ପର୍ଯ୍ୟଟନ ଋତୁରେ ଭିତରକନିକାରେ ପର୍ଯ୍ୟଟକଙ୍କ ଭିଡ । ପ୍ରାକୃତିକ ସୌନ୍ଦର୍ଯ୍ୟ ସହ ୪୭ ବର୍ଷିୟ ପ୍ରସିଦ୍ଧ କୁମ୍ଭୀର ଗୋରୀ’କୁ ଦେଖିବାକୁ ଲାଗୁଛି ଗହଳି
କନକ ବ୍ୟୁରୋ : ପର୍ଯ୍ୟଟନ ଋତୁରେ ପ୍ରକୃତିର ଗନ୍ତାଘର, ଶରୀସୃପଙ୍କ ଅଦ୍ୱିତୀୟ ଭୂସ୍ୱର୍ଗ କୁହାଯାଉଥିବା ଭିତରକନିକା ଜାତୀୟ ଉଦ୍ୟାନରେ ପର୍ଯ୍ୟଟକଙ୍କ ଭିଡ ଲାଗିଛି । ଦୀର୍ଘ ୮ମାସ ଧରି ବନ୍ଦ ରହିବା ପରେ କୋଭିଡ କଟକଣା ଭିତରେ ଖୋଲିଛି ଭିତରକନିକା । ପର୍ଯ୍ୟଟକମାନେ ଜାତୀୟ ଉଦ୍ୟାନର ପ୍ରାକୃିତ ସୌନ୍ଦଯ୍ୟର ମଜା ଉଠାନ୍ତି । ବୁଲାବୁଲି ଭିତରେ ଭିତରକନିତା ଆବଦ୍ଧ ପୋଖରୀରେ ନିଃସଙ୍ଗ ଜୀବନ ବିତାଉ ଥିବା ଶଙ୍ଖୁଆ କୁମ୍ଭୀର ଗୋରୀ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଛି । ଗୋରୀକୁ ଦେଖିବା ସହ ଗୋରୀ ଓ ତା ବନ୍ଧୁ ଯଶବନ୍ତଙ୍କୁ ସଂପର୍କକୁ ନେଇ ଆଶ୍ଚଯ୍ୟ ହୁଅନ୍ତି ପର୍ଯ୍ୟଟକ ।
Kanak News is now on WhatsApp
Join and get latest news updates delivered to you via WhatsApp
ମଣିଷ ଡାକିବ, କୁମ୍ଭୀର ଶୁଣିବ! ଶୁଣିବ କ’ଣ ଶୁଣୁଛି, ପାଖକୁ ଆସି ଖାଦ୍ୟ ଖାଉଛି, ଆଉ ପର୍ଯ୍ୟଟକଙ୍କ ମନ ଜିଣୁଛି । ଭିତରକନିକାର କୁମ୍ଭୀର ଗୋରୀ-ମଣିଷର ସଂପର୍କ ଦେଖି ପର୍ଯ୍ୟଟକ ଆଶ୍ଚଯ୍ୟ ହେଉଛନ୍ତି । ୪୭ ବର୍ଷ ହେବ ଭିତରକନିକାର ଏକ ଆବଦ୍ଧ ପୋଖରୀରେ ଏକାକି ରୁହେ ଧଳା ବଉଳା କୁମ୍ଭୀର ଗୋରୀ । ଆବଦ୍ଧ ପୋଖରୀରେ ଲୁଚି ରହିଥିବା ଶଙ୍ଖୁଆ କୁମ୍ଭୀର ଗୋରୀଙ୍କୁ ଦେଖିବା ପାଇଁ ଯେତେବେଳେ ପର୍ଯ୍ୟଟକମାନେ ଚାହାନ୍ତି, ସେତେବେଳେ ଗୋରୀର ବନ୍ଧୁ ଯଶୋବନ୍ତଙ୍କ ଖୋଜାପଡେ । ଯଶୋବନ୍ଦ ପୋଖରୀ ପାଖରେ ଗୋରୀକୁ ଡାକନ୍ତି, ତାଙ୍କ ଡାକ ଶୁଣି ଗୋରୀ ପାଣିରୁ ପଦାକୁ ଆସେ, ଆଉ ଯଶୋବନ୍ତଙ୍କ ଠାରୁ ଖାଦ୍ୟ ଖାଇ ପର୍ଯ୍ୟଟକଙ୍କୁ ଦେଖା କରି ପୁଣି ପାଣି ଭିତରକୁ ଚାଲିଯାଏ ।
ଅଷ୍ଟ୍ରେଲିଆର ବିଶିଷ୍ଟ ପ୍ରାଣୀ ବୈଜ୍ଞାନିକ ଡଃ. ଏଚ୍.ଆର୍.ବଷ୍ଟାର୍ଡ ଭିତରକନିକାରେ କୁତ୍ରିମ ଉପାୟରେ ବଉଳା କୁମ୍ଭୀରମାନଙ୍କ ବଂଶବିସ୍ତାର ପାଇଁ ପଦକ୍ଷେପ ନେଇଥିଲେ । କାଳିଭଂଜଡିଆ ଦ୍ୱୀପରୁ ୨୫ଟି ଅଣ୍ଡା ସଂଗ୍ରହ କରିଥିଲେ । କୃତ୍ରିମ ଉପାୟରେ ୪୫ଦିନ ପରେ ସେଥିରୁ ୧୧ଟି କୁମ୍ଭୀର ଶାବକ ଜନ୍ମ ନେଇଥିଲେ । ସେମାନଙ୍କ ମଧ୍ୟରେ ଥିଲା ଶଙ୍ଖ ଭଳି ଧଳା ଦେଖାଯାଉଥିବା ଗୋଟିଏ ମାଇ କୁମ୍ଭୀର । ଯାହାର ନାମ ରଖାଯାଇଛି ଗୋରୀ । ଆଉ ସେବେଠାରୁ ଗୋରୀର ଅଭିଭାବକ ଭାବେ ଦାୟୀତ୍ୱ ତୁଲାଉଛନ୍ତି ବନରକ୍ଷୀ ଯଶୋବନ୍ତ ବେହେରା ।
ଯୁଗ ଯୁଗ ଧରି ଖାଦ୍ୟ ଓ ଖାଦକର ସଂପର୍କ ରହି ଆସୁଥିବା ବେଳେ ଯଶୋବନ୍ତ ଓ ଗୋରୀର ସଂପର୍କ କିନ୍ତୁ ନିଆରା । ଦୀର୍ଘ ୪୭ ବର୍ଷ ଭିତରେ ଗୋରୀ ଜୀବନରେ ଅନେକ ବନ କର୍ମଚାରୀ ଆସିଛନ୍ତି । କିନ୍ତୁ ବନରକ୍ଷୀ ଯଶୋବନ୍ତଙ୍କ ସହ ଗୋରୀର ସଂପର୍କକୁ ଦେଖି ଚକିତ ହୁଅନ୍ତି ପର୍ଯ୍ୟଟକ ।