ନବୀନ ନିବାସରେ ବିଜେଡି ନେତାଙ୍କ ଭିଡ଼ । ବାୟୋଡାଟା ଧରି ଟିକେଟ ପାଇଁ ଲବି କଲେ ଆଶାୟୀ, ଅଧିକ ସଂଖ୍ୟାରେ ପହଁଚିଲେ ମହିଳା
କନକ ବ୍ୟୁରୋ : ନିର୍ବାଚନ ତାରିଖ ଘୋଷଣା ହୋଇନି, କିନ୍ତୁ ଏବେଠାରୁ ନବୀନ ନିବାସରେ ଲାଗିଲାଣି ଗହଳି । ରାଜ୍ୟର ବିଭିନ ନିର୍ବାଚନମଣ୍ଡଳୀରୁ ମାଳ ମାଳ ଆଶାୟୀ ବାୟୋଡାଟା ଧରି ନବୀନ ନିବାସରେ ଗହଳି କଲେଣି । ନବୀନ ନିବାସ ଆସୁଥିବା ଆଶାୟୀଙ୍କ ମଧ୍ୟରୁ ଅଧିକାଂଶ ହେଉଛନ୍ତି ମହିଳା । ଏବେ ଆସନ୍ତୁ ନଜର ପକାଇବା ଆଜି ଆସିଥିବା କିଛି ପ୍ରମୁଖ ଆଶାୟୀଙ୍କ ଉପରେ ।
Kanak News is now on WhatsApp
Join and get latest news updates delivered to you via WhatsApp
ଜ୍ୟୋତି ପାଣିଗ୍ରାହୀ, ପୂର୍ବତନ ଅଧ୍ୟକ୍ଷା, ରାଜ୍ୟ ମହିଳା କମିଶନ
ଜ୍ୟୋତି ବଲାଙ୍ଗିର ସଦର ଆସନରୁ ବିଧାନସଭା ଲଢିବା ପାଇଁ ଆଗ୍ରହ ପ୍ରକାଶ କରିଛନ୍ତି । ମହିଳାଙ୍କୁ ନବୀନ ପଟ୍ଟନାୟକ ଗୁରୁତ୍ୱ ଦେଉଥିବାରୁ ଏଥର ନିର୍ବାଚନରେ ମହିଳାଙ୍କୁ ଅଧିକ ଟିକେଟ ଦେବେ ବୋଲି ଆଶା ରଖିଛନ୍ତି ।
ଅଶୋକ ପାଙ୍ଗି, ପୂର୍ବତନ ମନ୍ତ୍ରୀ, ଜୟରାମ ପାଙ୍ଗୀଙ୍କ ପୁଅ
ଅଶୋକ ପାଙ୍ଗି ପଟାଙ୍ଗୀ ଆସନରୁ ଲଢିବାକୁ ଇଚ୍ଛା ପ୍ରକାଶ କରି ନବୀନ ନିବାସରେ ବାୟୋଡଟା ଦେଇଛନ୍ତି ।
ସେହିଭଳି ରାଜ୍ୟ ମହିଳା କମିଶନର ପୂର୍ବତନ ସଦସ୍ୟା ସୁନନ୍ଦା ପତି, ଯାଜପୁରର ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷ ସୁଶାନ୍ତ ମିଶ୍ର ବି ବରୀ ନିର୍ବାଚନ ମଣ୍ଡଳୀ ପାଇଁ ପ୍ରାର୍ଥୀ ହେବାକୁ ଇଚ୍ଛା ପ୍ରକାଶ କରି ଆବେଦନ କରିଛନ୍ତି । ଜଗତସିଂହପୁରର ବାଲିକୁଦା ଏରସମା ବିଧାନସଭା ଆସନ ପାଇଁ ନବୀନ ନିବାସରେ ବାୟୋଡାଟା ଦେଇଛନ୍ତି ଶୈଳବାଳା ରାଉତ ।
ନବୀନ ନିବାସ ଆସୁଥିବା ଅଧିକାଂଶ ଆଶାୟୀଙ୍କ ନଜର ହେଉଛି ବିଧାନସଭା ଆସନ ଉପରେ । ଭୋଟ ପାଇଁ ସମୟ ଯେତେ ପାଖେଇ ଆସୁଛି ଆଶାୟୀ ବି ନବୀନ ନିବାସ ମୁହାଁ ହୋଇଛନ୍ତି । ଆଗକୁ ଏ ସଂଖ୍ୟା ବଢିପାରେ । ସମସ୍ତଙ୍କ ଅପେକ୍ଷା କାହାମୁଣ୍ଡରେ ସୁନାକଳସ ଢାଳିବେ ନବୀନ?