ରାଜ୍ୟବ୍ୟାପି ମୌସୁମୀ ସକ୍ରିୟ : ଦକ୍ଷିଣରେ ପ୍ରବଳ ବର୍ଷା ସମ୍ଭାବନା
କନକ ବ୍ୟୁରୋ : ଆଜି ଦକ୍ଷିଣ ପଶ୍ଚିମ ମୌସୁମୀ ବାୟୁ ସାରା ଓଡିଶାରେ ସକ୍ରିୟ ହୋଇଛି । ଏହି ସୂଚନା ଦେଇଛି ଭାରତୀୟ ପାଣିପାଗ ବିଭାଗ । ମୌସୁମୀର ଉତ୍ତର ରେଖା (ଏନଏଲଏମ)ରେ ଏହା ଦର୍ଶାଯାଇଛି । ଏହି ରେଖା ଭାଲସାଦ୍, ନାସିକ୍ ଦେଇ ଓଡିଶାର ଝାରସୁଗୁଡା ଏବଂ ଅନ୍ୟାନ୍ୟ ଅଂଶ ଦେଇ ଜାମସେଦପୁର, ଭାଗଲପୁର ଦିଗକୁ ଗତି କରିଛି । ଯାହାଦ୍ୱାରା ଏହି ରେଖାର ଦକ୍ଷିଣ ପାଶ୍ୱର୍ସ୍ଥ ସମସ୍ତ ସ୍ଥାନରେ ମୌସୁମୀ ସକ୍ରିୟ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ସୁନ୍ଦରଗଡ, ଝାରସୁଗୁଡା ଏବଂ ବରଗଡ ଜିଲ୍ଲାର କିଛି ଅଂଶ ଏବେ ବି ମୌସୁମୀ ବଳୟର ବାହାରେ ରହିଛି । ଅନୁକୂଳ ପରିସ୍ଥିତି ପରିଲକ୍ଷିତ ହେଉଥିବାରୁ ଆଉ ୩ରୁ୪ ଦିନ ଭିତରେ ଅବଶିଷ୍ଟ ଅଂଚଳରେ ମୌସୁମୀ ସକ୍ରିୟ ହେବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର ।
ସୂଚନାନୁସାରେ, ଏବେ ଓଡିଶା ଆକାଶ ମେଘାଚ୍ଛାନ୍ନ ରହିଛି । ଗତ ୨୪ ଘଂଟା ଭିତରେ ରାଜ୍ୟର ଅନେକ ସ୍ଥାନରେ ସାମାନ୍ୟରୁ ମଧ୍ୟମ ଧରଣର ବର୍ଷା ହୋଇଯାଇଛି । ଆଜି ସୁଦ୍ଧା କିଛି ସ୍ଥାନରେ ବି ବର୍ଷା ହୋଇଛି । ଦିନକ ତଳେ ସୃଷ୍ଟି ହୋଇଥିବା ଘୂର୍ଣ୍ଣବଳୟ ଘନୀଭୂତ ହୋଇ ଲଘୁଚାପରେ ପରିଣତ ହୋଇଥିଲା । କିନ୍ତୁ ଏହା ବାଂଲାଦେଶ ଆଡକୁ ଗତି କରିବା ପରେ ଦୁର୍ବଳ ହୋଇଯାଇଛି ।
ବର୍ତ୍ତମାନ ଓଡିଶା ଉପରେ ଏହାର କୌଣସି ପ୍ରଭାବ ନାହିଁ । ଆଜି ସନ୍ଧ୍ୟା ସୁଦ୍ଧା ଉପକୂଳ, ଉତ୍ତର ଓଡିଶାର ଅଧିକାଂଶ ସ୍ଥାନରେ ବର୍ଷା ହୋଇପାରେ । ତେବେ ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି କି, ଆଗାମୀ ୨୪ ଘଂଟା ମଧ୍ୟରେ ଦକ୍ଷିଣ ଓଡିଶାର କିଛି ସ୍ଥାନରେ ପ୍ରବଳ ବର୍ଷା ହେବାର ସମ୍ଭାବନା ରହିଛି ।