ରାଷ୍ଟ୍ରପତିଙ୍କ ଅଶ୍ୱବାହିନୀ ! ଯେଉଁମାନେ ରାଷ୍ଟ୍ରପତିଙ୍କୁ ଛାଇ ଭଳି ଜଗି ରହି ଦେଇଥାନ୍ତି ସୁରକ୍ଷା
ଆଜି ପୂରା ଦେଶ ପାଳନ କରୁଛି ୭୦ତମ ସାଧାରଣତନ୍ତ୍ର ଦିବସ । ଆଉ ଏହି ଅବସରରେ ଭାରତୀୟ ସେନା ଦିଲ୍ଲୀ ରାଜମାର୍ଗରେ ନିଜର ଦମ ଦେଖାଇଛି । ପୂରା ବିଶ୍ୱ ଭାରତୀୟ ସାମରିକ ଶକ୍ତିର ଝଲକ ଦେଖିଛି । ଯବାନ ମାନେ ପରେଡରେ ଦୁଃସାହସିକ ଯୁଦ୍ଧ କୌଶଳ ଦେଖାଇବା ସହ ଦେଶବାସୀଙ୍କ ମନ ଜିଣିଛନ୍ତି । ଆଉ ଏଭଳି ଏକ ସମୟରେ ସମସ୍ତଙ୍କ ନଜର ରାଷ୍ଟ୍ରପତିଙ୍କ ସେହି ଅଶ୍ୱବାହିନୀ ଅଙ୍ଗରକ୍ଷକ ଉପରେ ରହିଥିଲା ଯେଉଁମାନେ ସବୁ ସମୟରେ ଛାଇ ଭଳି ରାଷ୍ଟ୍ରପତିଙ୍କୁ ସୁରକ୍ଷା ଯୋଗାଇ ଦେଇ ଆସୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦୃଢ ଚେହେରା, ପାରମ୍ପରିକ ସୈନ୍ୟ ପୋଷାକରେ ନଜର ଆସୁଥିବା ଏହି ରାଷ୍ଟ୍ରପତିଙ୍କ ଅଶ୍ୱବାହିନୀର ଏହି ସୈନିକ ମାନେ ଖାସକରି ଗଣତନ୍ତ୍ର ଦିବସ ଭଳି ସ୍ୱତନ୍ତ୍ର ଦିବସରେ ନଜର ଆସିଥାନ୍ତି । ଖାସକରି ରାଷ୍ଟ୍ରପତି ଭବନରେ ବିଶେଷ କାର୍ଯ୍ୟକ୍ରମରେ ଏମାନଙ୍କୁ ଦେଖିବାକୁ ମିଳିଥାଏ । ରାଷ୍ଟ୍ରପତିଙ୍କୁ ଚାରିପଡୁ ଘେରି ରହିବା ସହ ସୁରକ୍ଷା ଦେଇଥାନ୍ତି ଏହି ଅଶ୍ୱବାହିନୀ । ଆସନ୍ତୁ ଜାଣିବା ରାଷ୍ଟ୍ରପତିଙ୍କ ଅଶ୍ୱବାହିନୀ ବିଷୟରେ କିଛି ।
ରାଷ୍ଟ୍ରପତିଙ୍କ ବଡିଗାର୍ଡ ବା ପିବିଜି:
ରାଷ୍ଟ୍ରପତିଙ୍କ ଅଙ୍ଗରକ୍ଷକଙ୍କୁ ଇଂରାଜୀରେ ପ୍ରେସିଡେଣ୍ଟ ବଡିଗାର୍ଡ ବା ପିବିଜି କୁହାଯାଇଥାଏ । ଆଉ ଏହି ୟୁନିଟର ଗଠନ ୨୫୦ ବର୍ଷ ତଳେ ହୋଇଥିଲା । ୧୭୭୩ ମସିହାରେ ବାରେନ ହାଷ୍ଟିଙ୍ଗସ ଭାରତର ଭାଇସରୟ ହେବା ପରେ ସୁରକ୍ଷା ପାଇଁ ଏହି ୟୁନିଟିର ଗଠନ ହୋଇଥିଲା । ସେତେବେଳେ ଯୁଦ୍ଧ କୌଶଳରେ ମାହିର ଥିବା ୫୦ ଜଣ ଲମ୍ବା ଉଚ୍ଚତା ଥିବା ଯବାନଙ୍କୁ ଏହି ଗ୍ରୁପରେ ସାମିଲ କରିଥିଲେ । ଏହାପରେ ବନାରସ ରାଜା ଚୈତ୍ୟ ସିଂ ଆହୁରି ୫୦ ଜଣ ସୈନ୍ୟଙ୍କୁ ଏହି ରେଜିମେଣ୍ଟରେ ସାମିଲ କରିବାରୁ ଗ୍ରୁପର ସଦସ୍ୟଙ୍କ ସଂଖ୍ୟା ୧୦୦ରେ ପହଞ୍ଚିଥିଲା । ୧୯୪୭ ମସିହାରେ ଦେଶ ସ୍ୱାଧୀନ ହେବା ପରେ ମଧ୍ୟ ଏହି ପରମ୍ପରା ଜାରି ରହିଛି । ସ୍ୱାଧୀନତା ପୂର୍ବରୁ ଏହି ରେଜିମେଣ୍ଟ ଭାଇସରୟଙ୍କୁ ସୁରକ୍ଷା ଦେଉଥିବା ବେଳେ ଏବେ ରାଷ୍ଟ୍ରପତିଙ୍କୁ ସୁରକ୍ଷା ଯୋଗାଇ ଦେଉଛନ୍ତି ।
