ମନ ଜିତିନେଲେ ଟ୍ରାଫିକ୍ ପୋଲିସ । ଦୃଷ୍ଟିହୀନ ଦମ୍ପତିଙ୍କ ହାତ ଧରି ରାସ୍ତା ପାର କରାଇଲେ ଟ୍ରାଫିକ୍ ହାବିଲଦାର ଲଳିତ, ଚାରିଆଡୁ ଛୁଟିଲା ପ୍ରଂଶସାର ସୁଅ ।
କନକ ବ୍ୟୁରୋ : ମନ ଜିତିନେଲେ ଟ୍ରାଫିକ ପୋଲିସ । ସେପ୍ଟେମ୍ବର ୧ରୁ ନୂଆ ମୋଟରଯାନ ଆଇନ ଲାଗୁ ହେବା ପରେ ବେଶ ସକ୍ରିୟ ହୋଇ ଉଠିଛନ୍ତି ଟ୍ରାଫିକ୍ ପୋଲିସ । କେବଳ ଯେ ଟ୍ରାଫିକ୍ ନିୟମ ଉଲ୍ଲଂଘନକାରୀଙ୍କ ଠାରୁ ଜରିମାନା ଆଦାୟ କରୁଛନ୍ତି ତାହା ନୁହେଁ ବରଂ ସାଧାରଣ ଲୋକଙ୍କୁ ସହାୟତାର ହାତ ବଢାଇବାକୁ ମଧ୍ୟ ପଛାଉ ନାହାନ୍ତି । କମିଶନରେଟ ପୋଲିସର We Care We Dare ନାରା କେବଳ ଯେ ସ୍ଲୋଗାନରେ ସୀମିତ ରହିଛି ତାହା ନୁହେଁ ବରଂ ଏହାର ଝଲକ ସିଲଭର ସିଟି କଟକରେ ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଆଜି କଟକର ବ୍ୟସ୍ତବହୁଳ ଶିଖରପୁର ଛକରେ ଟ୍ରାଫିକ ହାବିଲଦାର ଲଲିତ ମୋହନ ରାଉତଙ୍କୁ ଏକ ଭିନ୍ନ ଅନ୍ଦାଜରେ ଦେଖିବାକୁ ମିଳିଥିଲା । ରାସ୍ତା ଉପରେ ଦ୍ରୁତ ଗତିରେ ଆଗକୁ ଗାଡି ମାଡି ଚାଲୁଥିବା ବେଳେ ରାସ୍ତା ପାର ହେବାକୁ ଅପେକ୍ଷା କରି ରହିଥିଲେ ଦୃ୍ଷ୍ଟିହୀନ ଦମ୍ପତି । କିନ୍ତୁ ଭୟରେ ଆଗକୁ ବଢୁନଥିଲା ପାଦ । ଏତିକିବେଳେ ଦୃଷ୍ଟିହୀନ ଦମ୍ପତିଙ୍କ ଉପରେ ଟ୍ରାଫିକ ହାବିଲଦାର ଲଲିତଙ୍କ ନଜର ପଡିଥିଲା । ଦୃଷ୍ଟିହୀନ ଦମ୍ପତିଙ୍କ ସାଥୀ ହୋଇ ରାସ୍ତା ପାର କରାଇଦେବାକୁ ସହାୟତାର ହାତ ବଢାଇଥିଲେ ଲଳିତ । ଆଉ ଦୃଷ୍ଟିହୀନ ଦମ୍ପତିଙ୍କ ହାତ ଧରି ରାସ୍ତା ପାର କରାଇ ଦେଇଥିଲେ । ଯେଉଁଥିପାଇଁ ଏବେ ଲଲିତଙ୍କୁ ଚାରିଆଡୁ ପ୍ରଂଶସା କରାଯାଉଛି ।
ସାଧାରଣତଃ ପୋଲିସକୁ ନେଇ ଲୋକଙ୍କ ମନରେ ଏକ ଭିନ୍ନ ଧାରଣା ଥାଏ । ଆଉ ଏହି ଧାରଣା ଯୋଗୁଁ ସବୁବେଳେ ଲୋକ ପୋଲିସ ଠାରୁ ଦୁଇପାଦ ଦୂରରେ ରହିବାକୁ ଚାହିଁଥାନ୍ତି । ହେଲେ ଏହି ଧାରଣାକୁ ସମ୍ପୂର୍ଣ୍ଣ ଭୂଲ ପ୍ରମାଣିତ କରି ଦେଇଛନ୍ତି ଟ୍ରାଫିକ ହାବିଲଦାର ଲଲିତ । ଲଲିତଙ୍କ ଏହି ଉଦ୍ୟମ ଯେ, କେବଳ ଟ୍ରାଫିକ ପୋଲିସ ପ୍ରତି ଥିବା ଧାରଣାକୁ ବଦଳାଇବାରେ ସକ୍ଷମ ହୋଇନାହିଁ ବରଂ ସାଧାରଣ ଲୋକର ବିଶ୍ୱାସଭାଜନ ହେବାରେ ସଫଳ ହୋଇଛି । ଆଶା କରିବା କେବଳ ରାଜଧାନୀ କାହିଁକି ସାରା ରାଜ୍ୟର ପୋଲିସ ଓ ଟ୍ରାଫିକ କର୍ମଚାରୀ ମାନେ ସାଧାରଣ ଲୋକଙ୍କ ସହାୟତା ପାଇଁ ନିଜ ଆଡୁ ହାତ ବଢାଇବେ ।