ଟୁୁକୁନି ସାହୁଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଲେ ଟିଟିଲାଗଡ଼ ପୌରାଧ୍ୟକ୍ଷା : ମନ୍ତ୍ରୀ ତାଙ୍କୁ ଦୁର୍ବ୍ୟବହାର ପ୍ରଦର୍ଶନ କରିଥିବା କହିଲେ ମମତା ଦେବୀ ଜୈନ
କନକ ବ୍ୟୁରୋ : ମନ୍ତ୍ରୀ ଟୁକୁନି ସାହୁଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି ବଲାଙ୍ଗିର ଜିଲ୍ଲା ଟିଟିଲାଗଡ ପୌରାଧ୍ୟକ୍ଷା । ମନ୍ତ୍ରୀ ତାଙ୍କୁ ଦୁର୍ବ୍ୟବହାର ପ୍ରଦର୍ଶନ କରିଥିବା କହିଛନ୍ତି ପୌରାଧ୍ୟକ୍ଷା ମମତା ଦେବୀ ଜୈନ । ପୌର ପରିଷଦ କାର୍ଯ୍ୟାଳୟ ବାହାରେ ବଡପାଟି କରିବା ସହ କାନ୍ଦିକାନ୍ଦି ଅଭିଯୋଗ କରିଛନ୍ତି ପୌରାଧ୍ୟକ୍ଷା । ଗତକାଲି ପୌର ପରିଷଦର ପ୍ରଥମ ବୈଠକ ବସିଥିଲା । ଏବଂ ପ୍ରଥମ ବୈଠକ ହୋଇଥିବାରୁ ମନ୍ତ୍ରୀ ଟୁକୁନି ସାହୁଙ୍କୁ ନିମନ୍ତ୍ରଣ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଟିଟିଲାଗଡ ପୌର ପରିଷଦର ବିକାଶ ପାଇଁ ବୈଠକରେ ଆଲୋଚନା ହୋଇ ଅନେକ ଉନ୍ନୟନ ମୂଳକ ପ୍ରକଳ୍ପ ଅନୁମୋଦନ ହେବାର ଥିଲା । ପ୍ରଥମରୁ ବୈଠକ ଠିକଠାକ ଚାଲିଥିବାବେଳେ ପରେ ଦେଖା ଦେଇଥିଲା ବିବାଦ । ମନ୍ତ୍ରୀ ଟୁକୁନି ସାହୁ ଏବଂ ପୌରାଧ୍ୟକ୍ଷା ମମତା ଦେବୀ ଜୈନଙ୍କ ଭିତରେ କଥା କଟାକଟି ଦେଖିବାକୁ ମିଳିଥିଲା । ଫଳରେ ବୈଠକ ଅଧାରୁ ବନ୍ଦ ରହିଥିଲା । ପୌର ପରିଷଦର କୌଣସି ଉନ୍ନୟନ ମୂଳକ କାମ କରାଇଦେବେ ନାହିଁ ବୋଲି ମନ୍ତ୍ରୀ ଧମକ ଦେଇଥିବା ଅଭିଯୋଗ କରିଛନ୍ତି ପୌରାଧ୍ୟକ୍ଷା । ଏହାକୁ ନେଇ ମନ୍ତ୍ରୀଙ୍କ ସମର୍ଥକ ଓ ବିଜେପି ସମର୍ଥକଙ୍କ ଭିତରେ ପାଟିତୁଣ୍ଡ ଦେଖିବାକୁ ମିଳିଛି ।
ଘଟଣା ସଂପର୍କରେ ମନ୍ତ୍ରୀ ଟୁକୁନି ସାହୁଙ୍କ ପ୍ରତିକ୍ରିୟା ମିଳିପାରି ନାହିଁ । କିନ୍ତୁ ବିଜେଡି କାଉନସିଲର ଓ ଉପାଧ୍ୟକ୍ଷା ଏଭଳି ଅଭିଯୋଗକୁ ଖଣ୍ଡନ କରିଛନ୍ତି । ପୌରାଧ୍ୟକ୍ଷା ପାଟିତୁଣ୍ଡ କରିବାରୁ ବୈଠକ ଅଧାରୁ ବନ୍ଦ ହେଲା ବୋଲି ସେମାନେ ପାଲଟା ଅଭିଯୋଗ କରିଛନ୍ତି । ମନ୍ତ୍ରୀ ଦୁର୍ବ୍ୟବହାର କରିବା ଅଭିଯୋଗକୁ ମଧ୍ୟ ଅସ୍ୱୀକାର କରିଛନ୍ତି ବିଜେଡି କାଉନସିଲର । ଏଥର ପଂଚାୟତ ଓ ପୌର ପରିଷଦରେ ଡୁଆଲ ଭୋଟିଂ ହୋଇଛି । ଅର୍ଥାତ ପଂଚାୟତ ସମିତି ଅଧ୍ୟକ୍ଷ ଏବଂ ପୌର ପରିଷଦ ଅଧ୍ୟକ୍ଷ ପଦ ପାଇଁ ଅଲଗା ନିର୍ବାଚନ ହୋଇଥିଲା ।
ଟିଟିଲାଗଡରେ ମୋଟ୍ ୧୫ଟି କାଉନସିଲର ପଦବୀରୁ ବିଜେଡି ୧୦ ଓ ବିଜେପି ୫ଟିରେ ବିଜୟୀ ହୋଇଛି । ପୌରାଧ୍ୟକ୍ଷ ପଦ ମଧ୍ୟ ବିଜେପି ଖାତାକୁ ଯାଇଛି । ସଂଖ୍ୟା ଦୃଷ୍ଟିରୁ ଭଲ ସ୍ଥିତିରେ ଥିବା ବିଜେଡି ଓ ୫ଜଣ କାଉନସିଲରଙ୍କୁ ସାଙ୍ଗରେ ନେଇ ଦୁର୍ବଳ ସ୍ଥିତିରେ ଥିବା ବିଜେପି ପୌରାଧ୍ୟକ୍ଷଙ୍କ ଭିତରେ ଆଗକୁ ଏଭଳି କ୍ଷମତା ଲଢେଇ ଆହୁରି ଜୋରଦାର ହେବା ଆଶଙ୍କା କରାଯାଉଛି ।