍ୱରରେ ସ୍ଥିତି ପରଖିଲା କନକ ନ୍ୟୁଜ୍
କନକ ବ୍ୟୁରୋ : ଭୁବନେଶ୍ୱରରେ ଭିଡ ଭିତରେ ଫଶିଗଲା ଆମ୍ବୁଲାନ୍ସ । ଚାଲିଗଲା ଜଣେ ୫ ବର୍ଷର ଶିଶୁର ଜୀବନ । ଘଟଣାକୁ ନେଇ ଚାରିଆଡେ ତୁମ୍ବିତୋଫାନ ଚାଲିଥିବା ବେଳେ ଟ୍ରାଫିକ ଡିସିପି ଟ୍ୱିଟ୍ କରି ଲୋକଙ୍କୁ ଅନୁରୋଧ କରିଛନ୍ତି ଯେ, ଭିଡ ଭିତରେ ଆମ୍ବୁଲାନ୍ସକୁ ରାସ୍ତା ଛାଡିଦିଆଯାଉ । ଏଥିସହ ଭୁବନେଶ୍ୱରବାସୀଙ୍କ ଆଗରେ ସେ ରଖିଛନ୍ତି ଜାପାନ ମଡେଲ୍ । ଏସବୁ ଭିତରେ ରାଜଧାନୀର ବିଭିନ୍ନ ଛକରେ କେମିତି ରହିଛି ଟ୍ରାଫିକ୍ ଭିଡ ସମସ୍ୟା ଏବଂ ଲୋକେ ଆମ୍ବୁଲାନ୍ସ ପ୍ରତି କେତେ ସଚେତନ, ସେନେଇ ରିଆଲିଟି ଚେକ୍ କରିଛି କନକ ନ୍ୟୁଜ୍ ।
Kanak News is now on WhatsApp
Join and get latest news updates delivered to you via WhatsApp
ମଙ୍ଗଳବାର ଦିନ ପ୍ରାୟ ୧୦ଟା । ନାଲକୋ ଛକ, ଭୁବନେଶ୍ୱର । ଭିଡ ଭିତରେ ଫସିଗଲା ଆମ୍ବୁଲାନ୍ସ । ଆଗରେ ଶହ ଶହ ଗାଡି । ଭିତରେ ଯନ୍ତ୍ରଣାରେ ଛଟପଟ ହେଉଥାଏ ୫ ବର୍ଷର ଶିଶୁ । ଘନ ଘନ ସାଇରନ୍ ଦେଉଥିଲା ଆମ୍ବୁଲାନ୍ସ । ତଥାପି କେହି ବାଟ ଛାଡିନଥିଲେ । ପୁଅକୁ ହସପିଟାଲ ନେଇ ଯାଉଥିବା ବାପା ରାସ୍ତା ମଝିରେ ସମସ୍ତଙ୍କୁ ନେହୁରା ହୋଇଥିଲେ, ରାସ୍ତା ଛାଡିଦେବା ପାଇଁ । ହେଲେ କେହି ରାସ୍ତା ଛାଡିବା ମାନସିକତାରେ ନଥିଲେ । ଟ୍ରାଫିକର ସବୁଜ ସଙ୍କେତ ମିଳିବା ପରେ ଆଗକୁ ବଢିଥିଲା ଆମ୍ବୁଲାନ୍ସ । ତେବେ ପୁଣି ଫସିଯାଇଥିଲା ଟ୍ରାଫିକ ଭିଡ ଭିତରେ । ମେଡିକାଲରେ ସମୟରେ ପହଂଚିନପାରି, ଅଧା ବାଟରେ ଚାଲିଗଲା ଶିଶୁର ଜୀବନ ।
My heartfelt condolences to the family which lost it’s kin. Request road users to please give way to ambulances, someone’s life depends on it.
Steps:
Hear siren▶️move to right most lane▶️stop for a while▶️let ambulance overtake you
Sharing one from Japan:https://t.co/cHIO7UVuTo— Sagarika IPS (@sagarika_nath) February 11, 2020
ସକାଳେ ଟ୍ରାଫିକ ଭିଡ ଜଣେ ୫ ବର୍ଷର ଶିଶୁର ଜୀବନ ନେଇଗଲା । ସନ୍ଧ୍ୟାରେ ଭୁବନେଶ୍ୱର ଡିସିପି ସାଗରିକା ନାଥ ଟ୍ୱିଟ୍ କରି ଗାଡି ଚାଳକ ଓ ରାସ୍ତାରେ ଯାଉଥିବା ସମସ୍ତ ଯାତ୍ରୀଙ୍କୁ ଅନୁରୋଧ କରିଥିଲେ ଯେ, ଆମ୍ବୁଲାନ୍ସକୁ ରାସ୍ତା ଛାଡିଦିଆଯାଉ । କାହାର ଜୀବନ ଏହି ଭିଡ ଉପରେ ନିର୍ଭର କରୁଛି ବୋଲି ଟ୍ୱିଟ୍ କରିଥିଲେ ଟ୍ରାଫିକ୍ ଡିସିପି । ଖାଲି ଟ୍ୱିଟ କରିନଥିଲେ ବରଂ ଏଥିସହ ଜାପାନର ଗୋଟିଏ ଭିଡିଓ ସେୟାର କରିଥିଲେ । ଯେଉଁଥିରେ ଗୋଟିଏ ଆମ୍ବୁଲାନ୍ସକୁ ବାଟ ଛାଡିଦେବା ପାଇଁ ଶହ ଶହ ଗାଡି ସାଇଡ ହୋଇଯାଇଥିଲେ ତାହା ଦେଖିବାକୁ ମିଳିଥିଲା । ତେଣୁ ଭୁବନେଶ୍ୱରବାସୀ ମଧ୍ୟ ଏଭଳି ଆମ୍ବୁଲାନ୍ସକୁ ଛାଡିବାକୁ ସେ ଅନୁରୋଧ କରିଥିଲେ ।
ଶୁକ୍ରବାର ସକାଳ ପ୍ରାୟ ୧୧ଟା । ଖଣ୍ଡଗିରି ଛକ । ଭୁବନେଶ୍ୱର ଅନ୍ୟ ଏକ ବ୍ୟସ୍ତବହୁଳ ରାସ୍ତା । ଆଉ ଏହି ରାସ୍ତାର ଭିଡ ଭିତର ଦେଇ ଯାଉଛି ଆମ୍ବୁଲାନ୍ସ । ସାଇରନ୍ ଦିଆଯାଉଛି , ତଥାପି କେହି ରାସ୍ତା ଛାଡୁନାହାଁନ୍ତି । ସେହି ସମାନ ଦୃଶ୍ୟ ଦିନ ୧୨ଟାରେ ମଧ୍ୟ ଖଣ୍ଡଗିରି ଛକରେ ଦେଖିବାକୁ ମିଳିଥିଲା । ରାସ୍ତା ଉପରେ ଖଚାଖଚ ଭିଡ । ଶହ ଶହ ଗାଡି ଯାଉଛି । ଆଉ ଏହା ଭିତରେ ଆଗକୁ ବଢୁଛି ଆମ୍ବୁଲାନ୍ସ । ତଥାପି କେହି ରାସ୍ତା ଛାଡିବାକୁ ନାରାଜ । ଗତକାଲି ଟ୍ରାଫିକ ଜାମ ଯୋଗୁଁ ଜଣେ ଛୋଟ ଛୁଆର ପ୍ରାଣ ଯାଇଥିବା ବେଳେ ଆଜି ସକାଳେ ମଧ୍ୟ ଟ୍ରାଫିକ ଜାମ୍ ପାଇଁ ଖଣ୍ଡଗିରି ଛକରେ ଫସିଥିଲା ଆମ୍ବୁଲାନ୍ସ । ଭୁବନେଶ୍ୱର ଏମ୍ସକୁ ଯାଉଥିଲା ଆମ୍ବୁଲାନ୍ସ । ହେଲେ , ଖଣ୍ଡଗିରି ଛକରେ ଫସିଗଲା । ଭିତରେ ରୋଗୀ ଛଟପଟ ହେଉଥିଲେ । ବାରମ୍ବାର ସାଇରନ୍ ଦେଉଥିଲା ଆମ୍ବୁଲାନ୍ସ । ତଥାପି କେହି ରାସ୍ତା ଛାଡିନଥିଲେ ।
ଏହାରି ଭିତରେ ରାଜଧାନୀ ଭୁବନେଶ୍ୱରର ଟ୍ରାଫିକ ବ୍ୟବସ୍ଥା ଓ ଭିଡ ନେଇ ଏୟାରପୋର୍ଟରୁ ନନ୍ଦନକାନନ ଯାଏ ରାସ୍ତାରେ ରିଆଲିଟି ଚେକ୍ କରିଥିଲା କନକ ନ୍ୟୁଜ୍ । ରାଜଧାନୀବାସୀ କିଭଳି ଟ୍ରାଫିକ ନିୟମକୁ ମାନୁଛନ୍ତି ଓ ଆମ୍ବୁଲାନ୍ସକୁ ନେଇ କେତେ ସଚେତନ ତାହା ଦେଖିବାକୁ ମିଳିଥିଲା । ଟ୍ରାଫିକ ପୋଷ୍ଟରେ ରାସ୍ତାର ବାମ ପାଶ୍ୱର୍ ଲେନକୁ ଗାଡି ଚାଳକ ସମ୍ବୂର୍ଣ୍ଣ ଭାବେ କବଜାକୁ ନେଇ ଯାଉଥିବା ବେଳେ ମନଇଚ୍ଛା ଗାଡି ପୂରାଉଥିଲେ । ଏଭଳି ସ୍ଥିତିରେ ଆମ୍ବୁଲାନ୍ସ ଆଗକୁ ବଢିବା ଅର୍ଥ ମୃତ୍ୟୁର ଚକ୍ରବ୍ୟୁହ ଭିତରକୁ ପଶିବା । କେବଳ ଏତିକି ନୁହେଁ ଟ୍ରାଫିକ ଜାମ୍ ଏତେ ସଙ୍ଗୀନ ଯେ ମଧ୍ୟାହ୍ନ ସମୟରେ ବିମାନବନ୍ଦରରୁ ନନ୍ଦନକାନନରେ ପହଞ୍ଚିବାକୁ ଆମ ଟିମକୁ ପ୍ରାୟ ୫୨ ମିନିଟ୍ ସମୟ ଲାଗିଥିଲା ।