କନକ ବ୍ୟୁରୋ : ରାଜଧାନୀର ରାଜରାସ୍ତାରେ ଟ୍ରାଫିକ୍ ପୋଲିସ-ସାମ୍ବାଦିକ ଖଣ୍ଡଯୁଦ୍ଧ । ବିଚ୍ ରାସ୍ତାରେ ହାତାହାତି ହେଲେ ଦାୟିତ୍ୱରେ ଥିବା ଟ୍ରାଫିକ ପୁଲିସ ଓ ସାମ୍ବାଦିକ । ଆଜି ଭୁବନେଶ୍ୱର ଏଜି ଛକରେ ଦେଖିବାକୁ ମିଳିଛି ଏଭଳି ଅଭାବନୀୟ ଦୃଶ୍ୟ । ଜିରୋ ଟଲରାନ୍ସ କୁହାଯାଉଥିବା ତଥା ଭୁବନେଶ୍ୱରର ସବୁଠାରୁ ବ୍ୟସ୍ତବହୁଳ ଛକରେ ଏଭଳି ଘଟଣା ଘଟିଛି । ଆଉ ଏହି ଘଟଣାର ସମ୍ପୂର୍ଣ୍ଣ ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଆଜି ଏଜି ଛକରେ ପ୍ରିଣ୍ଟ ମିଡିଆର ଜଣେ ସାମ୍ବାଦିକ ଅନ୍ୟ ଜଣେ ମହିଳା ସାମ୍ବାଦିକଙ୍କ ସହ ସ୍କୁଟିରେ ଯାଉଥିବା ବେଳେ ଟ୍ରାଫିକ ପୋଷ୍ଟରେ ଅଟକିଥିଲେ । କିଛି ଗାଡି ଜେବ୍ରା କ୍ରସିଂ ପାର କରିଯାଇଥିବା ବେଳେ ସାମ୍ବାଦିକଙ୍କ ଗାଡି ମଧ୍ୟ ଜେବ୍ରା କ୍ରସିଂ ପାର କରି ଟ୍ରାଫିକ ପୋଷ୍ଟ ସାମ୍ନାରେ ରହିଥିଲା । ସାମ୍ବାଦିକ ଜଣକ ହେଲମେଟ ପିନ୍ଧି ନଥିଲେ । ଯାହା ଟ୍ରାଫିକ୍ ନିୟମକୁ ଉଲ୍ଲଘଂନ କରୁଥିଲା । ତେଣୁ ସାମ୍ବାଦିକଙ୍କ ଗାଡି ଅଟକାଇଥିଲେ କାଯ୍ୟରତ ଟ୍ରାଫିକ ପୋଲିସ ।
ଟ୍ରାଫିକ ପୋଲିସ ସାମ୍ବାଦିକଙ୍କ ଗାଡି ଅଟକାଇବା ସହ ତାଙ୍କ ଗାଡିରୁ ଚାବି କାଢି ନେଇଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ କିଛି ସମୟ ଯୁକିତର୍କ ହୋଇଥିଲା । ଆଉ ଏହାପରେ ବିଗିଡି ଯାଇଥିଲା ପୂୂରା ପରିସ୍ଥିତି । ଟ୍ରାଫିକ୍ ପୋଲିସ ଚାଲାଣ କାଟିବା ପରିବର୍ତ୍ତେ ସାମ୍ବାଦିକଙ୍କ ଉପରକୁ ସିଧା ହାତ ଉଠାଇ ଦେଇଥିଲେ । ଆଉ ଏହାପରେ ଆରମ୍ଭ ହୋଇଥିଲା ଖଣ୍ଡଯୁଦ୍ଧ । କେହି କିଛି ବୁଝିବା ଅବସ୍ଥାରେ ନଥିଲେ । ବେଶ କିଛି ସମୟ ଧରି ଏଭଳି ପରିସ୍ଥିତି ଦେଖିବାକୁ ମିଳିଥିଲା । ଟ୍ରାଫିକ କର୍ମଚାରୀ ଟ୍ରାଫିକ ପରିଚାଳନା ନ କରି ମଜ୍ଜି ଯାଇଥିଲେ ଲଢେଇରେ । ଆଉ ସାମ୍ବାଦିକ ଓ ଟ୍ରାଫିକ ପୋଲିସ ଲଢେଇର ସମ୍ପୂର୍ଣ୍ଣ ଦୃଶ୍ୟକୁ କଏଦ କରିଥିଲା ସିସିଟିଭି । ପରେ ପୋଲିସ ପହଞ୍ଚି ଉଭୟଙ୍କୁ ବୁଝାସୁଝା କରିବା ପରେ ପରିସ୍ଥିିତି ଶାନ୍ତ ପଡିଥିଲା ।
କାର୍ଯ୍ୟରତ ସାମ୍ବାଦିକଙ୍କୁ ଟ୍ରାଫିକ ପୋଲିସ ମାଡ ମାରିଥିବାରୁ ଏହାର ପ୍ରତିବାଦରେ ରାସ୍ତାରୋକ କରିଥିଲେ ସାମ୍ବାଦିକ । କିଛି ସମୟ ପାଇଁ ଟ୍ରାଫିକ ସମସ୍ୟା ଦେଖା ଦେଇଥିଲା । ପରେ ଡିସିପି ପହଞ୍ଚି ସାମ୍ବାଦିକଙ୍କ ବୁଝାସୁଝା କରିବା ପରେ ଆନ୍ଦୋଳନରୁ ହଟିଥିଲେ ସାମ୍ବାଦିକ । ଏଠି ପ୍ରଶ୍ନ ଉଠୁଛି ଯଦି ସାମ୍ବାଦିକ ଜଣକ ଟ୍ରାଫିକ ନିୟମ ଉଲ୍ଲଂଘନ କରିଥିଲେ ତେବେ ଟ୍ରାଫିକ ପୋଲିସ ତାଙ୍କୁ ମାଡ ମାରିବା କେତେଦୂର ଯୁକ୍ତିଯୁକ୍ତ ।