ବିଜେପି ଓ କଂଗ୍ରେସ ଶିବିରରେ ଟିକେଟ୍ ପାଇଁ ଛକାପଞ୍ଝା । ତାଲିକା ବାହାରୁନଥିବାରୁ ଚିନ୍ତାରେ ଆଶାୟୀ ପ୍ରାର୍ଥୀ

କନକ ବ୍ୟୁରୋ : ବିଜେଡି ଭଳି ବିଜେପି ଓ କଂଗ୍ରେସରେ ମଧ୍ୟ ଟିକେଟ୍ ଘୋଷଣାକୁ ନେଇ ଛକାପଞ୍ଝା ଜାରି ରହିଛି । ବିଜେପି ଗୋଟିଏ ପଟେ ସବୁ ଲୋକସଭା ପାଇଁ ପ୍ରାର୍ଥୀ ଘୋଷଣା କରିସାରିଥିବା ବେଳେ ଆହୁରି ୩୫ ବିଧାନସଭା ଆସନ ପାଇଁ ଟିକେଟ୍ ଘୋଷଣା କରିବା ବାକି ରହିଛି ।

ସେପଟେ ବହୁ ପଛରେ ପଡ଼ିଯାଇଛି କଂଗ୍ରେସ । ଦଳ ମାତ୍ର ୪୯ ବିଧାନସଭା ଏବଂ ୮ ଲୋକସଭା ଆସନ ପାଇଁ ପ୍ରାର୍ଥୀ କରିଛି । ତେବେ ଉଭୟ ଦଳ କାହିଁକି ଟିକେଟ୍ ଘୋଷଣାରେ ବିଳମ୍ବ କରୁଛନ୍ତି, ତାକୁ ନେଇ ଉଠୁଛି ପ୍ରଶ୍ନ । କୁହାଯାଉଛି, ବର୍ତମାନ ଦଳ ଡିଆଁ ପର୍ବ ଚାଲିଥିବାରୁ ଦୁଇ ଦଳ ପ୍ରାର୍ଥୀ ଦେବାରେ ବିଳମ୍ବ କରୁଛନ୍ତି । ଅନ୍ୟପଟେ ଉଭୟ ଦଳରେ ଏବେ ଅସନ୍ତୁଷ୍ଟ ନେତାଙ୍କ ସଂଖ୍ୟା ବଢ଼ିଚାଲିଛି । ପ୍ରତିଦିନ ବିଭିନ୍ନ ନିର୍ବାଚନମଣ୍ଡଳୀର କର୍ମକର୍ତା ଆସି ଦଳୀୟ କାର୍ଯ୍ୟାଳୟରେ ଟିକେଟ୍ ପାଇଁ ପ୍ରତିବାଦ କରୁଛନ୍ତି । ହୁଏତ ଏହି ପ୍ରତିବାଦ ପାଇଁ ଟିକେଟ୍ ଘୋଷଣାରେ ବିଳମ୍ବ ହେଉଥିବା କୁହାଯାଉଛି ।