ନୂଆ ଭୋଟ୍, ପୁରୁଣା ପ୍ରାର୍ଥୀ: ପିପିଲି ଉପନିର୍ବାଚନ ପାଇଁ ହେବନାହିଁ ସାନି ନାମାଙ୍କନ
କନକ ବ୍ୟୁରୋ: ପିପିଲି ପାଇଁ ହେବ ନୂଆ ଭୋଟ୍ କିନ୍ତୁ ସେଇ ପୁରୁଣା ପ୍ରାର୍ଥୀ ରହିବେ । ପିପିଲି ଉପନିର୍ବାଚନ ପାଇଁ ଆଉ ହେବନାହିଁ ସାନି ନାମାଙ୍କନ । ପ୍ରମୁଖ ତିନିଟି ଦଳ ପୂର୍ବରୁ ଘୋଷଣା କରିଥିବା ପ୍ରାର୍ଥୀ ହିଁ ନିର୍ବାଚନ ଲଢିବେ । ବିଜେଡି ଟିକେଟରେ ଲଢିବେ ରୁଦ୍ର ମହାରଥୀ, ବିଜେପିରୁ ପ୍ରାର୍ଥୀ ହୋଇଛନ୍ତି ଆଶ୍ରୀତ ପଟ୍ଟନାୟକ ଓ କଂଗ୍ରେସରୁ ବିଶ୍ୱକେସନ ହରିଚନ୍ଦନ ମହାପାତ୍ର ଲଢିବେ ନିର୍ବାଚନ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ବିଜେଡି ପ୍ରାର୍ଥୀ ରୁଦ୍ର ମହାରଥୀଙ୍କ ବିଜୟ ସଂପର୍କରେ ମତ ରଖି ବିଜେଡି ବିଧାୟିକା ପ୍ରମିଳା ମଲ୍ଲିକ କହିଛନ୍ତି, ୪୦ ହଜାର ଭୋଟରେ ଜିତିବେ ରୁଦ୍ର । କରୋନା କାରଣରୁ ଦୁଇ ଦୁଇ ଥର ସ୍ଥଗିତ ରହିଥିଲା ପିପିଲି ଉପନିର୍ବାଚନ । ପିପିଲିର ପୂର୍ବତନ ବିଧାୟକ ସ୍ୱର୍ଗତ ପ୍ରଦୀପ ମହାରଥୀଙ୍କ ମୃତ୍ୟୁ ପରେ ପିପିଲି ବିଧାନସଭା ଆସନ ଖାଲି ପଡିଛି ।
ସେପ୍ଟେମ୍ବର ୩୦ରେ ହେବ ପିପିଲି ଉପନିର୍ବାଚନ । ସେପ୍ଟେମ୍ବର ୩୦ ତାରିଖରେ ପଡିବ ଭୋଟ୍, ଅକ୍ଟୋବର ୩ରେ ହେବ ଗଣତି । ଏନେଇ ଆଜି ତାରିଖ ଘୋଷଣା କରିଛନ୍ତି ନିର୍ବାଚନ କମିଶନ । ଭୋଟ ଗ୍ରହଣର ୯ ଦିନ ପୂର୍ବରୁ ପ୍ରଚାର ହେବ । ଅର୍ଥାତ୍ ସେପ୍ଟେମ୍ବର ୨୦ ତାରିଖରୁ ପ୍ରାର୍ଥୀମାନେ ନିଜ ସପକ୍ଷରେ ପ୍ରଚାର କରିପାରିବେ । କରୋନା କଟକଣା ଭିତରେ ପ୍ରଚାର କରାଯିବ । ନିର୍ବାଚନୀ ସଭା, ଶୋଭାଯାତ୍ରା କି ବାଇକ୍ ରାଲି ହୋଇପାରିବ ନାହିଁ । ପ୍ରାର୍ଥୀ ମାନେ ଘରକୁ ଘର ବୁଲି ଭୋଟ ପାଇଁ ପ୍ରଚାର କରିବେ । ଏଥିରେ ପ୍ରାର୍ଥୀଙ୍କ ସହ କେବଳ ୫ ଜଣ ରହିପାରିବେ ବୋଲି ନିର୍ବାଚନ କମିଶନ କହିଛନ୍ତି ।