ଆଜି ଆଲୋକର ପର୍ବ ଦୀପାବଳି : ଅନ୍ଧାର ଉପରେ ଆଲୋକର ବିଜୟର ଉତ୍ସବ; ଏପଟେ ବାଲୁକା କଳାରେ ଦେଶବାସୀଙ୍କୁ ସୁଦର୍ଶନ ପଟ୍ଟନାୟକଙ୍କ ଶୁଭେଛା
କନକ ବ୍ୟୁରୋ : ଆଜି ଆଲୋକ ଓ ଆନନ୍ଦର ପର୍ବ ଦୀପାବଳୀ । ସବୁଠି ଉତ୍ସବର ପରିବେଶ । ଗାଁଠୁ ସହର ସବୁଠି ରଙ୍ଗବେରଙ୍ଗ ଆଲୋକ ସଜା ସହ ଦୀପରେ ଉଜଳ ଦିବସ ଅମାବାସ୍ୟାର ରାତି । ଆଲୋକର ପର୍ବ ଦୀପାବଳି । ସାରା ଦେଶରେ ଏନେଇ ଉତ୍ସବର ପରିବେଶ । ଦୀପାବଳିକୁ ନେଇ ଅନେକ ପୌରାଣିକ ଓ ଲୋକ କଥା ରହିଛି । ରାମାୟଣ ଅନୁସାରେ ଏହି ଦିନ ପ୍ରଭୁ ଶ୍ରୀରାମଚନ୍ଦ୍ର ରାବଣକୁ ମାରିବା ପରେ ଅଯୋଧ୍ୟାକୁ ଫେରିଥିଲେ ଏବଂ ତାଙ୍କରି ସ୍ୱାଗତ ପାଇଁ ଆଲୋକରେ ସଜେଇ ହୋଇଥିଲା ସାରା ସହର । ସେହିପରି ଅନ୍ୟ ଏକ ପୌରାଣିକ କଥା ହେଉଛି, ମହାଦାନୀ ବଳିଙ୍କୁ ଭଗବାନ ବିଷ୍ଣୁ ତିନିପାଦ ଦାନ ମାଗିଥିଲେ । ଗୋଟିଏ ପାଦରେ ପୃଥିବୀ ଓ ଦ୍ୱିତୀୟ ପାଦରେ ସ୍ୱର୍ଗ ପୁରୀକୁ ନେବା ପରେ ତୃତୀୟ ପାଦରେ ବଳିଙ୍କ ମୁଣ୍ଡ ଉପରେ ରଖି ତାଙ୍କୁ ପାତାଳକୁ ପଠାଇ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ତେବେ ପ୍ରତିବର୍ଷ ଦିନଟିଏ ପାଇଁ ନିଜ ପ୍ରଜାଙ୍କୁ ଦେଖିବାକୁ ସେ ମର୍ତ୍ୟପୁରକୁ ଆସିବାକୁ ଅନୁରୋଧ କରିଥିଲେ । ତେଣୁ ଏହି ଦିନ ତାଙ୍କ ଉପସ୍ଥିତିର ଖୁସିରେ ଲୋକେ ଆଲୋକିତ କରନ୍ତି ବୋଲି କୁହାଯାଏ । ଅନ୍ୟପଟେ ଏହି ଦିନ ମା କାଳିଙ୍କ ଆରାଧନା ମଧ୍ୟ ହୋଇଥାଏ । କାର୍ତିକ ଅମାବାସ୍ୟା ବା ଦୀପାବଳି ଦିନ ପୁରୀ ଶ୍ରୀମନ୍ଦିର ରହିଛି ସ୍ୱତନ୍ତ୍ର ନୀତି । ଲୋକବିଶ୍ୱାସ ରହିଛି ଏହି ଦିନ ପିତୃପୁରୁଷଙ୍କ ଉଦ୍ଦେଶ୍ୟରେ ଶ୍ରାଦ୍ଧ ଦିଆଯାଏ । ଏହାକୁ ପୟାଶ୍ରାଦ୍ଧ କୁହାଯାଏ । କାଉଁରିଆ କାଠି ଜଳାଇ ଧରାପୃଷ୍ଠକୁ ଅବତରଣ କରିଥିବା ପିତୃପୁରୁଷଙ୍କ ବାଟ ଦେଇବା ଉଦ୍ଦେଶ୍ୟରେ ବଡବଡିଆ ଡାକ ପକାଯାଏ ।
May the Festival of Lights illuminate your lives. #HappyDiwali .My SandArt at Puri beach in Odisha. pic.twitter.com/r7xNNURH26
— Sudarsan Pattnaik (@sudarsansand) November 13, 2020
ଦୀପାବଳି ଅବସରରେ ବାଲୁକା କଳାରେ ଦେଶବାସୀଙ୍କୁ ଶୁଭେଛା ଜଣାଇଛନ୍ତି ଅନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ । ଚଳିତ ବର୍ଷ କରୋନା କଟକଣା କାରଣରୁ ଦୀପାବଳିରେ କେବଳ ଦୀପ ଜାଳି ପରିବାର ସହିତ ଉତ୍ସବ ମନାଇବାକୁ ପଡୁଛି । ଏହି ଅବସରରେ ପୁରୀ ବେଳାଭୂମିରେ ବିଶାଳ ବାଲୁକା କଳା ନିର୍ମାଣ କରି ଦୀପାବଳିର ଶୁଭେଛା ଜଣାଇଛନ୍ତି ସୁଦର୍ଶନ ପଟ୍ଟନାୟକ ।