ଟାଇଟନ ଲଞ୍ଚ କଲା ସ୍ମାର୍ଟ ଚଷମା । ସେଲଫି ନେବ, ଗୀତ ଶୁଣିହେବ । ଫୋନ କଲ ମଧ୍ୟ ରିସିଭ କରିପାରିବେ, ଜାଣନ୍ତୁ କେତେ ଟଙ୍କା ରହିଛି ଦାମ?

କନକ ବ୍ୟୁରୋ : ଆଇକେୟାର ସେକ୍ଟରରେ ବେଶ ଲୋକପ୍ରିୟ ଥିବା Titan Eye+ ଏକ ନୂଆ ସ୍ମାର୍ଟ ଚଷମା ଲଞ୍ଚ କରିଛି । Titan EyeX  ନାଁରେ ଏହି ଚଷମାକୁ ବଜାର ପ୍ରବେଶ କରାଇଛି ଟାଇଟନ କମ୍ପାନି । ଏହି ସ୍ମାର୍ଟ ଚଷମାକୁ ବିଭିନ୍ନ ସମୟରେ ଆପଣ ବ୍ୟବହାର କରିପାରିବେ । କମ୍ପ୍ୟୁଟର ସାମ୍ନାରେ ବସି ମଧ୍ୟ ଏହି ଚଷମାକୁ ବ୍ୟବହାର କରିପାରିବେ । ସବୁଠୁ ବଡ କଥା ହେଲା ଏହି ଚଷମାରେ ଆପଣ ଗୀତ ଶୁଣିପାରିବେ,ଫୋନ୍ କଲ ଶୁଣିପାରିବେ । ଏହି ସ୍ମାର୍ଟ ଚଷମାରେ ଅଡିଓ, ଟଚ୍, ଫିଟନେସ ଭଳି ଫିଚର୍ସ ରହିଛି । ଏହି ଚଷମା ସ୍ମାର୍ଟଫୋନ ଭଳି କ୍ୱାଲକମ ପ୍ରୋସେସର ଦ୍ୱାରା ଅପରେଟ ହୋଇଥାଏ ।

ଉଭୟ ଆଣ୍ଡ୍ରଏଡ ଓ ଆଇଓଏସ ଫୋନରେ ଏକ ନିଦ୍ଦିଷ୍ଟ ଆପ୍ ଦ୍ୱାରା ଏହି ସ୍ମାର୍ଟ ଚଷମା ଚାଲିପାରିବ । ଏହାର ବଜାର ମୂଲ୍ୟ ୯୯୯୯ ଟଙ୍କା ରହିଥିବା ବେଳେ ଥରେ ଚାର୍ଜ କଲେ ଏହା ଆଠ ଘଣ୍ଟା ପର୍ଯ୍ୟନ୍ତ ଚାଲିଥାଏ । ଏହାକୁ ଟାଇଟନର ଷ୍ଟୋରରୁ କିଣିପାରିବେ ୟୁଜର୍ସ ।

ଟାଇଟନ କମ୍ପାନି ଅନୁଯାୟୀ, ଏହି ସ୍ମାର୍ଟ ଚଷମା ସିଭିସି ଜ୍ଞାନକୌଶଳ ଦ୍ୱାରା ପରିଚାଳିତ । ଯାହାଦ୍ୱାରା ଅତି ସ୍ପଷ୍ଟ ଶବ୍ଦ ଶୁଭିଥାଏ । ଏହାକୁ ଅଡିଓ ଫିଚର ସହ ଯୋଡିଲେ ଆଖପାଖର ଶବ୍ଦକୁ ମଧ୍ୟ ଏହା ନିୟନ୍ତ୍ରଣ କରିଥାଏ । ଏଥିରେ ଫୋନ କଲର ସୁବିଧା ମଧ୍ୟ ରହିଛି । ଏହି ଚଷମାକୁ ପିନ୍ଧି ଆପଣ ଫୋନ୍ କଲ ରିସିଭ କରିପାରିବେ । ସବୁଠୁ ବଡ କଥା ହେଲା, ଏଥିରେ ସେଲଫି କ୍ଲିକ୍ କରିବା ସହ ଫୋନ୍ ଟ୍ରାକର ସୁବିଧା ମଧ୍ୟ ରହିଛି । ଯଦି କୌଣସି କାରଣରୁ ଚଷମାକୁ କେଉଁଠି ଛାଡି ଚାଲି ଯାଇଥାନ୍ତି ତେବେ ଏହାକୁ ଟ୍ରାକ କରି ଆପଣ ପାଇପାରିବେ ।