କନକ ବ୍ୟୁରୋ : ଭସାଇନେଲା ମହାନଦୀ । ସମ୍ବଲପୁର ମହାନଦୀରେ ଅଘଟଣ ଘଟିଛି । ସମ୍ବଲପୁରର ଦଳେଇପଡା ଘାଟରେ ଭାସିଯାଇଥିବା ବାପା, ପୁଅ ଓ ଝିଅଙ୍କ ମଧ୍ୟରୁ ବାପା ଓ ପୁଅ ପ୍ରାଣ ହରାଇଥିବାବେଳେ ଝିଅ ଏବେ ବି ନିଖୋଜ ଅଛନ୍ତି । ଉଦ୍ଧାର କାର୍ଯ୍ୟରେ ଅଗ୍ନିଶମ ବାହିନୀ ନିୟୋଜିତ ହୋଇଥିଲେ । ସ୍ଥାନୀୟ ଲୋକେ ପ୍ରଥମେ ପୁଅକୁ ଉଦ୍ଧାର କରି ତାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତି କରିିଥିଲେ । କିନ୍ତୁ ପରେ ତାଙ୍କର ମୃତ୍ୟୁ ହୋଇଛି । ଏହା ପରେ ପରେ ବାପାଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲା ଅଗ୍ନିଶମ ବିଭାଗ । ସେ ବି ପ୍ରାଣ ହରାଇଛନ୍ତି । ତେବେ ଝିଅ ଏବେବି ନିଖୋଜ ଅଛନ୍ତି । ନିକଟସ୍ଥ ପେନସନ ପଡାର ଗୋଟିଏ ପରିବାରର ଏହି ୩ଜଣ ଗାଧେଇବାକୁ ଯାଇଥିବା ବେଳେ ଏହି ଅଘଟଣ ଘଟିଥିଲା । ମହାନଦୀରେ ପ୍ରବଳ ପାଣି ସ୍ରୋତ ଥିବା ବେଳେ ୩ଜଣ ଯାକ ଭାସି ଯାଇଥିଲେ । ରାତିରେ ଉଦ୍ଧାର କାମ ବନ୍ଦ ଥିବାବେଳେ ଆଜି ଏହା ପୁଣି ଆରମ୍ଭ ହେବ ।
Kanak News is now on WhatsApp
Join and get latest news updates delivered to you via WhatsApp
ସୋମବାର ଅପରାହ୍ଣ ୪ଟାରେ ସମ୍ବଲପୁର ପେନ୍ସନପଡ଼ା ନିବାସୀ ମହମ୍ମଦ ଅଲ୍ତାଫ୍ ସ୍କୁଟିରେ ନିଜ ସ୍କୁଲ୍ ପଢ଼ୁଆ ପୁଅ ମହମ୍ମଦ ଅଫ୍ତାବ ଓ ଝିଅ ରୁକ୍ସାନା ଖାତୁନ୍ଙ୍କୁ ଧରି ଗାଧୋଇବାକୁ ମହାନଦୀର ଦଲେଇପଡ଼ା ମହିଳା ଘାଟକୁ ଯାଇଥିଲେ । ଘାଟରେ ସେତେବେଳେ କେବଳ ଜଣେ ମହିଳା ଗାଧୋଉଥିଲେ । ରୁକ୍ସାନା ଖାତୁନ ଗାଧୋଇବାକୁ ପାଣି ଭିତରକୁ ପଶିବାର ମାତ୍ର କିଛି ସମୟ ଭିତରେ ସ୍ରୋତରେ ଭାସି ଯାଇଥିଲେ । ଭଉଣୀ ରୁକ୍ସାନାଙ୍କୁ ବଞ୍ଚାଇବା ପାଇଁ ଭାଇ ଅଫତାବ୍ ପାଣି ଭିତରକୁ ଲମ୍ଫ ଦେଇଥିଲେ । ଦୁର୍ଭାଗ୍ୟକୁ ସେ ମଧ୍ୟ ଭାସି ଯାଇଥିଲେ । ଏହିସମୟରେ ସେଠାରେ ଗାଧୋଉଥିବା ମହିଳା ଜଣକ ଚିତ୍କାର କରି ଉଠିଥିଲେ । ମହିଳାଙ୍କ ଚିତ୍କାର ଶୁଣି ଅଲ୍ତାଫ୍ ପୁଅ,ଝିଅଙ୍କୁ ବଞ୍ଚାଇବା ପାଇଁ ସଙ୍ଗେସଙ୍ଗେ ଡେଇଁ ପଡ଼ିଥିଲେ । ମାତ୍ର ସେ ବି ଭାସି ଯାଇଥିଲେ ।
ଖବର ପାଇ ଅଗ୍ନିଶମ ବାହିନୀ ଓ ଟାଉନ ଥାନା ପୁଲିସ ଘଟଣାସ୍ଥଳରେ ପହଂଚିଥିଲେ । ଅଗ୍ନିଶମବାହିନୀ ସହିତ ସ୍ଥାନୀୟ ମତ୍ସ୍ୟଜୀବୀମାନେ ଖୋଜାଖୋଜି ଆରମ୍ଭ କରିଦେଇଥିଲେ । ପ୍ରାୟ ୫ଟା୪୫ରେ ଘଟଣାସ୍ଥଳଠାରୁ ପ୍ରାୟ ୫୦ ମିଟର ଦୂରରେ ଗଭୀର ପାଣି ଭିତରୁ ମତ୍ସ୍ୟଜୀବୀମାନେ ଅଫ୍ତାବଙ୍କୁ ଉଦ୍ଧାର କରିଥିଲେ। ତାଙ୍କୁ ଚିକିତ୍ସା ପାଇଁ ପୁଲିସ ଗାଡ଼ିରେ ସଦର ଡାକ୍ତରଖାନାକୁ ନିଆଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏପଟେ ଅନ୍ଧାର ହୋଇଯିବା କାରଣରୁ କିଛି ସମୟ ପାଇଁ ଉଦ୍ଧାର କାର୍ଯ୍ୟ ବନ୍ଦ ରହିଥିଲା । ଆଲୋକ ବ୍ୟବସ୍ଥା ହେବାପରେ ପୁଣି ୭ଟା ପରେ ଖୋଜାଖୋଜି ଆରମ୍ଭ ହୋଇଥିଲା । ମତ୍ସ୍ୟଜୀବୀମାନେ ଜାଲ ସହାୟତାରେ ମହମ୍ମଦ ଅଲ୍ତାଫଙ୍କୁ ଉଦ୍ଧାର କରିଥିଲେ। ତାଙ୍କୁ ତୁରନ୍ତ ସଦର ଡାକ୍ତରଖାନା ନିଆଯାଇଥିବା ବେଳେ ସେଠାରେ ଡାକ୍ତର ମୃତ ଘୋଷଣା କରିଥିଲେ । ଖବର ଲେଖାଯିବା ପର୍ଯ୍ୟନ୍ତ ରୁକ୍ସାନାଙ୍କ ସନ୍ଧାନ ମିଳିପାରିନାହିଁ । ରୁକ୍ସାନା ଓ ଅଫ୍ତାବ ଭଉୟେ ହିନ୍ଦୀ ନୋଡାଲ ସ୍କୁଲରେ ଯଥାକ୍ରମେ ସପ୍ତମ ଓ ଦଶମ ଶ୍ରେଣୀରେ ଅଧ୍ୟୟନ କରୁଥିଲେ ।