ସାଙ୍ଗ ରଚିଥିଲା ସାଙ୍ଗର ହତ୍ୟା ଷଡଯନ୍ତ୍ର! ପୁଲିସର ସନ୍ଦେହୀ ଆଖିରୁ ବର୍ତ୍ତିପାରିଲାନି ଅଭିଯୁକ୍ତ
କନକ ବ୍ୟୁରୋ: ନାଁ ବିକାଶ ମହାପାତ୍ର । ସାଙ୍ଗକୁ ହତ୍ୟା କରି ଯିଏ ଦୁର୍ଘଟଣାର ରୂପ ଦେଇ ଖସି ଯିବାକୁ ଯୋଜନା କରିଥିଲା । ହେଲେ ପୋଲିସର ସନ୍ଦେହୀ ଆଖି ଖୋଲିଦେଲା ଅଭିଯୁକ୍ତ ବିକାଶ ମହାପାତ୍ରର ଅସଲ ମୁଖା ।
Kanak News is now on WhatsApp
Join and get latest news updates delivered to you via WhatsApp
ଗତ ଜୁନ ୨୧ତାରିଖ ରାତିରେ ଶିରିପୁର ଛକରେ ଜଣେ ଆସିଷ୍ଟାଣ୍ଟ ବ୍ୟାଙ୍କ ମ୍ୟାନଜର ଅମିତ କାନୁନଗୋଙ୍କ ମୃତଦେହ ଉଦ୍ଧାର ଘଟଣାର ପର୍ଦ୍ଦାଫାସ କରିଛି ପୋଲିସ । ଖଣ୍ଡଗିରି ଥାନା ପୋଲିସ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଲାଇଥିଲା । ହେଲେ ପୋଷ୍ଟମର୍ଟମ ରିପୋର୍ଟ ମାମଲାର ମୋଡ ବଦଳାଇଦେଲା । ରିପୋର୍ଟରେ ଉଲ୍ଲେଖ ଥିଲା ଛାତିରେ ଗଭୀର ଆଘାତ ଯୋଗୁଁ, ଛାତି ହାଡ ଭାଙ୍ଗି ଫୁସଫୁସରେ ପଶିଯାଇଛି । ଲିଭର ନଷ୍ଟ ହୋଇଯାଇଛି । ମୁଣ୍ଡରେ ଶକ୍ତ ଆଘାତ ହୋଇ ରକ୍ତ ଜମାଟ ବାନ୍ଧିଛି । ଏଭଳି ପ୍ରମାଣ ପାଇବା ପରେ ପୋଲିସ ମୃତ ଅମିତଙ୍କ ସାଙ୍ଗ ବିକାଶକୁ ଉଠାଇ ନେଇ ପଚାରଉଚରା କରିଥିଲା । ଏବଂ ପୋଲିସ ଆଗରେ ସେ ସବୁ ସତ ମାନି ଯାଇଥିଲା ।
କମିସନରେଟ ପୁଲିସର ସୂଚନା ଅନୁସାରେ ବିକାଶ ମହାପାତ୍ର. ଅମିତ କାନୁନଗୋ ଓ ଲକ୍ଷ୍ମଣ ତିନି ସାଙ୍ଗ । ବକେୟା ଟଙ୍କା ପାଇଁ ଅମିତ ଓ ଲକ୍ଷ୍ମଣ ମିଶିକି ବିକାଶ ପାଖକୁ ଯାଇଥିଲେ । ଟଙ୍କା ନେଣଦେଣକୁ ନେଇ ପାଟିତୁଣ୍ଡ ପରେ ମାରପିଟ ହୋଇଥିଲା । ମାଡରେ ଲକ୍ଷ୍ମଣ ଗୁରୁତର ହୋଇଥିଲା ଓ ଘଟଣାସ୍ଥଳରେ ଆଖି ବୁଜିଥିଲା ଅମିତ କାନୁନଗୋ । ଏହାପରେ ଖସିଯିବାକୁ ଯୋଜନା କରିଥିଲା ବିକାଶ ମହାପାତ୍ର । ପ୍ରଥମେ ଫଟୋ ଉଠାଇ ଅମିତଙ୍କ ପତ୍ନୀଙ୍କୁ ଦୁର୍ଘଟଣା ହୋଇଥିବା ଫୋନ କରି ଜଣାଇଥିଲା । ପୋଲିସର ନଜର ଏଡାଇବାକୁ ମେଡିକାଲଠୁ ଆରମ୍ଭ କରି ବ୍ୟବଚ୍ଛେଦ ଯାଏଁ ରହିଥିଲା । ଏପରିକି ସାକ୍ଷୀ ହୋଇ ଦସ୍ତଖତ ବି ମାରିଥିଲା ।