ଆସନ୍ତାକାଲି ପାଟକୁରା ପରୀକ୍ଷା । ୨୦ ବର୍ଷର ଲଢେଇକୁ ନିର୍ଣ୍ଣାୟକ ମୋଡ ଦେବେ କି ଭୋଟର, ବିଜୟ ଓ ସାବିତ୍ରୀଙ୍କ ମଧ୍ୟରେ କଡା ଟକ୍କର ।
କନକ ବ୍ୟୁରୋ : ସାଧାରଣ ନିର୍ବାଚନ ପରେ ତିନି ଦଳ ପାଇଁ ସମ୍ମାନ ପାଲଟିଥିବା ପାଟକୁରାରେ ଆସନ୍ତାକାଲି ମତଦାନ । ସକାଳ ୭ଟାରୁ ସଂଧ୍ୟା ୬ଟା ଯାଏଁ ୩୦୯ଟି ବୁଥରେ ମତଦାନ ବ୍ୟବସ୍ଥା ହୋଇଛି । ନିର୍ବାଚନ ପରିଚାଳନା ପାଇଁ ୧୭୦୦ ପୁଲିଂ ଅଧିକାରୀଙ୍କୁ ନିୟୋଜିତ କରାଯାଇଛି । ନିର୍ବାଚନରେ ୧୦ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବେ ୨ଲକ୍ଷ ୪୪ହଜାର ୭୪୭ ମତଦାତା । ନିର୍ବାଚନ ଶାନ୍ତି ଶୃଙ୍ଖଳାର ସହ ଶେଷ କରିବା ପାଇଁ ୪ କମ୍ପାନୀ ସିଆରପିଏଫ୍ ଯବାନ ମୁତୟନ କରାଯିବା ସହ ୱେବ୍ କାଷ୍ଟିଂ , ସିସିଟିଭି ଓ ଭିଡିଓଗ୍ରାଫି କରିବାକୁ ନିଷ୍ପତି ହୋଇଛି । ତେବେ ପାଟକୁରାରେ ରାଜନୈତିକ ଛକାପଂଝା ଭିତରେ ଆଜି ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ବୁଥ୍ ରିଗିଙ୍ଗର ଆଶଙ୍କା ପ୍ରକାଶ କରିଛନ୍ତି ଉଭୟ ବିଜେପି ଓ ବିଜେଡିର ପ୍ରତିନିଧି ଦଳ ।
Kanak News is now on WhatsApp
Join and get latest news updates delivered to you via WhatsApp
ଗତ କିଛି ଦିନ ଧରି ରାଜ୍ୟ ରାଜନୀତିକୁ ସରଗରମ କରିବା ପରେ ଆସନ୍ତାକାଲି ହେବାକୁ ଯାଉଛି ପାଟକୁରାରେ ମତଦାନ । ରାଜ୍ୟ ରାଜନୀତିରେ ଏହି ନିର୍ବାଚନ ମଣ୍ଡଳୀ ଏବେ ଦୁଇ ପ୍ରମୁଖ ପ୍ରତିଦ୍ୱନ୍ଦୀ ଦଳ ବିଜେଡି ଓ ବିଜେପି ପାଇଁ ସମ୍ମାନର ପ୍ରଶ୍ନ ହୋଇଯାଇଛି । ରାଜନୈତିକ ଛକାପଞ୍ଝା ଭିତରେ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ବୁଥ୍ ରିଗିଙ୍ଗର ଆଶଙ୍କା ପ୍ରକାଶ କରିଛନ୍ତି ଉଭୟ ବିଜେପି ଓ ବିଜେଡିର ପ୍ରତିନିଧି ଦଳ । ମତଦାନକୁ ସ୍ୱଚ୍ଛ ଓ ନିରପେକ୍ଷ କରିବା ପାଇଁ ନିର୍ବାଚନମଣ୍ଡଳୀର ୭୫ଟି ସମ୍ବେଦନଶୀଳ ବୁଥର ଏକ ତାଲିକା ସିଇଓଙ୍କୁ ପ୍ରଦାନ କରିଛି ବିଜେଡି । ସେପଟେ ଡେରାବିଶ ବ୍ଳକର ଅଧିକାଂଶ ବୁଥ କ୍ୟାପଚର ହେବା ଆଶଙ୍କା କରି ୧୫୮ଟି ସମ୍ବେଦନଶୀଳ ବୁଥର ତାଲିକା ଦେଇଛି ବିଜେପି ।
