କନକ ବ୍ୟୁରୋ : ଘମାଘୋଟ ପ୍ରଚାର, ଅନ୍ଧାରୀ ବିଜେ ସରିଲା। ଆଜି ଭୋଟ୍। ଓଡ଼ିଶାର ପ୍ରଥମ ପର୍ଯ୍ୟାୟ ମତଦାନ ସକାଳ ୭ଟାରୁ ଆରମ୍ଭ ହୋଇଯିବ। ୪ ଲୋକସଭାର ୨୬ ପ୍ରାର୍ଥୀ ଓ ୨୮ ବିଧାନସଭାର ୧୯୧ ପ୍ରାର୍ଥୀଙ୍କ ଭାଗ୍ୟ ନିର୍ଧାରଣ କରିବେ ମତଦାତା। ତିନି ପ୍ରମୁଖ ଦଳ ବିଜେଡି, ବିଜେପି ଓ କଂଗ୍ରେସର ନଜର ରହିଛି ଏହି ପର୍ଯ୍ୟାୟ ଭୋଟ ଉପରେ। ଯଦିଓ ମେ’ ୨୩ ତାରିଖରେ ମତ ଗଣନା ହେବ, ତଥାପି ଏହି ପର୍ଯ୍ୟାୟ  ନିର୍ବାଚନରୁ ହିଁ ଭୋଟରଙ୍କ ମୁଡ ମାପିବେ ନେତା।କୋରାପୁଟ, ନବରଙ୍ଗପୁର, କଳାହାଣ୍ଡି ଓ ବ୍ରହ୍ମପୁର ଚାରିଟି ଲୋକସଭା ଆସନ ଏବେ ବିଜେଡି ଦଖଲରେ ଅଛି। ବିଜେଡି ଚାରିଟି ଯାକ ଲୋକସଭା ଆସନ ଦଳ ନିଜ ପାଖେ ପୂର୍ବଭଳି ସୁରକ୍ଷିତ ରଖିବାକୁ ଉଦ୍ୟମ କରୁଛି। ବିଜେପି ଓ କଂଗ୍ରେସ ସ୍ଥିତିରେ ସୁଧାର ଆସିବ ବୋଲି ଲକ୍ଷ୍ୟ ରଖିଛନ୍ତି।
Advertisment
publive-image୨୮ଟି ବିଧାନସଭା ଆସନକୁ ନେଇ ବି ବିଭିନ୍ନ ଦଳ ରଣନୀତିରେ ଚୂଡାନ୍ତ ସ୍ପର୍ଶ ଦେଉଛନ୍ତି। ୨୦୧୪ରେ ଏସବୁ ଆସନ ମଧ୍ୟରୁ ବିଜେଡି ସର୍ବାଧିକ ୨୦ଟି ଦଖଲ କରିଥିଲା। କଂଗ୍ରେସ ୬ ଓ ବିଜେପି ୨ଟି ଆସନରେ ବିଜୟୀ ହୋଇଥିଲା। ୨୦୧୯ ନିର୍ବାଚନରେ ସବୁ ଦଳ ପରସ୍ପରକୁ ମାତ ଦେବା ଲାଗି ଯୋଜନା ଚଳାଇଛନ୍ତି । ଅବିଭକ୍ତ କୋରାପୁଟ ଜିଲ୍ଲାରେ ପଦ୍ମ ଫୁଟାଇବା ଲକ୍ଷ୍ୟରେ ରହିଛି ବିଜେପି। କଳାହାଣ୍ଡି, ବ୍ରହ୍ମପୁର ବିଜେଡି ଗଡରେ ମଧ୍ୟ ଧସେଇ ପଶିବା ଲାଗି ଦଳ ପ୍ରାଣମୂର୍ଚ୍ଛା ଉଦ୍ୟମ କରୁଛି। ଅବିଭକ୍ତ କୋରାପୁଟ ଜିଲ୍ଲାରେ ଗଡ ସୁରକ୍ଷିତ ରଖିବା ସହିତ କଳାହାଣ୍ଡି ଜିଲ୍ଲାରେ ନିଜ ଉପସ୍ଥିତି ଜାହିର କରିବା ପାଇଁ ଠୋସ ରଣନୀତି କରିଛି କଂଗ୍ରେସ।
publive-imageଅନ୍ୟପକ୍ଷରେ ଅବିଭକ୍ତ କୋରାପୁଟ ଜିଲ୍ଲା ଓ ନୂଆପଡାରୁ ବିରୋଧୀଙ୍କୁ ବେଦଖଲ କରି ନିଜର ପୂର୍ବ ଆସନକୁ ସୁରକ୍ଷିତ ରଖିବା ଲାଗିବିଜେଡି ରଣନୀତି ତିଆରି କରିଥିବା ଦଳ କହିଛି। ଏସବୁକୁ ନେଇ ଆସନ୍ତାକାଲି ୨୧୭ ପ୍ରାର୍ଥୀଙ୍କ ଭାଗ୍ୟ ଇଭିଏମରେ ବନ୍ଦ ହେବ। ଏହି ପର୍ଯ୍ୟାୟ ନିର୍ବାଚନ ରାଜ୍ୟ ରାଜନୀତି ପାଇଁ ବେଶ ଗୁରୁତ୍ବ ରଖୁଛି। କାରଣ ବିଜେପି ରାଜ୍ୟ ସଭାପତି ବସନ୍ତ ପଣ୍ଡା,କଂଗ୍ରେସ କାର୍ଯ୍ୟକାରୀ ସଭାପତି ପ୍ରଦୀପ ମାଝୀଙ୍କ ପ୍ରତିନିଧିତ୍ବ ନେଇ ଭୋଟର ନିଜର ରାୟ ଦେବେ।
publive-imageରାଜ୍ୟ ସରକାରଙ୍କର ତିନି ଜଣ ମନ୍ତ୍ରୀ ରମେଶ ମାଝୀ,ସୂର୍ଯ୍ୟ ନାରାୟଣ ପାତ୍ର ଓ ଉଷା ଦେବୀଙ୍କର ଲୋକପ୍ରିୟତା ମପାଯିବ। ପୂର୍ବତନ ମନ୍ତ୍ରୀ ପଷ୍ପେନ୍ଦ୍ର ସିଂହଦେଓ, ପ୍ରଦୀପ ନାୟକ, ଭୂପିନ୍ଦର ସିଂହ, ପ୍ରଦୀପ ପାଣିଗ୍ରାହୀ, ରବି ନାରାୟଣ ନନ୍ଦଙ୍କର ମଧ୍ୟ ଭାଗ୍ୟ ନିର୍ଧାରିତ ହେବ। ଏମାନଙ୍କ ବ୍ୟତୀତ ବିରୋଧୀ ଦଳ ମୁଖ୍ୟ ସଚେତକ ତାରା ପ୍ରସାଦ ବାହିନୀପତି, ପୂର୍ବତନ କେନ୍ଦ୍ରମନ୍ତ୍ରୀ ଚନ୍ଦ୍ରଶେଖର ସାହୁ, ଭକ୍ତ ଦାସଙ୍କ କପାଳ ଲେଖିବେ ଭୋଟର । ଏମାନଙ୍କୁ ମିଶାଇ ପାଖାପାଖି ୩୦ ହେଭିୱେଟ ନେତାଙ୍କ ଉପରେ ରହିଛି ନଜର।