କାଳିଆ ଟଙ୍କାକୁ ନେଇ ପୁଣି ତେଜିଲା ରାଜନୈତିକ କଳି : ବିରୋଧୀ କହିଲେ ପଂଚାୟତ ଓ ପିପିଲି ଉପନିର୍ବାଚନକୁ ଦେଖି ଚାଷୀଙ୍କ ଖାତାକୁ ଟଙ୍କା ପଠାଇଛନ୍ତି ସରକାର
ବିଜେଡି କହିଲା, କାଳିଆ ଟଙ୍କାକୁ ନିର୍ବାଚନ ସହ ଯୋଡିବା ଅନୁଚିତ
କନକ ବ୍ୟୁରୋ : କାଳିଆ ଟଙ୍କାରୁ ନେଇ ପୁଣି ତେଜିଲା ରାଜନୈତିକ କଳି । ଗତକାଲି ଉତ୍କଳ ଦିବସରେ ରାଜ୍ୟ ସରକାର ୩୪ ଲକ୍ଷ ଚାଷୀଙ୍କ ଖାତାକୁ ସିଧାସଳଖ କାଳିଆ ଟଙ୍କା ପଠାଇଛନ୍ତି । ନୂଆ ଆର୍ଥିକ ବର୍ଷରେ ରବି ଋତୁ ପାଇଁ ସରକାର ୬୯୪ କୋଟି ଟଙ୍କା ଦେଇଛନ୍ତି । ପ୍ରତି ଚାଷୀଙ୍କ ଆକାଂଉଟକୁ ୨ ହଜାର ଟଙ୍କା ଲେଖାଏଁ ଯାଇଛି । କାର୍ଯ୍ୟକ୍ରମକୁ ଆରମ୍ଭ କରି ମୁଖ୍ୟମନ୍ତ୍ରୀ କହିଥିଲେ, ନୂଆ ଆର୍ଥିକ ବର୍ଷ ଆରମ୍ଭ ହୋଇଛି । ଗାନ୍ଧୀ ଓ ଗୋପବନ୍ଧୁଙ୍କୁ ଶ୍ରଦ୍ଧାଞ୍ଜଳି ଜଣାଇବା ପରେ ଚାଷୀଙ୍କ କଲ୍ୟାଣ କାର୍ଯ୍ୟକ୍ରମ ଆରମ୍ଭ କରାଯାଇଛି । ଚାଷୀ ଆମ ଅର୍ଥନୀତିର ମହାଶକ୍ତି । ତେଣୁ ଚାଷୀଙ୍କୁ ଅଣଦେଖା କରି ବିକାଶ କଥା ଚିନ୍ତା କରାଯାଇନପାରେ ।
Kanak News is now on WhatsApp
Join and get latest news updates delivered to you via WhatsApp
ହେଲେ ଏହାକୁ ନିର୍ବାଚନୀ ଭେଟି ବୋଲି କହଗିଛନ୍ତି ବିରୋଧୀ ବିଜେପି ଓ କଂଗ୍ରେସ । ବିଜେପି କହିଛି ଆଗକୁ ପଂଚାୟତ ନିର୍ବାଚନ ଥିବାରୁ ୨ ବର୍ଷ ବନ୍ଦ ଥିବା କାଳିଆ ଟଙ୍କା ପୁଣି ଦିଆଯାଇଛି । ସେହିପରି ପିପିଲି ପାଇଁ କାଳିଆ ଟଙ୍କା ଘୋଷଣା କରାଯାଇ ନାହିଁ । ନିର୍ବାଚନ ପରେ ଏହା ଦିଆଯିବ ବୋଲି କୁହାଯାଇଛି । କିନ୍ତୁ ବିଜେଡି ପ୍ରାର୍ଥୀ ଓ କର୍ମୀ ପିପିଲିରେ ଏନେଇ ଘରେ ଘରେ ପ୍ରଚାର କରିପାନ୍ତି ବୋଲି ବିଜେପି ସନ୍ଦେହ କରୁଛି ।
କଂଗ୍ରେସ ମଧ୍ୟ ସମାନ ଅଭିଯୋଗ ଆଣିଛି । ହେଲେ ବିଜେଡି କହିଛି ୨୦୧୯ ପୂର୍ବରୁ ମଧ୍ୟ ବିରୋଧୀ ସମାନ ଅଭିଯୋଗ କରୁଥିଲେ । ନିର୍ବାଚନ ପରେ ଟଙ୍କା ଦିଆଯିବ ନାହିଁ ବୋଲି ଅଭିଯୋଗ ବାଢୁଥିଲେ । ତେଣୁ କାଳିଆ ଟଙ୍କାକୁ ନିର୍ବାଚନ ଯୋଡି ଦେଖିବା ଉଚିତ ନୁହେଁ ବୋଲି କହିଛନ୍ତି ବିଜେଡି ବିଧାୟକ ଅମର ପ୍ରସାଦ ଶତପଥୀ ।