କ୍ରିପଟୋ କାହାଣୀରେ ଚର୍ଚ୍ଚାକୁ ଆସିଲା ଡାକୁର ଆୟ ଉପରେ ଟିକସ । ଚମ୍ବଲ ଡାକୁର ଆୟ ଉପରେ ଟିକସ ଲାଗିବା ନେଇ ରାୟ ଦେଇଥିଲେ ସୁପ୍ରିମକୋର୍ଟ
କନକ ବ୍ୟୁରୋ: ଜୁଆ ଓ ଘୋଡା ଦୌଡ ପରି କ୍ରିପଟୋ କରେନ୍ସିରୁ ଆୟ ମଧ୍ୟ ବେଆଇନ୍ । ହେଲେ ସରକାର ବଜେଟରେ ଏହା ଉପରେ ୩୦ ପ୍ରତିଶତ ଟିକସ ବସାଇଛନ୍ତି । ଆଉ ଏ ପରିପ୍ରେକ୍ଷୀରେ ସାମ୍ନାକୁ ଆସୁଛି ଏକ ପୁରୁଣା ରୋଚକ କାହାଣୀ । ଚମ୍ବଲର ଡାକୁ ପିଆରା ସିଂ ସଂପର୍କରେ ସୁପ୍ରିମକୋର୍ଟ କହିଥିଲେ, ଆୟ ଆଇନସିଦ୍ଧ ହେଉ କିମ୍ବା ବେଆଇନ୍ ତା’ଉପରେ ସରକାରଙ୍କୁ ଟିକସ ଦେବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
କ୍ରିପଟୋ କରେନ୍ସି କାରବାରକୁ ସରକାର ଆଇନସିଦ୍ଧ କିମ୍ବା ବୈଧ ଘୋଷଣା କରିନାହାନ୍ତି, କିନ୍ତୁ ସେହି କାରବାରରୁ ଟିକସ ନେବାକୁ ଘୋଷଣା କରିଛନ୍ତି । ତେଣୁ ଅନେକ ଏହାକୁ ବେଆଇନ ବୋଲି କହିବା ଆରମ୍ଭ କରିଛନ୍ତି । ହେଲେ ବଜେଟ୍ ଉପସ୍ଥାପନ ପରେ ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଥିଲେ ଯେ, ଆୟ ଯେଉଁ ସୂତ୍ରରୁ ହେଉପଛେ ଆୟକର ବ୍ରାକେଟକୁ ଆସୁଥିଲେ ସରକାର ତା ଉପରୁ ଟିକସ ନେବେ ।
ଆମ ଦେଶରେ ଆୟକର ଅଧିନିୟମ ୧୯୬୧ ଆଧାରରେ ଟିକସ ଆଦାୟ ହେଉଛି । ଏଥିରେ ଆୟ ଉପରେ ଟିକସ ବସାଇବାକୁ କୁହାଯାଇଛି । ତେବେ ସେହି ଆୟ ଆଇନ ସମ୍ମତ କିମ୍ବା ବେଆଇନ ସେନେଇ କିଛି କୁହାଯାଇ ନାହିଁ । ତେବେ ଏହି କ୍ରମରେ ଅତୀତର ଏକ ରୋଚକ କାହାଣୀ ସାମ୍ନାକୁ ଆସିଛି । ଆୟ ଆଇନ ସମ୍ମତ ହେଉ କିମ୍ବା ବେଆଇନ, ଆୟକର ବିଭାଗ ତା ଉପରେ ଟିକସ ଆଦାୟ କରିପାରବ ବୋଲି ସୁପ୍ରିମକୋର୍ଟଙ୍କ ରାୟ ବି ରହିଛି ।
ଚମ୍ବଲ ଡାକୁର ଆୟକର କାହାଣୀ
- ୧୯୫୮ରେ ଭାରତ-ପାକିସ୍ତାନ ସୀମାରୁ ଧରା ପଡିଥିଲା ଚମ୍ବଲର ଡାକୁ ପିଆରା ସିଂ
- ତାର ସମସ୍ତ ଚୋରି ସଂପତ୍ତି, ଟଙ୍କା ଓ ସୁନାକୁ ଜବତ କରିଥିଲା ପୋଲିସ
- ଆୟକର ଅଧିନିୟମ ୧୯୨୨ରେ ତାର ଆୟ ଉପରେ ଟିକସ ବସାଯାଇଥିଲା
- ମାମଲା ସୁପ୍ରିମକୋର୍ଟ ଯିବା ପରେ ପିଆରା ଯୁକ୍ତି କରିଥିଲା ସେ ଆୟକର ଦେବାକୁ ଅକ୍ଷମ
- କାରଣ ତାର ସମସ୍ତ ସଂପତ୍ତିିକୁ ବେଆଇନ ଦର୍ଶାଇ ଜବତ କରିନେଇଛନ୍ତି ସରକାର
- ସୁପ୍ରିମକୋର୍ଟଙ୍କ ରାୟ ଥିଲା- ଆୟ ବେଆଇନ ହେଉ ବା ଆଇନ ସମ୍ମତ ଟିକସ ପଡିବ
କ୍ରିପଟୋ କରେନ୍ସିର ମୁକାବିଲା କରିବା ପାଇଁ ଭାରତ ସରକାର ନିଜସ୍ୱ ଡିଜିଟାଲ କରେନ୍ସି ଆଣିବାକୁ ଯାଉଛନ୍ତି । ଯାହାକୁ ଆଗାମୀ ଏପ୍ରିଲରେ ଜାରି କରିବେ ଭାରତୀୟ ରିଜର୍ଭ ବ୍ୟାଙ୍କ । ହେଲେ କ୍ରିପଟୋ କରେନ୍ସିରୁ ଆୟ ଉପରେ ୩୦ ପ୍ରତିଶତ ଟିକସ ଆଦାୟ କରିବାକୁ ୨୦୨୨-୨୩ ବଜେଟରେ ଘୋଷଣା କରାଯାଇଛି ।