ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲ କଲେ ବିଭିନ୍ନ ଦଳର ହେଭିୱେଟ ନେତା । ଭୁବନେଶ୍ୱର ଲୋକସଭା ପାଇଁ ବିଜେପିର ଅପରାଜିତା ଷଡଙ୍ଗୀଙ୍କ ସହ ମହାଙ୍ଗାରୁ ପ୍ରତାପ ଜେନା ଦାଖଲ କଲେ ନାମାଙ୍କନ
ଭୁବନେଶ୍ୱର ମଧ୍ୟ ଆସନ ପାଇଁ ଆଜି ପ୍ରାର୍ଥୀପତ୍ର ଦାଖଲ କରିଛନ୍ତି ପୂର୍ବତନ ମେୟର ଅନନ୍ତ ନାରାୟଣ ଜେନା
କନକ ବ୍ୟୁରୋ : ଭୁବନେଶ୍ୱର ମଧ୍ୟ ଆସନ ପାଇଁ ଆଜି ପ୍ରାର୍ଥୀପତ୍ର ଦାଖଲ କରିଛନ୍ତି ପୂର୍ବତନ ମେୟର ଅନନ୍ତ ନାରାୟଣ ଜେନା । ସମର୍ଥକଙ୍କ ସହ ଶୋଭାଯାତ୍ରାରେ ଆସି ଉପ-ଜିଲ୍ଲାପାଳ ତଥା ରିଟର୍ଣ୍ଣିଂ ଅଫିସରଙ୍କ ନିକଟରେ ପ୍ରାର୍ଥୀପତ୍ର ଦାଖଲ କରିଛନ୍ତି । ବିଧାୟକ ବିଜୟ ମହାନ୍ତିଙ୍କ ଟିକେଟ କାଟି ବିଜେଡି ଅନନ୍ତଙ୍କୁ ଏଥର ଭୁବନେଶ୍ୱର ମଧ୍ୟରୁ ଟିକେଟ ଦେଇଛି । ୧୦ ବର୍ଷ ମେୟର କାର୍ଯ୍ୟକାଳ ସମୟରେ ସାଉଁଟିଥିବା ଜନସଂପର୍କ ଓ ଲୋକପ୍ରିୟତାକୁ ଆଧାର କରି ନିର୍ବାଚନ ଜିତିବା ପାଇଁ ଅଂଟା ଭିଡିଛନ୍ତି ଅନନ୍ତ । ଏଠାରେ ବିଜେପିର ଜଗନ୍ନାଥ ପ୍ରଧାନ ପ୍ରାର୍ଥୀ ହୋଇଥିବା ବେଳେ କଂଗ୍ରେସର ରାଜୀବ ପଟ୍ଟନାୟକଙ୍କୁ ପ୍ରାର୍ଥୀ କରିଛି ।
Kanak News is now on WhatsApp
Join and get latest news updates delivered to you via WhatsApp
ଆଜି ତୃତୀୟ ପର୍ଯ୍ୟାୟ ନାମାଙ୍କନ ପାଇଁ ଶେଷ ଦିନ ହେଉଥିବା ବେଳେ ବିଜେପିର ଭୁବନେଶ୍ୱର ଲୋକସଭା ପ୍ରାର୍ଥୀ ଅପରାଜିତା ଷଡଙ୍ଗୀ ପ୍ରାର୍ଥୀପତ୍ର ଦାଖଲ କରିଛନ୍ତି । ସମର୍ଥକଙ୍କ ସହ ଶୋଭାଯାତ୍ରାରେ ଆସି ଖୋର୍ଦ୍ଧା ଜିଲ୍ଲପାଳଙ୍କ କାର୍ଯ୍ୟାଳୟରେ ରିଟର୍ଣ୍ଣିଂ ଅଫିସରଙ୍କ ନିକଟରେ ପ୍ରାର୍ଥୀପତ୍ର ଦାଖଲ କରିଛନ୍ତି । ଆଇଏଏସ ଚାକିରି ଛାଡି ବିଜେପିରେ ଯୋଗଦେବା ପରେ ଦଳ ତାଙ୍କୁ ସମ୍ମାନ ଜନକ ଭୁବନେଶ୍ୱର ଲୋକସଭା ଆସନରୁ ପ୍ରାର୍ଥୀ କରିଛି ।