ଏହି ରେଜିମେଣ୍ଟରେ ଭାରତୀୟ ସେନାର ବିଭିନ୍ନ ଟ୍ରୁପରୁ ଯବାନ ମାନଙ୍କୁ ଚୟନ କରାଯାଇଥାଏ । ଯେଉଁମାନଙ୍କୁ ପାରା ଟ୍ରେନିଂ ସମେତ ବିଭିନ୍ନ ଯୁଦ୍ଧ କୌଶଳର ପ୍ରଶିକ୍ଷଣ ଦିଆଯାଇଥାଏ । ତେବେ ଏମାନେ ଘୋଡାରେ ବସି ରାଷ୍ଟ୍ରପତିଙ୍କୁ ସୁରକ୍ଷା ଦେଉଥିବାରୁ ସମସ୍ତଙ୍କର ଦୃଷ୍ଟି ଆକର୍ଷଣ କରିଥାନ୍ତି । ପ୍ରତି ଯବାନ ମାନେ ଅଶ୍ୱଚାଳନାରେ ମହାରଥ ହାସଲ କରିଥାନ୍ତି । ଏହି ଘୋଡା ଗୁଡିକ ମଧ୍ୟ ଅନ୍ୟ ଘୋଡାଙ୍କ ଅପେକ୍ଷା ଦେଖିବାକୁ ଖୁବ୍ ସୁନ୍ଦର । ପାଖାପାଖି ୫୦୦ କିଲୋଗ୍ରାମର ଏହି ଘୋଡା ଗୁଡିକ ଘଣ୍ଟାପ୍ରତି ୫୦ କିଲୋମିଟର ବେଗରେ ଦୌଡି ପାରନ୍ତି ।
ରାଷ୍ଟ୍ରପତିଙ୍କ ଅଙ୍ଗରକ୍ଷକ ମାନେ ମଧ୍ୟ ଦିନର ଆରମ୍ଭ ଅଶ୍ୱ ସହିତ କରିଥାନ୍ତି । ଏହି ଯବାନ ମାନେ ଅଶ୍ୱଚାଳନାରେ ଏତେ ମାହିର ଥାନ୍ତି ଯେ, ଘଣ୍ଟାପ୍ରତି ୫୦ କିଲୋମିଟର ବେଗରେ ମଧ୍ୟ ଲଗାମ ନ ଧରି ଅଶ୍ୱଚାଳନା କରିପାରନ୍ତି । ରାଷ୍ଟ୍ରପ୍ରତି ଭବନକୁ କୌଣସି ମାନ୍ୟଗଣ ଅତିଥି ଆସିଲେ ସେମାନଙ୍କୁ ସ୍ୱାଗତ କରିବାକୁ ଏମାନେ ସ୍ୱତନ୍ତ୍ର ଭାବେ ପ୍ରସ୍ତୁତ ହୋଇଥାନ୍ତି । ଏହାଛଡା ରାଷ୍ଟପ୍ରତି ଯେବେ ରାଷ୍ଟ୍ରୀୟ ଧ୍ୱଜ ଅଶ୍ୱବାହିନୀକୁ ଦେଇଥାନ୍ତି ତାହା ଏମାନଙ୍କ ପାଇଁ ବେଶ ଖାସ୍ ହୋଇଥାଏ ।
ରାଷ୍ଟ୍ରପତିଙ୍କ ଅଶ୍ୱବାହିନୀରେ ସାମିଲ ଥିବା ଯବାନ ମାନେ ଏତେ ଦକ୍ଷ ଯେ, ଦେଶରେ ଯେକୌଣସି ସ୍ଥାନରେ ମଧ୍ୟ ଏମାନଙ୍କୁ ପୋଷ୍ଟିଂ କରାଯାଇପାରିବ । ସିଆଚେନର ମାଇନସ ଡିଗ୍ରୀ ତାପମାତ୍ରା ଠାରୁ ଆରମ୍ଭ କରି ରାଜସ୍ଥାନର ଅସହ୍ୟ ଖରାରେ ମଧ୍ୟ ଏମାନେ ବେଶ ସହଜରେ ଦେଶ ପାଇଁ କାମ କରିପାରିବେ । ଏଥିପାଇଁ ଏମାନଙ୍କୁ ବିଶେଷ ପ୍ରଶିକ୍ଷଣ ଦିଆଯାଇଥାଏ । ତେବେ ପିବିଜି ଗ୍ରୁପରେ ୬ ଫୁଟରୁ ଅଧିକ ଉଚ୍ଚତା ଥିବା ଯବାନ ମାନଙ୍କୁ ସାମିଲ କରାଯାଇଥାଏ । ଏହି ମର୍ଯ୍ୟାଦାପୂର୍ଣ୍ଣ ରେଜିମେଣ୍ଟରେ ସାମିଲ ହେବାକୁ ଯବାନ ମାନେ ଦୀର୍ଘ ଦିନ ଧରି ପ୍ରତୀକ୍ଷା କରିଥାନ୍ତି । କିଛି ଦିନ ପୂର୍ବରୁ ଏହି ରେଜିମେଣ୍ଟର ୯ଟି ପୋଷ୍ଟରେ ପୋଷ୍ଟିଂ ପାଇଁ ୧୦ ହଜାରରୁ ଅଧିକ ଆବେଦନ ଆସିଥିଲା । ଯାହା ଦର୍ଶାଉଥିଲା ଏହି ରେଜିମେଣ୍ଟ ଭାରତୀୟ ଯବାନଙ୍କ କେତେ ଗୁରୁତ୍ୱପୂର୍ଣ୍ଣ ।