ନିର୍ଭୟା ଦୋଷୀଙ୍କ ଫାଶୀକୁ ନେଇ ଦୂର ହେବ ଦ୍ୱନ୍ଦ୍ୱ । ଫାଶୀ ରୋକିବାକୁ ଦୋଷୀଙ୍କ ଆବେଦନର ଆଜି ଶୁଣାଣି କରିବେ ଦିଲ୍ଲୀ କୋର୍ଟ
କନକ ବ୍ୟୁରୋ : ଆସନ୍ତା କାଲି ନିର୍ଭୟା ଦୋଷୀଙ୍କ ଫାଶୀ ଦିଆଯିବ ନା ନାହିଁ । ଏନେଇ ଦେଖାଦେଇଥିବା ଦ୍ୱନ୍ଦ୍ୱ ଆଜି ଦୂର ହୋଇଯିବ । ଆଜି ଜଣାପଡିଯିବ କାଳି ସକାଳ ୬ଟାରେ ୪ ଦୋଷୀ ଫାଶୀ ଖୁଂଟରେ ଝୁଲିବେ ନା ପୁଣି ଫାଶୀ ତାରିଖ ଟଳିବ । କାରଣ ୪ ଦୋଷୀ ଫାଶି ଦଣ୍ଡ ଉପରେ ରୋକ ଲଗାଇବାକୁ ପଟିଆଲା ହାଉସ କୋର୍ଟରେ ଅପିଲ କରିଛନ୍ତି । ତାଙ୍କ ନ୍ୟାୟିକ ବିକଳ୍ପ ଶେଷ ହୋଇନଥିବାରୁ ଫାଶୀ ଉପରେ ରୋକ ଲଗାଇବାକୁ ତାଙ୍କ ଓକିଲ ଏପି ସିଂ ଆବେଦନ କରିଛନ୍ତି । ଆଜି ଏହାର ଶୁଣାଣି କରିବେ ପଟିଆଲା ହାଉସ କୋର୍ଟ । ୪ ଜଣ ଦୋଷୀ ମୁକେଶ ସିଂ, ପୱନ ଗୁପ୍ତା, ବିନୟ କୁମାର ଶର୍ମା ଏବଂ ଅକ୍ଷୟ କୁମାର ଶର୍ମାଙ୍କୁ ୧ ତାରିଖରେ ଫାଶୀ ଦିଆଯିବ ନା ପୁଣି ନୂଆ ତାରିଖ ଦିଆଯିବ, ସେନେଇ ରାୟ ଶୁଣାଇବେ ଦିଲ୍ଲୀ କୋର୍ଟ । ଅଭିଯୁକ୍ତଙ୍କ ଫାଶୀ ଦଣ୍ଡାଦେଶ ଉପରେ ରୋକ ଲଗାଇବାକୁ ଆବେଦନ ହୋଇଥିବା ବେଳେ ଡେଥ୍ ୱାରେଂଟ୍ ଉପରେ ରୋକ୍ ଲଗାଇବାକୁ ବିରୋଧ କରୁଛନ୍ତି ତିହାର ଜେଲ୍ କର୍ତୃପକ୍ଷ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଅଭିଯୁକ୍ତମାନେ ଆଇନର ବିଭିନ୍ନ ଗଳାବାଟ ଦର୍ଶାଇ ଫାଶୀଦଣ୍ଡକୁ ଘୁଂଚାଇ ଚାଲିଥିବା ବେଳେ ଏହାକୁ ଆଇନରୁ ସମ୍ପୂର୍ଣ୍ଣ ପରିହାସ ବୋଲି ସରକାରୀ ଓକିଲ କହିଛନ୍ତି । ତେବେ ଦିଲ୍ଲୀ ଜେଲ୍ ମାନୁଆଲ ଅନୁସାରେ ଗୋଟିଏ ମାମଲାରେ ଏକାଧିକ ଦୋଷୀ ଥିଲେ ଏବଂ ଜଣକର ରାଜକ୍ଷମା ଆବେଦନ ଫଇସଲା ହୋଇନଥିଲେ ଅନ୍ୟମାନଙ୍କୁ ମଧ୍ୟ ଫାଶୀ ଦିଆଯାଇପାରିବ ନାହିଁ । ବୁଧବାର ରାଷ୍ଟ୍ରପତିଙ୍କ ପାଖରେ ରାଜକ୍ଷମା ଆବେଦନ କରିଛି ଅନ୍ୟତମ ଅଭିଯୁକ୍ତ ବିନୟ ଶର୍ମା । ସେପଟେ ଫାଶୀରୁ ବଂଚିବା ପାଇଁ ନିର୍ଭୟାକାଣ୍ଡର ଅନ୍ୟତମ ଦୋଷୀ ଅକ୍ଷୟ ସିଂହ ସୁପ୍ରିମକୋର୍ଟରେ କ୍ୟୁରେଟିଭ୍ ପିଟିସନ ଦାଖଲ କରଥିଲା । ତେବେ ଏହାକୁ ଖାରଜ କରିଦେଇଛନ୍ତି କୋର୍ଟ । ତେବେ ଅକ୍ଷୟ ମଧ୍ୟ ରାଷ୍ଟ୍ରପତିଙ୍କ ପାଖରେ ରାଜକ୍ଷମା ଆବେଦନ କରିପାରିବ ।