ପ୍ରାର୍ଥିତ୍ୱ ଘୋଷଣା ହେବା ପୂର୍ବରୁ ବିଭିନ୍ନ ୱାର୍ଡ ଓ ଗାଁ ଗାଁ ବୁଲି ନିର୍ବାଚନ ପ୍ରଚାର ଆରମ୍ଭ କରିଦେଇଥିଲେ ଅପରାଜିତା । ମୋଦି ଲହର ଓ ନିଜ ନିର୍ମଳ ଭାବମୂର୍ତୀକୁ ପାଥେୟ କରି ନିର୍ବାଚନ ମୈଦାନ କାର ହେବାକୁ ଆଶା ରଖିଛନ୍ତି ଅପରାଜିତା । ଏପଟେ ଭୁବନେଶ୍ୱରରେ ତାଙ୍କୁ କଡା ଟକ୍କର ଦେଉଛନ୍ତି ବିଜେଡିର ଅରୁପ ପଟ୍ଟନାୟକ ।କଂଗ୍ରେସ ଏଠାରେ ପ୍ରାର୍ଥୀ ଦେଇନଥିବା ବେଳେ ବାମଦଳ ନେତା ଜନାର୍ଦ୍ଦନ ପତିଙ୍କୁ ସମର୍ଥନ କରୁଛି ।
ସେପଟେ ମହାଙ୍ଗା ନିର୍ବାଚନ ମଣ୍ଡଳି ବିଧାନସଭା ଆସନ ପାଇଁ ନାମାଙ୍କନ ଭରିଛନ୍ତି ପ୍ରତାପ ଜେନା । ଦଳୀୟ କର୍ମୀଙ୍କ ସହ ବିରାଟ ପଟୁଆରରେ ଆସି କଟକ ଉପ-ଜିଲ୍ଲାପାଳଙ୍କ କାର୍ଯ୍ୟାଳୟରେ ପ୍ରାର୍ଥୀପତ୍ର ଦାଖଲ କରିଛନ୍ତି । ରିଟର୍ଣ୍ଣିଂ ଅଫିସରଙ୍କ ଉପସ୍ଥିତିରେ ସମସ୍ତ କାଗଜ ପତ୍ର ଯାଂଚ କରାଯିବା ସହ ନାମାଙ୍କନ ଭରିଛନ୍ତି ପ୍ରତାପ ଜେନା । ପ୍ରତାପ ଜେନା ୨୦୦୦ ମସିହାରୁ ଲଗାତର ୪ ଥର ବିଜୁ ଜନତା ଦଳ ଟିକଟରୁ ବିଜୟୀ ହୋଇ ବିଧାୟକ ଭାବେ ବିଧାନସଭାକୁ ନିର୍ବାଚିତ ହୋଇଛନ୍ତି । କିଷନନଗରରୁ ୨ ଥର ନିର୍ବାଚିତ ହୋଇଥିବା ବେଳେ ମାହାଙ୍ଗାରୁ ୨ ଥର ବିଧାନସଭାକୁ ଯାଇଛନ୍ତି । ଏହା ମାହାଙ୍ଗାରେ ତାଙ୍କର ତୃତୀୟଥର ଲଢେଇ ହେଉଥିବା ବେଳେ ରାଜନୈତିକ କ୍ୟାରିୟରର ପଂଚମ ଲଢେଇ । ଏଥର ମାହାଙ୍ଗାରେ ତ୍ରିମୁଖୀ ଲଢେଇ ଦେଖିବାକୁ ମିଳିବ । ବିଜେପିର ସାରଦା ପ୍ରଧାନ ଓ କଂଗ୍ରେସର ଦେବେନ୍ଦ୍ର ସାହୁଙ୍କ ସହ ବିଜେଡିର ପ୍ରତାପ ଜେନାଙ୍କ ମଧ୍ୟରେ ଜୋରଦାର ଲଢେଇ ଦେଖିବାକୁ ମିଳିବ ।