ପୁଣି ବଢିବ ଲକଡାଉନ୍ ନା କୋହଳ ହେବ କଟକଣା । ହଟିବ କି ରାତ୍ରୀକାଳୀନ କର୍ଫ୍ୟୁ? ମଲ ଓ ଜିମ୍ ଖୋଲିବାକୁ ମିଳିବ କି ଅନୁମତି? ଆଜି ଆସିବ ରାଜ୍ୟ ସରକାରଙ୍କ ଗାଇଡଲାଇନ୍
କନକ ବ୍ୟୁରୋ : ଆଜି ସରୁଛି ରାଜ୍ୟ ସରକାରଙ୍କ କୋଭିଡ୍ କଟକଣା । ଆସନ୍ତାକାଲିଠାରୁ କେନ୍ଦ୍ର ସରକାରଙ୍କ ଅନଲକ-୩ ଆରମ୍ଭ ହେଉଥିବା ବେଳେ ରାଜ୍ୟ ସରକାର ଆଗକୁ କେଉଁ ନୀତି ଅନୁସରଣ କରିବେ ଏବେ ତା ଉପରେ ସମସ୍ତଙ୍କ ନଜର ରହିଛି । ବିଶେଷ କରି ଏଥର ରାଜ୍ୟ ସରକାରଙ୍କ ଠାରୁ ଲୋକେ ଅନେକ ଆଶା ରଖିଛନ୍ତି । କେନ୍ଦ୍ର ସରକାର ରାତ୍ରୀକାଳୀନ କର୍ଫ୍ୟୁ ହଟାଇଦେଇଥିବା ବେଳେ ରାଜ୍ୟ ସରକାର ହଟାଇବେ କି ରାତି କର୍ଫ୍ୟୁ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ଭଳି କଟକଣା କୋହଳ କରିବେ ନା’ ନାଇଟ୍ କର୍ଫ୍ୟୁ ଜାରି ରଖିବେ, ତାଉପରେ ସମସ୍ତଙ୍କ ନଜର ରହିଛି । ଯଦି ରାଜ୍ୟ ସରକାର ଅନଲକ୍ କରି ରାତି କର୍ଫୁକୁ ହଟାଇ ଦିଅନ୍ତି ତେବେ ପୂର୍ବଭଳି ରାତିରେ ଯାତାୟତ ଓ ଦୋକାନ ବଜାର ଖୋଲିବା ଉପରେ ଆଉ ପ୍ରତିବନ୍ଧକ ରହିବ ନାହିଁ । ସେହିପରି ମଲ ଖୋଲିବା ନେଇ କେନ୍ଦ୍ର , ରାଜ୍ୟ ସରକାରଙ୍କ ଉପରେ ନିଷ୍ପତି ଛାଡିଦେଇଥିବାରୁ , ମଲ ଖୋଲିବାକୁ ସରକାର ଅନୁମତି ଦେବେ କି ନାହିଁ ତା ଉପରେ ମଧ୍ୟ ନଜର ରହିବ । ସେହିପରି ଅଗଷ୍ଟ ୫ ତାରିଖରୁ ଜିମ୍ ଓ ଯୋଗ କେନ୍ଦ୍ର ଖୋଲିବାକୁ କେନ୍ଦ୍ର ସରକାର ଅନୁମତି ଦେଇଛନ୍ତି । ଅପେକ୍ଷା ରହିଛି ରାଜ୍ୟ ସରକାର ଏହା ଉପରେ କି ନିଷ୍ପତି ନେବେ ।
ତେବେ ଶୁଣିବାକୁ ମିଳୁଛି ଯେ, ରାତ୍ରିକାଳୀନ କର୍ଫ୍ୟୁକୁ ହଟାଇ ଦେଇପାରନ୍ତି ରାଜ୍ୟ ସରକାର । କିଛି କ୍ଷେତ୍ରରେ କୋହଳ ଆଭିମୁଖ୍ୟ ମଧ୍ୟ ଦେଖାଇପାରେ ରାଜ୍ୟ । ହେଲେ ସର୍ବାଧିକ ସଂକ୍ରମିତ ଜିଲ୍ଲା ଗଂଜାମ, ଖୋର୍ଦ୍ଧା, କଟକ, ସୁନ୍ଦରଗଡ଼, ଗଜପତି, ରାୟଗଡ଼ା ଆଦି ଜିଲ୍ଲାରେ କଟକଣା ଜାରି ରହିବା ସମ୍ଭାବନା ରହିଛି । ଲକଡାଉନ, ସଟଡାଉନକୁ ନେଇ ଧିରେ ଧିରେ ଲୋକ ଅତିଷ୍ଠ ହୋଇ ପଡିଥିବା ବେଳେ କେଉଁ କଟକଣା କୋହଳ ହେବ ଏବଂ କେଉଁ କଟକଣା ଜାରି ରହିବ ଏ ନେଇ ପ୍ରଶାସନିକ ମହଲରେ ଜୋରଦାର ବିଚାର ବିମର୍ଶ ଚାଲିଛି ।