ଗୋଟିଏ ପଟେ ଓମିକ୍ରନ ପାଇଁ କଟକଣା ଲଗାଉଛନ୍ତି ସରକାର । ସେପଟେ ଉତ୍ତରପ୍ରଦେଶ ରାଲିରେ ହଜାର ହଜାର ଲୋକଙ୍କ ଭିଡ

କନକ ବ୍ୟୁରୋ: କରୋନାର ନୂଆ ପ୍ରଜାତି ଓମିକ୍ରନ ପାଇଁ ସାରା ଦେଶରେ ପୁଣିଥରେ ଆତଙ୍କ ଖେଳିଯାଇଛି । ଦ୍ରୁତ ଗତିରେ ବ୍ୟାପୁଥିବା ଓମିକ୍ରନ୍ ପାଇଁ କେନ୍ଦ୍ର ସରକାର ଓ ରାଜ୍ୟ ସରକାରମାନେ ଅନେକ କଟକଣା ଲଗାଉଛନ୍ତି । ସାର୍ବଜନୀନ ସ୍ଥାନରେ ଗହଳି ନକରିବା, ନାଇଟ୍ କର୍ଫ୍ୟୁ ଲଗାଇବା ଭଳି ଅନେକ ନିୟମ ଲାଗୁ ହୋଇଛି । ହେଲେ ଉତ୍ତରପ୍ରଦେଶ ନିର୍ବାଚନ ର୍ୟାଲିରେ ଏସବୁ କଟକଣାକୁ ଫୁ କରିଦିଆଯାଇଛି ।

ହଜାର ହଜାର ସଂଖ୍ୟକ ଲୋକ ଉତ୍ତରପ୍ରଦେଶର ବିଭିନ୍ନ ରାଲିରେ ଏଭଳି ରୁଣ୍ଡ ହୋଇଛନ୍ତି, ଯେପରି ସେମାନଙ୍କୁ କରୋନା ପାଇଁ କୌଣସି ଭୟ ନାହିଁ । ଶୁକ୍ରବାର ଯେତେବେଳେ ଉତ୍ତରପ୍ରଦେଶ ବରେଲିରେ ନିର୍ବାଚନ ପ୍ରଚାର ପାଇଁ ପହଁଚିଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ସେତେବେଳେ ଲକ୍ଷାଧିକ ଲୋକ ତାଙ୍କ ପ୍ରଚାର ରାଲିରେ ସାମିଲ ହୋଇଥିଲେ । ଯେତେବେଳେ କରୋନାର ନୂଆ ଭାରିଆଣ୍ଟ ଓମିକ୍ରନ୍ ପାଇଁ ଅନେକ କଟକଣା ଲଗାଯାଉଛି, ଲୋକଙ୍କୁ କରୋନା ଗାଇଡ୍ ଲାଇନ୍ ପାଳନ କରିବାକୁ ନିର୍ଦ୍ଦେଶ ଦିଆଯାଉଛି, ସେଠି ନେତାଙ୍କ ର୍ୟାଲିରେ କଟକଣାକୁ ଭାଙ୍ଗୁଥିବାର ଦୃଶ୍ୟ ଦେଖିବାକୁ ମିଳୁଛି ।

ମୁହଁରେ ନାହିଁ ମାସ୍କ, ସାମାଜିକ ଦୂରତା ପଚାରେ କିଏ । କରୋନା ଏବେ ଦେଶରେ ଉପରମୁହାଁ ଥିବାବେଳେ ନିଜେ ନେତା ହିଁ କଟକଣାକୁ ବେଖାତିର କରୁଛନ୍ତି । ଯାହା କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ରାଲି ସ୍ପଷ୍ଟ କରୁଛି । ଖାଲି ଅମିତ୍ ଶାହଙ୍କ ରାଲି କାହିଁକି ଶନିବାର ନୂଆବର୍ଷ ଅବସରରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ରାଲିରେ ମଧ୍ୟ ସମାନ ଦୃଶ୍ୟ ଦେଖିବାକୁ ମିଳିଛି ।

ତେବେ କେବଳ ବିଜେପି ନୁହେଁ ଆଗାମୀ ବିଧାନସଭା ନିର୍ବାଚନକୁ ନଜରରେ ରଖି ବିଭିନ୍ନ ରାଜନୈତିକ ଦଳ ଉତ୍ତରପ୍ରଦେଶରେ ବଡ ବଡ ନିର୍ବାଚନ ପ୍ରଚାର ରାଲି କରୁଛନ୍ତି । ସମାଜବାଦୀ ପାର୍ଟି ନେତା ଅଖିଳେଶ ଯାଦବ ବିଜୟ ଯାତ୍ରା ଜରିଆରେ ନିର୍ବାଚନ ରାଲି କରୁଛନ୍ତି । ସେପଟେ କଂଗ୍ରେସ ନେତା ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀ ମଧ୍ୟ ନିର୍ବାଚନ ପ୍ରଚାର ପାଇଁ ରାଲି କରୁଛନ୍ତି । ଯେଉଁଥିରେ କୋଭିଡ୍ ନିୟମ ଖୁଲମ୍ ଖୁଲା ଭଙ୍ଗ ହେଉଥିବା ଦେଖିବାକୁ ମିଳୁଛି । ଆଗକୁ ଉତରପ୍ରଦେଶ ସମେତ ୫ଟି ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଛି । ଏହାଭିତରେ ଦେଶକୁ ଓମିକ୍ରନ ଆତଙ୍କ ଘାରିଲାଣି । ଯାହାକୁ ନେଇ ଲୋକଙ୍କ ପାଇଁ କଟକଣା ଲଗାଯାଉଛି ସତ । ହେଲେ ନେତା ମାନେ ହିଁ ନିୟମକୁ ବେଖାତିର କରୁଥିବା ଏହି ନିର୍ବାଚନ ରାଲି ସ୍ପଷ୍ଟ କରୁଛି ।