ଦ୍ରୁତ ଟିକାକରଣ କରିବା ପାଇଁ କେନ୍ଦ୍ର ସରକାରଙ୍କ ବଡ ପଦକ୍ଷେପ । ଏଣିକ ବିଦେଶୀ ଟିକାର ହେବ ନାହିଁ ଦେଶି ଟ୍ରାଏଲ ।
କନକ ବ୍ୟୁରୋ: ଦ୍ରୁତ ଟିକାକରଣ କରିବା ପାଇଁ କେନ୍ଦ୍ର ସରକାରଙ୍କ ବଡ ପଦକ୍ଷେପ । ଏଣିକ ବିଦେଶୀ ଟିକାର ହେବ ନାହିଁ ଦେଶି ଟ୍ରାଏଲ । ପୂର୍ବରୁ ବିଦେଶୀ ଟିକାର ଦେଶରେ ପରୀକ୍ଷା ପାଇଁ ସରକାର ରଖିଥିବା ସର୍ତକୁ ହଟାଇ ନେଇଛନ୍ତି । ଫଳରେ ବିଦେଶୀରୁ ଟିକା ଆମଦାନୀ ବି ବଢିବ ଏବଂ ଟିକା ଆମଦାନୀ ପରେ ଏହା ତୁରନ୍ତ ଲୋକଙ୍କୁ ଦିଆଯାଇ ପାରିବ । ଆଗକୁ ମଡନା, ଫାଇଜର, ଜନସନ ଆଣ୍ଡ ଜନସନ ଭଳି ଟିକାର ସ୍ଥାନୀୟ ଟ୍ରାଏଲ ନକରାଯାଇ ଲୋକଙ୍କୁ ଦିଆଯାଇ ପାରିବ । ଦେଶରେ ଦ୍ୱିତୀୟ ଲହରର ଦ୍ରୁତ ସଂକ୍ରମଣର ମୁକାବିଲା ପାଇଁ ଭାରତରେ ଜୋରସୋରରେ ଟିକାକରଣ କରାଯାଉଛି । ହେଲେ ଟିକା ଅଭାବ, ଟିକାକରଣ ଅଭିଯାନରେ ବାଧକ ସାଜୁଛି । ଏହାର ସମାଧାନ ପାଇଁ ବିଦେଶୀ ଟିକା ପାଇଁ ନୀତି ପରିବର୍ତନ କରିଛନ୍ତି ଭାରତ ସରକାର ।
Kanak News is now on WhatsApp
Join and get latest news updates delivered to you via WhatsApp
କରୋନା ଭୂତାଣୁର ଦ୍ୱିତୀୟ ଲହରରେ ଦେଶରେ ଦ୍ରୁତ ଟିକାକରଣ କରିବା ପାଇଁ ଭାରତ ସରକାର ବଡ ପଦକ୍ଷେପ ନେଇଛନ୍ତି । ବିଦେଶରେ ନିର୍ମିତ କରୋନା ଟିକାକୁ ଭାରତରେ ମାନବ ପରୀକ୍ଷଣର ବାଧ୍ୟତା ମୂଳକ ସର୍ତ ଉପରେ ରୋକ ଲଗାଇଛନ୍ତି । ଭାରତ ସରକାରଙ୍କ ଏହି ପଦକ୍ଷେପ ପରେ ବିଦେଶୀ ଟିକା ଆମଦାନୀ ବଢିବ । ଆଉ ଟିକା ଆସିଲେ ଶୀଘ୍ର ଲୋକଙ୍କୁ ଟିକାକରଣ କରାଯାଇପାରିବ ।
ଭାରତ ସରକାର ବିଦେଶୀ ଟିକାର ଦେଶି ଟ୍ରାଏଲ ଉପରେ ଏପରି ସମୟରେ ରୋକ ଲଗାଇଛନ୍ତି । ଯେତେବେଳେ ମହାମାରୀ ଭୂତାଣୁର ଦ୍ୱିତୀୟ ଲହର ପୂର୍ବ ଅପେକ୍ଷା ଶାନ୍ତ ପଡିଥିଲେ ମଧ୍ୟ ଦୈନିକ ୨ଲକ୍ଷ ଲୋକ ନୂଆ ଆକ୍ରାନ୍ତ ଓ ପ୍ରାୟ ୪ ହଜାର ଲୋକଙ୍କ ମୃତ୍ୟୁ ହେଉଛି । ଆଉ ଏପଟେ ମଡର୍ଣ୍ଣା, ଫାଇଜର, ଜନସନ ଆଣ୍ଡ ଜନସନ ଟିକା ପାଇଁ କଥାବାର୍ତା ଚଳାଇଛନ୍ତି କେନ୍ଦ୍ର ସରକାର । ଏଥିସହ ସାରା ବିଶ୍ୱର ଟିକା ନିର୍ମାତା ଭାରତରେ ଆସି ଭାରତ ପାଇଁ ଓ ସାରା ବିଶ୍ୱ ପାଇଁ ଟିକା ପ୍ରସ୍ତୁତ କରିବାକୁ ଅପିଲ କରିଛନ୍ତି ମୋଦି ସରକାର ।
ଭାରତରେ ଏବେ ତିନୋଟି କରୋନା ଟିକା ନାଗରିକଙ୍କୁ ଦିଆଯାଉଛି । ଆଷ୍ଟ୍ରାଜେନିକା ଓ ଅକ୍ସଫୋର୍ଡ ୟୁନିର୍ଭସିଟି ପ୍ରସ୍ତୁତ କୋଭିସିଲଡ, ଭାରତ ବାୟୋଟିକ-ଆଇସିଏମଆର ପ୍ରସ୍ତୁତ କୋଭାକ୍ସିନ ଓ ରୁଷିଆ ଟିକା ସ୍ପୁଟନିକ-ଭିକୁ ଜରୁରୀକାଳୀନ ଅନୁମତି ଦିଆଯାଇଛି । ଆଗକୁ ବିଦେଶୀ ଟିକାର ସ୍ଥାନୀୟ ଟ୍ରାଏଲ ଉପରେ ରୋକ ଲାଗିଥିବାରୁ ଅଧିକ ଟିକା ଆମଦାନୀ କରିବା ସହ ଶୀଘ୍ର ଲୋକଙ୍କୁ ଟିକାକରଣ କରାଯାଇ ପାରିବ ।