ଆସନ୍ତା ୨ ବର୍ଷ ମଧ୍ୟରେ ହଟାଇ ଦିଆଯିବ ସମସ୍ତ ଟୋଲ ଗେଟ୍ । ସୂଚନା ଦେଲେ କେନ୍ଦ୍ର ପରିବହନ ଓ ରାଜପଥ ମନ୍ତ୍ରୀ । ଜିପିଏସ୍ ଆଧାରିତ ବ୍ୟବସ୍ଥାକୁ ଅଗ୍ରାଧିକାର

1,882

କନକ ବ୍ୟୁରୋ : ଆସନ୍ତା ୨ ବର୍ଷ ମଧ୍ୟରେ ଦେଶରେ ଥିବା ସମସ୍ତ ଟୋଲ ଗେଟ୍ କୁ ଉଠାଇ ଦିଆଯିବ । ଏନେଇ ସୂଚନା ଦେଇଛନ୍ତି ବିଭାଗୀୟ ମନ୍ତ୍ରୀ ନିତୀନ ଗଡକରୀ । ଯାନ ବାହନ ଗୁଡିକର ଚଳା ଚଳରେ ବାଧା ନ ପହଞ୍ଚାଇ ଟୋଲ ସଂଗ୍ରହ ନିମନ୍ତେ ଜିପିଏସ ଆଧାରିତ ବ୍ୟବସ୍ଥାକୁ ଅଗ୍ରାଧିକାର ଦିଆଯିବା ଉପରେ କାମ ଚାଲିଛି ବୋଲି ଶ୍ରୀ ଗଡକରୀ ସୂଚନା ଦେଇଛନ୍ତି । ସେ କହିଛନ୍ତି କି ଭାରତର ସମସ୍ଥ ରାଜପଥକୁ ଟୋଲ ବୁଥ୍ ରୁ ମୁକ୍ତ କରାଯିବ । ଏହାସହ ଗାଡିର ଗତିବିଧି ଉପରେ ନଜର ରଖି ଗାଡି ମାଲିକଙ୍କ ଆକାଉଣ୍ଟରୁ କିଭଳି ସିଧା ସଳଖ ଟୋଲ ଦେୟ ଆଦାୟ କରାଯାଇପାରିବ ତାହା ଉପରେ କେନ୍ଦ୍ରମନ୍ତ୍ରୀ ସ୍ପଷ୍ଟ କରିଛନ୍ତି ।

ଗୁରୁବାର ଆସୋଚାମର ଏକ କାର୍ଯ୍ୟକ୍ରମରେ ଯୋଗ ଦେଇ ସେ ଏହି ବାବଦରେ ବିଷଦ ଆଲୋଚନା କରିଛନ୍ତି । ସେ କହିଛନ୍ତି କି ସମସ୍ତ ବାଣିଜ୍ୟିକ ଯାନରେ ଏବେ ଟ୍ରକିଂ ସିଷ୍ଟମ ରହୁଛି । ତେଣୁ ଏହାର ଗତିବିଧି ଉପରେ ନଜର ରଖିବାରେ କିଛି ଅସୁବିଧା ନାହିଁ । ଅନ୍ୟପଟେ ପୁରୁଣା ଗାଡି ମାନଙ୍କରେ ଟ୍ରାକିଂ ସିଷ୍ଟମ ନଥିବାରୁ ସେଗୁଡିକରେ କିଭଳି ଜିପିଏସ୍ ଟେକ୍ନୋଲୋଜି ସ୍ଥାପନ କରାଯାଇ ପାରିବ ତାହା ଉପରେ ସରକାର ଏକ ଯୋଜନା ପ୍ରସ୍ତୁତ କରୁଛନ୍ତି ।

ଏହି କାର୍ଯ୍ୟକ୍ରରେ ଶ୍ରୀ ଗଡକରୀ ଆହୁରି କହିଛନ୍ତି କି ଆସନ୍ତା ବର୍ଷ ମାର୍ଚ୍ଚ ପର୍ଯ୍ୟନ୍ତ ଦେଶରେ ଟୋଲ ସଂଗ୍ରହ ୩୪ ହଜାର କୋଟିରେ ପହଂଚିବ । ହେଲେ ଜିପିଏସ ସିଷ୍ଟମରେ ଟୋଲ ସଂଗ୍ରହ କରାଗଲେ ଏହି ପରିମାଣର ଯଥେଷ୍ଟ ବୃଦ୍ଧି ହେବ । ଆସନ୍ତା ୫ ବର୍ଷ ମଧ୍ୟରେ ଟୋଲ ସଂଗ୍ରହ ୧ ଲକ୍ଷ ୩୪ ହଜାର କୋଟିରେ ପହଂଚିବ ବୋଲି ସେ ଅନୁମାନ କରିଛନ୍ତି । କହିରଖୁ କି ଗଡକରୀ ଏହା ପୂର୍ବରୁ ସହଜ ଟୋଲ ଦେୟ ପାଇଁ ଫାଷ୍ଟାଗ ସିଷ୍ଟମ ଲାଗୁ କରିଥିଲେ । ଏହା ଦ୍ୱାରା ଗାଡି ଗୁଡିକ ଟୋଲ ଗେଟ୍ ରେ ନ ଅଟକି ବି ଟୋଲ ଦେଇ ପାରିବେ । ଅନ୍ୟପଟେ ଗଡକରୀ କହିଥିଲେ କି ବର୍ତ୍ତମାନ ସମୟରେ ଦେଶରେ ନିଯୁକ୍ତି ସୃଷ୍ଟି ଓ ଦାରିଦ୍ର ଦୂରିକରଣ ପାଇଁ ଶିଳ୍ପର ବିକାଶ ହେବା ନିହାତି ଦରକାର । ହେଲେ ବର୍ତ୍ତମାନ ସୁଦ୍ଧାର ଦେଶର ଶିଳ୍ପ ଗୁଡିକ କେତକ ସହରାଞ୍ଚଳରେ କେନ୍ଦ୍ରୀଭୁତ ହୋଇ ରହିଛି । ହେଲେ ଶିଳ୍ପର ବିକାଶ ପାଇଁ ଏଗୁଡିକୁ ବିକେନ୍ଦ୍ରୀକରଣ କରିବାର ଆବଶ୍ୟକ ରହିଛି ।

Comments are closed.