ରାଜ୍ୟ ରାଜନୀତିର ଏକ ବଡ଼ ଇତିହାସ ପାଟକୁରା ସହ ଯୋଡି ହୋଇଥିବାରୁ ଏହାର ଗୁରୁତ୍ୱ ବଢ଼ିଯାଇଛି । ୨୦ ବର୍ଷ ଧରି ପାୱାର କରିଡର ବାହାରେ ଥିବା ବିଜୟ ମହାପାତ୍ରଙ୍କ ପାଇଁ ଏହି ନିର୍ବାଚନ ଶେଷ ସୁଯୋଗ ବୋଲି କୁହାଯାଉଛି । ସେପଟେ ବିଜେଡି ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ପାଇଁ ଏହି ଆସନ ସମ୍ମାନର ଆସନ ହୋଇରହିଛି । ପାଟକୁରା ମଇଦାନରେ ୧୦ ଜଣ ପ୍ରାର୍ଥୀ ଥିବା ବେଳେ ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରୱାଲ ଓ ବିଜେପି ପ୍ରାର୍ଥୀ ବିଜୟ ମହାପାତ୍ରଙ୍କ ମଧ୍ୟରେ ହେଉଛି କଡ଼ା ଟକ୍କର । ଅନ୍ୟପଟେ ଦୁଇ ହେଭିୱେଟଙ୍କୁ ଟକ୍କର ଦେବାକୁ ମଇଦାନରେ ରହିଛନ୍ତି କଂଗ୍ରେସ ପ୍ରାର୍ଥୀ ଜୟନ୍ତ ମହାନ୍ତି ।
ଗୋଟିଏ ପଟେ ବିଜେପି ପ୍ରାର୍ଥୀ ବିଜୟ ମହାପାତ୍ରଙ୍କ ରାଜନୈତିକ ଭବିଷ୍ୟତ ନିର୍ଦ୍ଧାରଣ କରିବ ଏହି ନିର୍ବାଚନ । ଅନ୍ୟପଟେ ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରୱାଲଙ୍କୁ ଜିତାଇ ବିଜୟଙ୍କ ବିଧାନସଭା ସ୍ୱପ୍ନକୁ ପୁଣିଥରେ ଧୁଳିସାତ କରିବା ପାଇଁ ରଣନୀତି କରିଛି ବିଜେଡି । ଆସନ୍ତାକାଲି ସକାଳ ୭ଟାରୁ ଆରମ୍ଭ ହୋଇ ସଂଧ୍ୟା ୬ଟା ଯାଏଁ ଚାଲିବ ପାଟକୁରାରେ ମତଦାନ । ଏଥିପାଇଁ ଭୋଟଗ୍ରହଣ କେନ୍ଦ୍ରରେ ଇଭିଏମ ଓ ଅନ୍ୟ ଆବଶ୍ୟକ ସରଞ୍ଜାମ ସହ ପହଁଚିଛନ୍ତି ପୁଲିଂ ପାର୍ଟି । ୩୦୯ଟି ବୁଥରେ ମତଦାନ ହେବାକୁ ଥିବା ବେଳେ ନିର୍ବାଚନ ପରିଚାଳନା ପାଇଁ ୧୭୦୦ ପୁଲିଂ ଅଧିକାରୀଙ୍କୁ ନିୟୋଜିତ କରାଯାଇଛି । ଏହି ନିର୍ବାଚନରେ ୧୦ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବେ ୨ଲକ୍ଷ ୪୪ହଜାର ୭୪୭ ମତଦାତା । ନିର୍ବାଚନ ଶାନ୍ତି ଶୃଙ୍ଖଳାର ସହ ଶେଷ କରିବା ପାଇଁ ୪ କମ୍ପାନୀ ସିଆରପିଏଫ୍ ଯବାନ ମୁତୟନ କରାଯିବା ସହ ୩୧ଟି ବୁଥରେ ୱେବ୍ କାଷ୍ଟିଂ , ୪୦ଟି ସ୍ଥାନରେ ସିସିଟିଭି, ୫୨ଜଣ ମାଇକ୍ରୋ ଅବଜରଭର, ୧୫ଟି ବୁଥରେ ଭିଡିଓଗ୍ରାଫି କରିବାକୁ ନିଷ୍ପତି ହୋଇଛି ।