ଏଥର ମାଟ୍ରିକ୍ ପରୀକ୍ଷାରେ ବଦଳିପାରେ ଶହେ ନମ୍ବରର ପରୀକ୍ଷା ବ୍ୟବସ୍ଥା । ୮୦ ନମ୍ବରରେ ପିଲାଙ୍କ ପାଇଁ ହୋଇପାରେ ପରୀକ୍ଷା
କନକ ବ୍ୟୁରୋ : କୋଭିଡ୍ କଟକଣା ଭିତରେ ନିୟମିତ ସ୍କୁଲ ପାଠପଢା ବନ୍ଦ ଥିବା ବେଳେ ଏଭଳି ଏକ ନିଷ୍ପତି ନେଇ ପାରେ ମାଧ୍ୟମିକ ଶିକ୍ଷା ବୋର୍ଡ । ଚଳିତ ଶିକ୍ଷା ବର୍ଷ ପଛାଇ ଯାଇଥିବାରୁ ଏଥର ମାଟ୍ରିକ ପରୀକ୍ଷା କିଭଳି କରାଯିବ ସେନେଇ ମଧ୍ୟ ଦ୍ୱନ୍ଦ୍ୱ ଜାରି ରହିଛି । ତେବେ ଚଳିତ ବର୍ଷ କମ୍ ମାର୍କରେ ପରୀକ୍ଷା ହେବା ସମ୍ଭାବନା ଥିବା ନେଇ ଚର୍ଚ୍ଚା ହେଉଛି । ପ୍ରତିବିଷୟ ୧୦୦ ନମ୍ବର ବଦଳରେ ୮୦ ନମ୍ବରରେ ହେବ ବୋଲି ସୂଚନା ମିଳିଛି । ଏଥିରେ ବିଷୟଭିତିକ ପ୍ରଶ୍ନ ଅଧିକ ରହିବ ବୋଲି କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
କୋଭିଡ୍ କଟକଣା ଯୋଗୁଁ ଅନ୍ଲାଇନ୍ ପାଠ ପଢା ହେଉଥିବାରୁ ଏହା ସାଧାରଣ ପିଲାଙ୍କ ପାଠ ପଢାକୁ ପ୍ରଭାବିତ କରିଛି । ତେଣୁ ପୂର୍ବରୁ ବୋର୍ଡ ସିଲାବସ୍ରେ ୩୦ ପ୍ରତିଶତ ପାଠ କମାଇଥିଲା । ଏହା ଆଧାରରେ ପ୍ରତିବିଷୟର ନମ୍ବର କମ୍ କରାଯିବ ବୋଲି କୁହାଯାଉଛି । ଅନ୍ୟପଟେ ପୂର୍ବରୁ ଗଣଶିକ୍ଷା ମନ୍ତ୍ରୀ ଅତିକମ୍ରେ ୧୦୦ ଦିନର ପାଠପଢା ହେବ ଏବଂ ତାହା ପରେ ପରୀକ୍ଷା କରାଯିବା ନେଇ ସଂକେତ ଦେଇଥିଲେ ।
ମାଟ୍ରିକ ପରୀକ୍ଷା ସମୟରେ ସାମାଜିକ ଦୂରତାକୁ ଗୁରୁତ୍ୱ ଦେବା ସହ ଅଳ୍ପ ସମୟରେ ଏହାକୁ ଶେଷ କରିବାକୁ ବୋର୍ଡ ଗୁରୁତ୍ୱ ଦେବ ବୋଲି ସୂଚନା ମିଳିଛି । ତେବେ ଚୂଡାନ୍ତ ରୂପରେଖ ପ୍ରସ୍ତୁତ ହେବା ପରେ ଏନେଇ ଗଣଶିକ୍ଷା ବିଭାଗ ସ୍ପଷ୍ଟ କରିବ ବୋଲି ଜଣାପଡିଛି ।