ଆସନ୍ତାକାଲି ଭୋଟ । ଅନେକ ଗୁରୁତ୍ୱପୂର୍ଣ୍ଣ ଦିଗକୁ ଇସାରା କରିବ ଉପନିର୍ବାଚନ । ସରକାରଙ୍କ କୋଭିଡ ପରିଚାଳନାର ହେବ ଅଗ୍ନିପରୀକ୍ଷା । ବାଲେଶ୍ୱରରେ ଗଡ଼ ରକ୍ଷା ବିଜେପି ପାଇଁ ଏସିଡ ଟେଷ୍ଟ । ଜଣାପଡ଼ିବ ଆଗକୁ କି ପଛକୁ ଯାଉଛି କଂଗ୍ରେସ
କନକ ବ୍ୟୁରୋ : ଆସନ୍ତାକାଲି ନିର୍ବାଚନ । କେବଳ ଦୁଇଟି ନିର୍ବାଚନ ମଣ୍ଡଳିରେ ଏହି ଉପ ନିର୍ବାଚନ ହେଉଥିଲେ ବି ବହୁ ଦୃଷ୍ଟିରୁ ଏହାକୁ ରାଜନୈତିକ ପର୍ଯ୍ୟବେକ୍ଷକ ମହଲରେ ବହୁ ଗୁରୁତ୍ୱ ଦିଆଯାଉଛି । କାରଣ ଏହାର ଫଳାଫଳ ଅନେକ ଗୁରୁତ୍ୱପୂର୍ଣ୍ଣ ଦିଗକୁ ଇସାରା କରୁଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ଅତୁଟ ଅଛି ନା ନାହିଁ, ସରକାରଙ୍କ କୋଭିଡ ପରିଚାଳନାକୁ ଲୋକେ କିଭଳି ଭାବରେ ଗ୍ରହଣ କରିଛନ୍ତି, ତାହା ଏହି ନିର୍ବାଚନରୁ ଜଣାପଡିବ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବିଜେପି ବାଲେଶ୍ୱରରେ ଗଡ ରକ୍ଷା କରିପାରୁଛି କି ନାହିଁ, ଓଡିଶାରେ ମୋଦିଙ୍କ ନାଁରେ ଭୋଟ ଆସିବ କି ନାହିଁ, ତା’ର ମଧ୍ୟ ପରୀକ୍ଷା ହେବ । ଏହାଛଡା କଂଗ୍ରେସ ପ୍ରତି ଲୋକଙ୍କ କଣ ମନୋଭାବ ରହିଛି, ତା’ର ମଧ୍ୟ ପରୀକ୍ଷା ହେବ ।
ନିର୍ବାଚନ ଆସେ ଓ ଯାଏ । କିନ୍ତୁ ନିର୍ବାଚନ ଫଳାଫଳା ଏଭଳି କିଛି ବାର୍ତା ଆଣେ, ଯାହା ଜନତାଙ୍କ ମୁଡ୍ ଓ ନେତାଙ୍କୁ ଆତ୍ମସମୀକ୍ଷା କରିବାର ସୁଯୋଗ ଆଣେ । ବାଲେଶ୍ୱର ସଦର ଏବଂ ତିର୍ତୋଲ ଉପ-ନିର୍ବାଚନ ଫଳାଫଳ ସେମିତି କିଛି ପ୍ରସଙ୍ଗକୁ ଉଜାଗର କରିବ, ସେତେବେଳେ ଆସନ୍ତା ସପ୍ତାହରେ ଜନତାଙ୍କ ରାୟ ଆସିବ ।
ଏହି ଦୁଇଟି ଉପ-ନିର୍ବାଚନରୁ ଶାସକ ବିଜେଡି ପାଇଁ କ’ଣ ରହିବ ବାର୍ତା । ନିର୍ବାଚନ ଫଳାଫଳ ଏମିତି ଏକାଧିକ ପ୍ରସଙ୍ଗର ସୂଚକ ଭାବେ ସାମ୍ନାକୁ ଆସିବ, ଯାହା ବିଜେଡିକୁ ଉତ୍ସାହିତ କିମ୍ବା ଆତ୍ମସମୀକ୍ଷାର ଅବକାଶ ସୃଷ୍ଟି କରିବ । ଉପ-ନିର୍ବାଚନ ଫଳାଫଳ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ବଢ଼ିଛି ନା’ କମିଛି ତାର ପ୍ରମାଣ ଦେବ । ସରକାର କିଭଳି କୋଭିଡ୍ ପରିଚାଳନା କରିଛନ୍ତି ତାହା ଏହି ନିର୍ବାଚନ ଫଳାଫଳରେ ପ୍ରତିଫଳିତ ହେବ । ଏହାସହ ଲକ୍ଡାଉନ୍ ଓ ସଟ୍ଡାଉନ୍କୁ ଜନତା କିଭଳି ଗ୍ରହଣ କରିଛନ୍ତି, ତାହା ମଧ୍ୟ ଜଣାପଡ଼ିବ । ଶାସକ ବିଜେଡିର ସଂଗଠନ ମଜବୁତ ଅଛି ନା’ ଦୁର୍ବଳ ହୋଇଛି ଭୋଟର୍ ସ୍ପଷ୍ଟ କରିବେ ।
କେବଳ ବିଜେଡି ନୁହେଁ ବିଜେପି ପାଇଁ ମଧ୍ୟ ସାମନ ଢ଼ଙ୍ଗରେ କିଛି ବାର୍ତା ଆଣିବ ବାଲେଶ୍ୱର ଓ ତିର୍ତୋଲ ଫଳାଫଳ । ଦୁଇ କେନ୍ଦ୍ରମନ୍ତ୍ରୀଙ୍କ ଗ୍ରହଣୀୟତା, ମୋଦିଙ୍କ ଲୋକ ପ୍ରିୟତା, ଦଳୀୟ ସଂଗଠନ ଭଳି ଏକାଧିକ ପ୍ରସଙ୍ଗରେ ସ୍ପଷ୍ଟ ମତ ଦେଇପାରନ୍ତି ଭୋଟର୍ । ଓଡ଼ିଶାରେ ପ୍ରଧାନମନ୍ତ୍ରୀ ମୋଦିଙ୍କ ଲୋକପ୍ରିୟତାର ଏକ ପରୀକ୍ଷା ହେବ । ବିଜେପିର ବାଲେଶ୍ୱର ଗଡ଼ ରହୁଛି ନା ନାହିଁ ଏବଂ ତିର୍ତୋଲ ଗଡ଼ ଭେଦିବାର କ୍ଷମତା ଅଛି ନା ନାହିଁ ପ୍ରମାଣିତ ହେବ । କେନ୍ଦ୍ରର ସହାୟତାରେ ଓଡ଼ିଶାର ଜନତା ଖୁସ୍ ନା ନାହିଁ ଏହି ଫଳାଫଳରୁ ଜଣାପଡ଼ିବ । ଏହାସହ ବାଲେଶ୍ୱରରେ କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀଙ୍କ କେତେ ପ୍ରଭାବ ରହିଛି ତାହା ମଧ୍ୟ ସ୍ପଷ୍ଟ ହୋଇଯିବ ।
କଂଗ୍ରେସ ପାଇଁ ମଧ୍ୟ ବାଲେଶ୍ୱର ଓ ତିର୍ତୋଲ ନିର୍ବାଚନ ଫଳାଫଳ ଏକ ନୂଆ ରାଜନୈତିକ ଦିଗ ପାଇଁ ବାଟ ଦେଖାଇପାରେ । କାରଣ, ବାଲେଶ୍ୱରରେ ମହିଳା ପ୍ରାର୍ଥୀ ଏବଂ ତିର୍ତୋଲରେ ଯୁବ ନେତୃତତ୍ୱ ଉପରେ ଆସ୍ତା ରଖିଛି ଦଳ । କଂଗ୍ରେସ ଭୋଟ୍ ଅତୁଟ ଅଛି ନା ନାହିଁ ଉପ-ନିର୍ବାଚନ ଫଳାଫଳ ସ୍ପଷ୍ଟ କରିବ । କଂଗ୍ରେସର ନୂଆ ଚେହେରା ଓ ଯୁବ ଚେହେରା ରଣନୀତି, କାମ ଦେଉଛି ନା ନାହିଁ ତାହା ପ୍ରମାଣିତ ହେବ । ନୂଆ ପ୍ରଭାରୀ କେତେ ପ୍ରଭାବଶାଳୀ ତାହା ଜଣାପଡ଼ିବ । କେନ୍ଦ୍ର ଓ ରାଜ୍ୟର ବିଫଳତାକୁ ଠିକ୍ ଭାବେରେ ଉପସ୍ଥାପନ କରିପାରିଛି ବୋଲି ଧରାଯିବ ।