ଏମିତି ଏକ ମାଛ, ଯାହାର ରହିଛି ୫୫୫ ଦାନ୍ତ ! ପ୍ରତିଦିନ ଉଠିଥାଏ ୨୦ଟି ନୂଆ ଦାନ୍ତ ।
କନକ ବ୍ୟୁରୋ : ଗୋଟିଏ ମାଛର କେତୋଟି ଦାନ୍ତ ଥାଏ ? ଏମିତିରେ ତ ମଣିଷର ୩୨ଟି ଦାନ୍ତ ଥାଏ, ତେଣୁ ହୁଏତ ମାଛର ସେହି ପାଖାପାଖି ଦାନ୍ତ ଥାଇପାରେ ବୋଲି ଆପଣ ଅନୁମାନ କରୁଥିବେ । ହେଲେ ଏମିତି ବି ଗୋଟିଏ ମାଛ ଅଛି, ଯାହାର ୫୫୫ଟି ଦାନ୍ତ । ଆଉ ପ୍ରତ୍ୟେକ ଦିନ ତାର ୨୦ଟି ଦାନ୍ତ ଭାଙ୍ଗିଥାଏ ଓ ୨୦ଟି ନୂଆ ସୃଷ୍ଟି ହୋଇଥାଏ । ଆମ ଜୀବଜଗତ ବି ବଡ ବିଚିତ୍ର । ଏଠି ଆମେ ଅନେକ ବିଚିତ୍ର ଜୀବ ଦେଖିଥାଉ । ଗଭୀର ସମୁଦ୍ରରେ ଏମିତି ଅନେକ ପ୍ରାଣୀ ଅଛନ୍ତି ଯାହାଙ୍କର ଗଠନ ବିଚିତ୍ର ହେଇଥାଏ । ଏହି ଯେମିତି ଏ ମାଛକଥା ଦେଖିନିଅନ୍ତୁ ।
Kanak News is now on WhatsApp
Join and get latest news updates delivered to you via WhatsApp
ଏହି ମାଛର ମୁହଁ ଭିତରେ ଖାଲି ଦାନ୍ତ ରହିଛି, ଯେଉଁଥିପାଇଁ ଏହି ମାଛ ପାଇଁ ଶିକାର କରିବା ସହଜ ହୋଇଯାଏ । ଥରେ ଏହି ମାଛ ଆଁରେ ଶିକାର ଫଶିଗଲେ ଆଉ ସେ ବାହାରି ପାରେନି । ତେବେ ଚାଲନ୍ତୁ ଜାଣିବା ଏହି ମାଛର ଏତେ ଦାନ୍ତ କେମିତି, କେଉଁଠି ଏହି ମାଛ ଦେଖାଯାଏ ଓ ମଣିଷ ପାଇଁ ଏହା କ୍ଷତିକାରକ କି ନାହିଁ ।
ପ୍ୟାସିଫିକ ଲିଙ୍କଡ୍ । ଏହା ହେଉଛି ଦୁନିଆର ସବୁଠୁ ଅଧିକ ଦାନ୍ତ ଥିବା ଜୀବ । ଏହି ମାଛଟିର ପାଟି ଭିତର ହେଉଛି ମୃତ୍ୟୁର ଘର । ଥରେ ଶିକାର ଏହି ଆଁକୁ ଗଲେ ସେ ଛୋଟ ଛୋଟ ପିସରେ ପରିଣତ ହୋଇଯାଏ । କାରଣ ଏହି ମୁନିଆ ଦାନ୍ତ ଗୁଡିକ ସ୍ପ୍ରିଙ୍ଗ ଭଳି ଆକାରରେ ଏହି ମାଛର ମୁହଁରେ ରହିଥାନ୍ତି ଫଳରେ ତାକୁ ଶିକାର କରିବା ସହଜ ହୁଏ । ୱାଶିଂଟନ ବିଶ୍ୱବିଦ୍ୟାଳୟର ବୋୟୋଲୋଜି ବିଭାଗର ପ୍ରଫେସର ଏହି ପ୍ୟାସିଫିକ ଲିଙ୍କଡ୍ ଏହି ମାଛ ଉପରେ ଗବେଷଣା କରୁଛନ୍ତି । ସେ କହିଛନ୍ତି କି, ଏହି ମାଛର ମୁହଁ ଭିତରେ ଦାନ୍ତ ଗୁଡିକ ପୁରା ଭର୍ତ୍ତି ହୋଇରହିଛି । ଏହା ଏକ ଶିକାରି ମାଛ ଓ ଏହା ଉତ୍ତର-ପ୍ରଶାନ୍ତ ମହାସାଗରରେ ଦେଖିବାକୁ ମିଳେ । ଏହି ମାଛର ଲମ୍ବ ୨୦ ଇଞ୍ଚ୍ ଯାଏଁ ହୋଇଥାଏ ।
ତେବେ ଏହି ମାଛର ଦାନ୍ତ ଗୁଡିକର ଗଠନ କେମିତି ହେଇଥାଏ, କେମିତି ଏହା ଶିକାର କରେ ଏହି ତମାମ ପ୍ରଶ୍ନର ଉତ୍ତର ଖୋଜିବା ପାଇଁ ବୈଜ୍ଞାନିକ ମାନେ ଏହି ମାଛଟିକୁ ଧରିଥିଲେ ଆଉ ତାଉପରେ ଗବେଷଣା ଚଳାଇଥିଲେ । ଆଉ ପରୀକ୍ଷାରୁ ଜଣାପଡିଛି କି ଏହି ମାଛର ମୁହଁ ଭିତରେ ଛୋଟ ଛୋଟ ମୁନିଆ ଦାନ୍ତ ରହିଛି, ଯାହାକି ଏହାକୁ ଶିକାର କରିବାରେ ସହଯୋଗ କରିଥାଏ । ଏହାର ମୁହଁ ଭିତରର ପ୍ରଥମ ଦୁଇ ପରସ୍ତ ମାଢି ଓ ଦାନ୍ତ ଗୁଡିକ ବେଶ ମଜବୁତ ରହିଥାଏ, ଯାହାଫଳରେ ସେ ଶିକାର ଆରାମରେ କରିନିଏ । ହେଲେ ଭିତର ମାଢି ଗୁଡିକ ସୁକ୍ଷ୍ମ ହୋଇଥାଏ । ଏହାର ଦାନ୍ତ ଗୁଡିକ ଜଲଦି କ୍ଷୟ ବି ହୁଏନି । ତେଣୁ ସେ ଅଧିକ ଦିନ ଧରି ଶିକାର କରିବା ସହ ଦୀର୍ଘାୟୁ ହୋଇଥାଏ ।
ତେବେ ଏହି ମାଛ ଏକମାତ୍ର ବିରଳ ମାଛ ଯାହାର ଦାନ୍ତ ଗୁଡିକ ମୃତ ମାଛଙ୍କ ଜୀବାସ୍ମ ସହ ରଖାଯାଇଛି । ମାନେ ଏହି ମାଛର ଯେଉଁ ଦାନ୍ତ ଗୁଡିକ ବାହାରି ଥାଏ ତାକୁ ସଂରକ୍ଷିତ ରଖାଯାଇଛି । ତେବେ ଏହି ମାଛକୁ ପରୀକ୍ଷା କରିବା ପାଇଁ ଏକ ଆକ୍ୱାରିୟମରେ ରଖାଯାଇ ତାର ଦାନ୍ତ ଗୁଡିକୁ ସବୁଜ ରଂଗ କରାଗଲା, ହେଲେ ପରେ ଦେଖାଗଲା କି ସେତିରୁ କିଛି ଦାନ୍ତ ଭାଙ୍ଗି ଯାଇ ନୂଆ ଦାନ୍ତ ବାହାରିିଛି । ତେବେ କେମିତି ଏହି ଦାନ୍ତ ଏତେ ଶୀଘ୍ର ସୃଷ୍ଟି ହେଉଛି ତାର ସନ୍ଧାନ ପାଇ ପାରିନାହାନ୍ତି ଗବେଷକ । ପରୀକ୍ଷା ନିରୀକ୍ଷା ପରେ ବି ଜଣା ପଡୁନି କି କେମିତି ଏତେ ଦାନ୍ତର ଅଧିକାରୀ ଏହି ପ୍ୟାସିଫିକ ଲିଙ୍କଡ୍ ।